Wladislaus von gots gnaden zw hungern zw behaim dalmacien Croacien (etc.) künig Marggraff zw Merhern Herczog zw Luczenburgk vnd In Slesien vnd Marggraff zw Lausicz bekennen vnd tün kunt Allermennigklich
mit disem brieffe Wan wir aller vnd yeglicher vnsir vndertanen vnd getrewen Nucz vnd bestes gerne verwenden vnd sye begnaden damit sye seligklich zwnemen an Eer vnd wesen vnd vmb dester bas gedeynen mugen Wann nw vor
vnns komen ist des Burgermaisters der Ratman Eldisten vnd der ganczen gemain vnnsir Statt Bawdissn vnsir lieben getrewen Erbar botschafft vnd haben vnns als ainen künige zw behaim gewonliche holdunge globde vnd
aidt getain vnd vnns darauff demütigklich gebetten das wir denselben vnsirn lieben getrewen Burgermaister Ratmannen Eldisten vnd ganczen gemayne vnsir Statt Bawdissn vnd Iren nachkomen Alle vnd yegliche Ir vnd der
Statt Bawdissn Priuilegia freihaiten gnaden rechten gerichte Ciolle lehen lehenbrieffe hantuesten gutte gewonhaiten vnd alt herkomen der sye bissher genossn vnd die Ire vorfarn vnd sye von loblicher gedechtniss ettwan den
Marggraffn zw Brandeburgk kayser karl kayser Sigmund künig Iohansn künig wenczeln künig Lassla vnnsir vorfarn künigen zw behaim vnd andirn furstn vnd herren erworben vnd redlich herbracht haben In vor
newen zw bestetigen vnd zw Confirmiren gnedigclich gerüchten Des haben wir angesehen soliche Ire demütige vnd vleissige bett vnd auch betracht Nucz stete getrew vnd annehme willige dinst die dy vorgnantn
von bawdissn vnsirn furfarn künigen vnd vnsir Cronen von behaim offt getrewlichn vnd nuczlichn getain haben vnd vnns furpas tün sölln vnd mugen In künfftigen zeiten vnd haben darvmb mit wolbedachtem muete guettem
rathe vnsir furstn Edeln vnd getrewen vnd rechter wissen den vorgnantn vnsirn lieben getrewen Burgermaister Ratmannen Eldisten vnd der ganczen gemayne vnsir Statt Bawdissn vnd Iren nachkomen Alle vnd yegliche Ire
vnd der Statt Bawdissn Priuilegia freihaiten gnaden rechtn Ciolle lehn lehenbrieffen hantuesten gutte gewonhaiten vnd alt herkomen Dorffir Zinsse walde holczer pusten weyden Teiche vnd alle andir geniessn vnd herligkait
der sye bissher genossn vnd die Ire vorfarn vnd sye von Milder gedechtniss ettwan den Marggraffn zw Brandeburgk vnd von kayser karl kayser Sigmundt künig Iohanssn künig wenczeln künig lassla vnsir vorfarn künigen
zw behaim vnd andirn furstn vnd herren erworben vnd redlich herbracht haben vnd mit namen Syben brieff vnd Priuilegia von künig Mathias vnsirs vorfarn die sy vor vnns pracht vnd gelegt haben Das Erste priui
legium das da lautt auff ain marckt In der sliben vnsir Statt Bawdissn zw haben Das ander aine gemayne afirmacion aller vnd yeglicher Irer brieff vnd Priuilegia Das dritte das sy Ire Statuen als oft vnd dick es
not sein wird vorwandeln vnd newe machen seczen vnd machn mugn Das vird dassye hundert vnd funffczigk schok grossn Ierlichs zins In land zw Bawdissn Camencz vnd loben auff den lehenguttern daselbst kauffn
mügen vnd dieselben zins vnd zinsgütter sollen furpass ligen In Irem Statrecht vnd allain mit In dienen vnd die als andir Irer erbgütter gebrauchen doch vnsschadlich vnns vnd vnsir kron zw behaim an vnsirn dinstn
Das fünffte das sye ainen gemeynen keller vnd trinkstuben In der gnantn vnsir Statt auffrichten vnd pawen mugen dem gemeinen Nucz zw guett Das sechst das sye aine bleiche auffrichten sölln vnd mugen Das Sybent
das kainerlay Rente Nucz zins noch gult von vnsirm Sloss Bawdissn sölln versaczt verkaufft vorschriebn noch vergeben werden vnd des zw executorn haubtman vnd bestetigern derselbn den burgermaister Rat der Statt Baw
dissn gesaczt Wye denn das soliche brieffe vnd Priuilegia darvber aussgangen vnd vns vorgehalten klerlichn vnd weytter auss weyssen In alln Iren punctn artickeln vnd maynungen als die an In selbs von worte zw worte lawten
vnd begriffn sine gnedigclich vornewet beuestnet bestatigt vnd confirmiret vornewen beuestnen bestetigen vnd Confirmiren In die auch von künigclicher macht zw behaim In krafft diss brieffs In aller der mass vnd
weysse als op sye alle vnd yegliche besunder von wortt zw worte In disem vnsirm brieffe begriffn gesaczt vnd geschrieben wern das sy dapey geruecklichn bleibn vnd der aller vnd yeglicher geniessn vnd gebrauchn
sölln vnd mügn von yedermennigclich vngehindert Was sye abir meer brieff odir Priuilegia von künig Mathias vnsirs vorfarn loblicher gedechtniss hetten aine die obn angetzaigtn die sye vnns vorbracht welln
wir In nit bestetigt haben vnd gebieten darvmb Alln vnd yeglichn furstn gaistlichn vnd Werntlichn Graffn freyen herrn Rittern knechtn stetten vnd gemain vnd vnsir Cron zw behaim vndertan
vnd sunderlichn vnsirn vogtn zw Bawdissn die yczunt sein odir In künfftigen zeiten sein werden Ernstlich vnd vestigclichn mit disem vnsirm künigclichn brieffe das sy die obgenantn vnsir burger vnd die Statt zw
Bawdissn bey den obgemelten Iren brieffen Priuilegien gnaden gunstn lehn hantuesten freihaiten guetn gewonhaiten gerichten Ciolle dorffirn zinsn walden holczern pusten weyden teichen vnd allen andirn
Iren herligkaiten vnd geniessn geruegclichn bleibn lassen vnd sye daran nit hindern noch yrren sölln In kainerweysse als lieb ainem yeden sey vnsir sware vngnad zw vermeyden Des vrkundt diss brieffs vorsigelt mit
vnsirm künigclichn anhangenden Insigel Gebn In vnsir Stat Budweyss Inburgk Am Eretag Nach sant Margareten tag der heilign Iunckfrawen Nach Cristi vnsirs lieben herren geburt Virczehnhundert vnd In den
ain vndnewnczigisten Iaren vnsir Reiche des hungerischn ym Erstn vnd des behaimischn ym zwainczigistn Iaren
Ad Relacionem domini Iohannis de Sthnbergk
Cancellarij Regni Bohemie