Wir Nidas von gotsbarmherzikeit Apt des Closters czu Grissaw Bekennen offentlich mit dezem briue, Allen
die en sehn horen ader lezen, das wir gesehn haben des allerdurchlauchtigsten ffursten vnd hern hern Wenczlaus
Großmechtigen kunigs czu Behemen vnd Herczogen czur Swidnicz vnsers allergnedigsten Hern vnuerseerten
brieff mit seiner kuniglichen maiestat anhangenden Ingesigel vorsegilt der do lawt von worte czu worte als
hie noch geschreben steeth Wir Wenczlaw von gots gnaden, kunig czu Behmen Marggraff zu Brandeburg vnde
herczoge In Slezien, Bekennen vnd tun kunt offentlich mit desem briue, Allen den die en sehn ader horen lesen wann
die man Ritter vnd knechte der lande Swidnicz vnd Jawor vnser lieben getrallen vns vnsern erben vnd nochkomen
kunigen czu Behem Eincz abhuldinge Eyde vnd globde getan haben als iren rechten erblichen vnd naturlichen
herrschefften, Darvmb globen wir vor vns vnser erben vnd nochkomen, kunige czu Behm den egenanten mannen
Ritter vnd knechten der lande allen gemeinlich vnd ner iglichem sundirlich In guten truwen ane alles geuerde wenn
is czu schulden kummet, das noch tode der hochgebornen frawen Agnessen herczoginnen derselben lande, die lande als
sie sullen erblich an vns komen, das denne dieselben manne Ritter vnd knechte beider lande Ire erben vnd nochkomen
alle gemeinlich vnd ner iglicher sunderlich bey allen iren rechten freihciten vnd Gnaden vnd landen, die sie von alden
ffursten herbracht haben vnd die sie mit briuen ader redelicher kuntschafft noch des landes rechte beweisen mogen siczen
vnd bleiben sullen von vns vnsern erben vnd nochkomen kunigen czu Behm vnd allen vnsern Amptlouten vnd getrallen
vngehindirt Auch meynen vnd wollen wir, das in denselben landen Rittern vnd knechten bleiben sullen kunicze
vnd hercziczen die von alden ffursten uff die lande gesturben vnd geuallen sint, Welcher ouch vnser erben adir noch=
komen, kunige czu Behm der eldeste were, der sal herre derselben lande sein vnd sich herre douon schreiben
vnd nennen vnd sal ouch dasselbe die lande Swidnicz vnd Jawor von enandir nimmer gesindern Auch von sundir
licher gunst tun wir In die gnade das wir in beiden landen zu der Swidnicz vnd czu dem Jawor eynen homptman
vnd eynen lantschreiber geben vnd seczen sullen der iglicher von eynem der lande Swidnicz adir Jawor geborn
sey In der lande eynem gesessen sey vnd bedirman sey, Also das ie nur eyn houptman vnd eyn lantschreiber in
beiden denselben landen sey Sundirlich wollen wir das nur eyne mwncze in beiden landen sein sulle die an
dem czusatze vnd an dem silber in den wirden vnd in der gute bleibe vnd bestee als sie itzundt ist vnd eyn
zeichen vnd geprege habe, Ouch globen wir den obgenanten mannen Rittern vnd knechten in dem namen als
do vor das wir vnser erben adir nochkomen, kunige czu Behm sie alle adir bey teile von der Cronen des kunig
reiches czu Behm nimmer in dheinen czeiten vorkeuffen vorpfenden adir vnpfrenden sullen in dheineweiß
Sunder sie dobey erblich vnd ewichlich lassen vnd behalden, Mit vrkund dicz briffes vorsegilt, mit vnser
kuniglichen maiestat Ingsigle Gebn czu der Swidnicz Noch crists geburt dreiczenhundirt iar dornoch In
dem newnden vnd sechtzigsten iare an dem nehsten freitage vor sand Ballen tage vnsrs kunigreiches In dem
Sebenden iare, Des czu clarem bekentnisse haben wir vnser Aptes Ingesigel uff deßen brieff drucken lassen der
gegeben ist am freitage noch Inucauit Noch cristi geburt virczenhundirt dornoch Im Sebenvndsechtzigsten Jaren