Wir Hermann von gotis gnaden Ertzbischoue zu Collen des heiligen Romisschen Reichs durch Jtalien Ertzcantzeler vnd Churfurste Hertzog zu Westualen vnd zu Engern (et)c(etera) Bekennen Nachdem als
wir nach Cristi vnnsers lieben herrn geburt dusent vierhundert vnd in dem Neunvndachtzigsten Jaren von der keyserlichen maiestat vf einen tag gein ffranckfurt an den Moyn in ettlichen des heiligen Romisschen
Reichs geschefften vnd mit von wegen der wale eins Romisschen konigs gefordert doselbs aus zufelligen sachen einen Romisschen konig zuwalen gut zusein in rate funden Vnd so sollich wale gescheen Vnnd der
Durchlauchtig furste herr Wladislaus konig zu Behmen Marggraue zu Merhern (et)c(etera) vnnser besonder lieber herr vnd oheim aus nicht forderung zu sollicher wale vnwillen vnd verdries entphangen
derhalben aus innhalt einer verschreybung oder priuilegiums seiner liebe vorfaren konigen zu Behmen als Churfursten des heiligen Romisschen Reichs gegeben funffhundert marck goldis zufordern furge
nomen Vnd so sollich nicht forderung seiner liebe zu angezeygter wale nicht in verachtung oder abbruch seiner koniglichen wirde ere vnd gerechtigkeit sonndern alleyn aus zufelligen sachen in der
eyle bescheen auch sein liebe von dem heiligen Romisschen Reiche vnd vnns fur einen Churfursten vnd Ertzschenckin des heiligen Romisschen Reichs fur vnd fur gehalten ist vnd noch gehalten wirdet So
haben Wir Ertzbischoue Hermann obgnant dem gedachten durchleuchtigen fursten herrn Wladislaen konig zu Behmen (et)c(etera) vnnserm besonder lieben ohemen auch der loblichen Crone zu Behmen zu
eren nutz vnd zuenthaltung fruntlicher eyntracht bewilligt Vnd fur vnns vnd vnnser nachkomen Ertzbischouen zu Collen frey vnd mit wissen in crafft diesz brieues bewilligen desz der massen
vnd meynung do vnd ob hinfur zu ewigen gezeiten ein Romisscher konig gewalet vnd gekoren vnd der gemelt vnnser lieber oheim Herr Wladislaus konig zu Behmen oder nachuolgende Cristenliche
konige zu Behmen darzu wie sich geburet nicht gefordert oder gehaisschen wurden Vnd wir oder vnnser nachkomen Ertzbischouen zu Collen durch vnns oder vnnser botschafft bey sollicher wale vnd
Chure eins Romisschen konigs gegenwertig sein vnd sollich wale vnd Chure mit vnns oder nachuolgenden Ertzbischouen zu Collen wissen vnd willen gescheen wurde das wir alsdann oder
nafolgende Ertzbischoue zu Collen in funffhundert marck goldes wollen bewilligt haben vnnd die in dreien Jaren ydes Jars einen drittenteil dem gemelten vnnserm herrn vnd ohemen dem
konig oder Crone zu Behmen zubetzalen verfallen sein Wir wollen auch das diese vnnser verschreybung dem gedachten vnnserm herrn vnd ohemen dem konige vnd der Cron zu Behmen an
irrer freyheit Priuilegia vnd gerechtigkeit keynen abbruch noch vermynnerung thun oder bremngen sal alles getruwelich vnd ongeuerlich Des zu vrkunde haben wir vnnser Jnsigel
wissentlichen an diesen brieue thun hanngen Der geben ist in den Jaren Vnnsers herrn Tausent vierhundert vnd im Neunvndachtzigsten auf den heiligen Chorfreytag

E(piscopus) com(m)iss(us) d(omino) E(piscopo)
Joh(annes) minhen Cancellari(us) ss(ubscripsit)