WIr friderich von gots gnaden Herczog zu Sachssen des heiligen Romischen reichs Ertzmarschalk vnd Curfurste lanndgraue In doringen vnnd marggraue
zu meyssen. Bekennen nachdem als nach cristi vnnsers lieben herren geburt Tausennt vierhundert vnd Inndem dreyvndachtzigsten Jaren. Der hochgebornne
furst herre Ernust weylend herczog zu Sachssen vnd Curfurste (et)c(etera). vnnser lieber herre vnd vater seligs vnd loblichs gedechtnis von der keiserlich(e)n maiestat auf einentag
gein frankfurt am meyn Inn etlichen des heiligen romisch(e)n reichs geschefften vnd nicht von wegen der wale eins Romisch(e)n konigs geuordert. daselbs auß zufelligen
sachen. Einen Romisch(e)n konig zu welen gut zu sein fur rathefunden. Vnd so solch wale gescheen. vnd der durchleuchtig furst herre Wladislauus konigk zu Behem
marggraue czu merhern (et)c(etera) vnnser besunder lieber herre vnd oheyme. Auß nicht forderung zu solcher wale vnwillen vnd verdrieß empfanngen. derhalben
auß Innhalt einer verschreibung oder priuilegiumms seiner liebe vorfarn konigen zu Behemen als Curfursten des hiligen Romischen reichs gegeben funf
hundert marck goldes zu fordern furgenomen. vnd so solch nicht vorderung seiner liebe zu angezaigter wale nicht Inn verachtung oder abbruch seiner
koniglichen wirde ere. vnd gerechtigkeit. Sundern allein auß zufelligen sachen Inn der yl bescheen. Auch sein liebe von dem heiligen romisch(e)n reiche vnd
vns fur einen Curfursten vnd Ertzschencken des heiligen romisch(e)n reichs furvnd fur gehalten ist vnd noch gehalten wirdet. So haben wir herczog friderich
obgenant. dem gedachten durchleuchtigen fursten. herrn Wladislauuen konig zu Behemen (et)c(etera). vnnserm lieben oheymen. Auch der lobelichen Crone zu Behemen
in eren nutz vnd zu enthaltung freuntlicher eintracht bewilligt. vnd fur vnns vnnser erben vnd nachkomen herczogen zu Sachssen Curfursten frey vnnd mit wissen Inn
Craft ditz briefs bewilligen. Also dermaßen vnd meynung. Ob vnd es hinfurt in ewigen geczeiten Ein romischer konig gewelt vnd gekornn. vnd der gemelt vnnser
lieber Oheym Herre Wladislaus konig zu Beheym oder nachuolgende Cristenliche konig zu Behemen. darzu wie sich geburt nicht geuordert oder geheyßhen wurden. Vnd
wir oder vnnser erbn vnd nachkomen herczogen zu Sachssen Curfursten durch vnns oder vnnser botschaft bey solcher wale vnd kure Eins Romischen konigs geinwertig
sein. Vnd solch wale vnd kure mit vnnser oder volgender herczogen zu Sachssen Curfursten wissen vnd willen gescheen wurde. Das wir alßdann oder volgende herczogn
zu Sachssen Curfursten In funf hundert marck goldes wollen bewilligt haben. Vnd die Inn dreyen Jaren ydes Jars ein dritenteile dem gemelt(e)n. vnserm herrn vnnde
Oheymen. dem konigk oder Crone zu Behemen zu bezalen verfallen sein. Wir wollen auch das dise vnnser verschreibung dem gedachten vnnserm herren vnd oheimen
dem konig vnd der Crone zu Behemen an Ir freiheit priuilegia vnd gerechtigkeit keinen abbruch oder verminderung tun oder bringen soll. alles getreulich vnd vnge
uerlich. Des zu vrkunde haben wir vnns Inn sigel wissentlich an disen briue hangen lassen. Der geben Ist zu Torgaw am dornstag nach Cantate. Nach Cristi
vnnsers lieben herren geburt vierzehenhundert vnnd darnach In dem newnvndachtzigst(e)n Jarenn