Wir Thateus von gotes genaden Apt des Gotzhaws zue sand Jacob der Schotten zu Regenspurg Bekenne
offenlichen mit dem briefe vor aller mäniglichen Das vns die Ersamen lewt vnd perßnen H(er)r wilhal
men von Hösten Thumherr zue Vrach Cristoffen lerobelfingers zum Hantzenstain Vnd Erhart
Brawarts zu Vrach Quittungbriefe Hannsen Toppenwalder Burger zu Regenspurg von
Hannsen Hilprants von Tuelkofen sälign guts wegen In pfantschaft weise Innen gehabt gegeben
vnd fur vns Ir aller dreier Anhangenden Inßigeln versigelt In Sigillen geschrifften vnd an
allen enden gantz gerecht Vnd darInnen nichtz abgetan noch verkert gesehen gehört vnd
verlesen haben Vnd lawt von wortt zu wortt von Artickeln zu Artickeln Als hie
nachgeschriben stet Vnd zu Vrkunt der warhait So haben wir vnser Inßigel nach
bit der Ersamen weysen herrn Cäm(er)er vnd Rate der Stat zu Regenspurg An den
brief wissentlichen gehangen Doch vns vnd vnserm Gotzhawse onschaden Das ist
geschehen Nach Cristi gepurde Tausent vierhundert Vnd In dem funff vnd funff
zigsten Jaren An pfintztag vor Sand Matheus des hailigen Apostls Vnd Ewangelist tag

Ich wilhalm von Hösten thumherr zu vrach Ich Cristoff lerobelfing zum hantzenstain Vnd
Ich Erhart Brawart zu vrach Bekennen fur vns vnd alle vnser Erben offenlich mit dem
brief vmb alle die hab vnd gut So hanns toppenwald burger zu Regenspurg von vnserm swag
vattern Vnd Enechen Hannsen hilprant von Tuelkofen säligen In pfantschaft weise vmb
sein Schuld Innen gehabt vnd darauf ervolgt Vnd alle recht behabt hat Dasselbig gut alles
Hat vns der obgenant Toppenwalder zu vnsern henden geben vnd geantwurt daran
wir ain gantz volligs benugen haben Hierauf So sagen wir In sein hawsfrawen vnd
alle Ir Erben alles obgemelts guts gantz quit ledig vnd los In Crafft des briefs So ferre
das wir vnd sunder Innderfraw vde mein obgenant Brawarts hawsfraw all vnser baide sament
noch sunst nyemant anders von vnsernt wegen hincz In ditzumb kain zusprach nit mer
haben noch gewynne sullen wellen noch enmugen weder mit recht noch vnrecht In kain
weis vngeuerd Vnd des alles zu warer Vrkunt geben wir In den brief mit vnser
aller dreier Anhangenden Inßigeln fur vns vnd vnser Erben stat zuhalten anfroesung
des briefs Der geben ist An pfintztag vor sand Matheus tag Nach Cristi gepurde
vierzehenhundert vnd Im funff vnd funfftzigsten Jaren