Wir Peter von gottes genaden der Heiligen Romischen kirchen Cardinal vnd Byschoue zu Augspurg Wir Ieronimus von denselben gnaden Byschoue zu Creta vnnsers hailigen
vatter des Babsts sendbot, vnd von denselben gnaden gottes Wir Iohanns vnd Wir Sigmumd gebrudere pfallntzgrauen by Rein hertzogen in Obern vnd Nidern Bayrn (et)c bekennen
vnd tun kundt allermänclich offenlich mit dem brief als der durchlauchtig furst vnnser lieber herr vnd frewnt Herr Iorg kunig zu Behem Marggraue zu Merhern Hertzoge
in Slesien vnd Luczemburg vnd Marggraue zu lussitz (et)c etlicher des heiligen reichs stet verrot worden ist nach laut seiner kunigclichen wirde vertröstbrief an sy auß
ganngen, Haben wir auf heut dato des briefs beredt vnd betedingt vmb sollich vehde vnd vertröstbrief durch den vorgenannten vnnserm lieben hern vnd frewnt den
kunig zu Behem wider des reichs stet furgenomen fur Ine all sein vndertan vnd die seinen Vnd derselben stet widertumb gegen seiner kunigclichen wirde fur sy Ire
vndertan vnd alle die Iren ainen treystenlichen frid gemacht vnd betedingt der auf den sambstag nagst nach sannd Bartholomeus tag schirstkunfftig mit der
Sunnen aufgangt angeen weren vnd besteen sol bis auf sannd Michaels tag als man zelen wirdet vierzehenhundert vnd in dreyvndsechtzigistem Iar denselben
tag allen bis zu der sunnen vndergangt ongeuärlich, zu vrkundt haben wir obgenannt teydinger vnnsere Inssigel an den brief tun henngen vnd das sollicher
frid von vnns Iorgen von gottes genaden kunig zu Behem (et)c fur vns all vnnser vndertan vnd die vnnsrn vnd von vns des heiligen reichs steten vnd den vnnsrn
also getrewlichen vnd ongeuärlichen gehalten werden sol des haben wir vorgenannter kunig zu Behem vnnser kunigclich Inssigel zusampt der obgenannten
teydinger Inssigel auch an den brief tun henngen Vnd Wir des heiligen reichs stet sendboten haben gebeten den hochgebornen fursten vnd hern Hern fridrichen
Marggrauen zu Branndenburg des heiligen reichs kämrer vnd Burggrauen zu Nüremberg vnnsrn hern das der sein Inssigel von vnnser des reichs stet wegen
auch an den fridbrief gehanngen hat seinen gnaden vnd erben on schaden darunder wir vns by vnnsrn eeren in aydes weis verpinden alles das zehalten
das der fridbrief Innhalt trewlich ongeuärde, Geschehen vnd Geben zu Nüremberg an freytag vor sannd Bartholomeus tag des Iars Als man zelett
nach Cristi vnnsers lieben herren gepurd vierzehenhundert vnd In zway vnd sechtzigisten Iaren