Wir Friderich von gottes gnaden Romischer keyser Zu allenn zeitten merer des Reichs Herczog zu Osterreich zu Steyr zu kernten vnd zu Crain
Graue zu Tirol (et)c(etera) Bekennen vnd tun kunt offenlich mit disem brief Allen den die In sehen oder horen lesen Daz wir angesehen vnd gutlich betracht haben die
mercklichen gescheffte vnd anligunde sachen damit der durchluchtigist furst lasla zu vngern vnd zu Behem (et)c(etera) kunig vnd herczog zu Osterreich (et)c(etera) vnser
lieber vetter vnd furste als Er vns durch sein erber treffenlich Rette vnd Botschafft hat furbringen vnd zuerkennen geben lassen beladen ist vnd dardurch Er sich
solich Regalia vnd lehen so Im von des loblichen kunigreichs zu Behem Auch des furstenthumbs Osterreich wegen vnd allem dem so Im von Rechts wegen zu=
gehoren vnd von vns als Romischem keyser vnd dem heiligen Reiche als Regalia vnd lehen zuempfahen gepurt Zu disen zeitten In eigner persone zu vns bequem=
lich nit hat gefugen mogen Vnd haben darumb mit wolbedachtem mutte vnd guttem Ratte vnser fursten Rete vnd lieben getrewen dem vorgen(an)t(e)n kunig
lasla vnserm lieben vettern vnd fursten soliche seine Regalia vnd lehen so Im von des kunigreichs zu Behem Auch des furstenthumbs Osterreich wegen
Vnd allem dem so Im von Rechts wegn zugehort vnd von vns als Romischem keyser vnd dem heiligen Reiche als Regalia vnd lehen zuempfahen gepurt Auch
den Ban vber das plutt zurichten von sondern gnaden geurlaubet Vnd vrlauben Im die vnd den Ban vber das plutt zurichten Von Romischer keyserlicher
macht volkomenheit wissentlich In kraft vnd von data diß briefs Zwey gancze Jare die nechsten schirist nacheinander komende Vnd seczen vnd wellen
daz Im solich vns vrlauben der egemelten Zweyer Jare an der empfahunge der vorberurtten seiner Regalia vnd lehen vnd auch seinen Rechten daran
ganncz keinen schaden bringen solle Doch vns vnd dem heiligen Reiche an vnsern vnd sust meniglich an seinen Rechten auch vnugriffenlich vnd
vnschedlichen Mit vrkunt diß briefs versigelt mit vnser keyserlichen maiestatt anhangendem Insigel Geben zu der Newenstatt An Freitag
vor des heiligen kreuczis tag Exaltationis Nach Cristi gepurde vierczehennhundert vnd im vierundfunffczigsten Vnsers Reichs im funff=
czehennden Vnd des keyserthumbs in dem Dritten Jaren