Wir Mathias vonn gotes gnaden In Hungern zu Behemen Dalmacien Croacien zc(etera) Kunig Marg=
graue zu Merhern Herczog In Slesien vnnd Marggraue zu lausitz Bekennen offintlich In diesem briue vor allin
die In sehin ader horen lesen Nachdem vnnd wir vnderricht wurden sein vnnd verstanden habenn das die Ersamen vnnser
vnnd der Cronen zu Behemen liebenn getrewen Burgermeister vnnd Rathmann vnnd die gancze Gemeinde Arm vnnd Reich
vnnser Stat Gorlitz bissher etlicher wilkor vnnd Statut gebraucht der sie zu czeiten gros schaden empfangen haben vnd
In vnrat gesaczt wurden sein Also sein wir allewege vnd gancz darzu geneigt wo wir den vnnsern mit gunst vnd gnade
helffen mogen das Ir schade vermidden vnnd Ir gedeien zunemen vnnd wolfart furgenomen werde des sint willig wir vnnd dorvmb
So habenn wir von Bemischer kuniglicher macht vor vns vnd vnnser nachkomen kunige zu Behemen den obgenanten Bur=
germeister vnnd Ratmann vnd der ganczen Gemeinden Arm vnd Reich vnnser Stat Gorlitz die gunst vnd gnad getan vnd seczen
vnnd wollen geinwertiglich In vnd mit crafft dieses vnsers kuniglichen briues das sie vnnd Ire nachkomen Ire wilkor vnd statutt
so offte vnnd dicke der Burgermeister vnd Ratmann mit Irer eltesten Rate erkennen vnd mercken das In die schaden brengenn
nach gelegenheit der czeit vnnd sitten der leute verwandeln mogen Auch newe wilkor seczen vnd machen die vns auch vnnsern
nachkomen kunigen zu Behmen an schaden vnnd vnser Stat Gorlitz vnd Iren Inwonern erlich nuczlich vnnd fromlich sein vnd
wes sie also wilkurn vnd seczen sal macht vnnd crafft gewynnen vnd habenn vnnd von meniglichem vnwidersprechlich gehaltn
werdenn Vnnd gebieten darvmb allen vnd iglichen fursten geistlichen vnd wertlichen Grauen freien hern Rittern knechten Reten
vnnd Steten vnnd sust allen andern vnsern vnd der Cronen zu Behemen vnderthan vnd sunderlich vnsern Voiten zu Budissin die
iczunt sein ader In kunfftigen czeiten sein werden ernstlich vnd vestiglich mit diesem vnnserm kuniglichem briue das sie die obge=
nanten vnser Burger vnd die Stat zu Gorlitz bei dieser obgerurten begnadunge geruglich bleiben lassen vnd sie daran nicht irren
noch hindern sollen In dheinweiss also lieb In sei vnser swere vngnad zuuormeiden Mit vrkund dieses briues versigelt mit
vnnserm kuniglichen anhangenden Insigel Geben zu Brun am dinstag In heiligen Osterlichen tagen Nach Cristi gebort
Vierczehinhundert vnd Im Einvndsibenczigsten vnnser Reiche des Hungerischen Im vierczehenden vnd des Behmischen Im
andern Jarenn