Jm gots nahmen seliglich amen Wir Karll von gotes gnaden Des heiligen Romischen Reichs furst zu munsterberg Jn Slesien zur
Oelsen Herczogk Graff zu Glacz Herr von Linstadt vnnd Podiebradt (et)c(etera) Bekennen vnnd thun kunt hiemit ermissig vnnd vor menniglich Demenach etwan der Durch
lauchtigst vnnd Grosmechtigst furst vnnd her herr Wladislaus zu Hungern Behem (et)c(etera) Romisch (et)c(etera) Marggraff zu merhern Herczog zu Luczenburgk Jn Slesien vnnd
Marggraff zu Lausicz (et)c(etera) hochloblicher gedechtnus vnserm lieben hern vnnd Bruder dem Hochgebornen Fursten hern Albrechtern seliger vnnd milder gedechtnus
vnnd vns samptlich vnnd allen vnsern Erben vnnd nachkomen vnter andern begnadungen vnnd freyheiten Jn sunderheit mit diesem begabet vnnd gnediglich
begnadet das wir vnnser Erben vnnd nachkomen gancze volle macht vnnd gewalt sollen vnnd mugen haben vnnser Schlosser Stete lant leuthe vnnd gutter nutz
ken Jren ein vnnd zuczueignen so wir iczunt hetten ader hernachmals haben vnnd gewynnen mochten by gesuntem leib ader auff vnserm todt bette eine teyle
ader gar wehm wir wollen vorchaffen vorschreiben vormachen vorseczen vnnd geben mugen vnter vnsern eignen briffen vnnd sigeln der Jrmer koniglichen Maiestat
Erben vnnd nachkomen konige zu Hungern vnnd Behem vns sunst vor allermenniglich frey vnnd vngehindert Wie dan solige begnadung sich in seiner koniglichen
Maiestat briffe mit weitern worten vnnd anczeyge erstrecket Krafft disser haben wir vor vns vnnser Erben vnnd nachkomen bey guttem gesunde leibs vnnd der
synnen wissend mit vorgehabtem rathe vnnser hern Romen vnnd freunde Vorledigth freywilliglich in namen Eines rechten redlichen vnnd vnwiderrufflichen
Erkauffs vorkaufft entreumbt vnnd selbig vbergeben Das furstenthumb Wolaw Beide weichbilde Steynaw vnnd Rauden mit allen vnnd Jgliczen derselbenn
Geistlichen vnnd weltlichen lehen Clostern als nemlich die herlichkat so wir auff dem Closter leubus vnnd auff dem Closter zu vnnser lieben frawen aussen stadt
zu Breslaw biszher Jnngehabt Dorffern vnnd stetten gerichten aigenchafften Zolleuten Edelleuten weinbuchen Czollen Geltzinsen Betragt zinsen Pachtgeldern
forwercken wiesen weyden welden hulczen heyden puschen Awen fischteichen vnnd stauteichen allen vnnd ieglichen Gegeyden wiltpanen vnnd vogell fanken
wasser fliessen fluszwassern aychslagen der Ader steyne brechen Erczgewercken golde aych waschen aurg mit aller Jrer horung vnnd nuczungh vber vnnd vnter
der Erden wie solichs alles mit sunderlichen worten benant ader gedeutet werden mochte Nichts dauon an Schlossen steten gerichten Dorffern vnnd allem anderm
außgeschlossen außgenomen noch hindangesaczt Jn allermaß form vnnd weise wie dasselb furstenthumb vnnd weichbilde Jn Jren landts Grenczen gelegen vnd
wir sie biszher Jn besiczung gehabt Dem Edlen hern Hansen Turczo von Bettelheim Dorff Graffen auff der Kremnicz Der koniglichen Cammer Behem stete Jnn
Hungern oberste vorwesern seinen erben vnnd nachkomen Numb hiemit in krafft vnnd macht dieses briffes auch auß obangezaigter koniglicher maiestat begnadung
genanten hern Turczo seinen Erben vnnd nachkomen vorkauffen Entreumen vnnd selbig vbergebenn Durch yne vnnd sie nu vnnd zu ewigen geczeiten mit allen vnnd
Jeden priuilegien hantfesten freyheiten vnnd begnadungen domit dasselbe furstenthumb Wolaw die weichbilde Steynaw vnnd Rauden von Keysernn vnnd Koni
gern besigelt vnnd von alters außgesaczt vnnd sunst auch mit allen Jnnkungen rechten wie wir das selbs zu lehnrecht Jnngehabt auch biszher gancz Jnngehabt
zu lehnrecht zubesiczen zugebrauchen zunuczen zuvorkauffen zuvorseczen zuvorsetzen zuvorgeben an kirchen vnnd Jren nucz vnnd fromen zuwenden noch seinem vnd
Jrem besten gefallen vor vns allen vnnsern erben vnnd nachkomen vnausgesprochen vnangefochtigt mit keinem gerichte geistlichem noch weltlichem vnnd sunst
keine anreden thun noch mach wie die ymmer durch mensczlich list erdacht vnnd außgesprochen mugt werden allzeit vnhinderlich Welichs alles vnnd Jedes
was hierin begriffen vnnd freie ein iglich stuck punct vnnd artickell Jn sunderheit mit worten gedeutet wie in der besten form vnnd maß iczt alsz dan vnnd dan alsz iczt
wie es von vns am krefftigsten vnnd ganczsten dem Turczo seinen erben vnnd nachkomen am nottigsten gescheffen soll vnnd mag auß zulegegebenn vnnd obbesagte
Jrmer koniglicher Maiestat priuilegia mit vnserm furstlichen briffe vor vns vnnser Erben vnnd nachkomen Confirmiren bestetigen vnnd bekrefftigen Treulich
vngeferlich Zu vrkunt haben wir diesen briff mit vnnser furstlichen wirde grosserem anhangendem Jnsigell vnnd dem Reittern zu ruck darann
gedruckten der wir samptlich Jn Slesingen gebrauchen vorsigelt zubesigeln Geben auff vnserm Schlosse zur Oelsen am dinstag nach Maximiliani Bieschoffes
Nach cristi geburt Tausent funffhundert vnnd Jm Siebenzehenden Jare Dabey seint gewest Der Edle Wolgeborne vnnser lieber getrewer her heinrich Burggraff
von Dohne auff Trachenberg vnnd die Edlen vesten auch vnsere getrawen lieben Peter von Haugk Czedlicz genant vnnser marschalck Nickel Czirnberg Bilaw genat
von Czingendorff vnnd Hans Zetterberg vnnser Camerer vnnd ander vil gelaubwirdige
Karolus dux
ma(nu) p(ro)p(ri)a s(ubscripsi)t