Wir Ferdinand von Gots gnaden Römischer Künig zu allen zeiten merer des Reichs in Germanien zu Hungern Behaim Dalmatien Croatien und Slaüo
nien (et)c(etera) Künig Jnfant in Hispanien Ertzhertzog zu Osterreich Hertzog zu Burgundi zu Brabant zu Steir zu Kerndten zu Crain Marggraue zu Merhern (et)c(etera) zu Lutzenburg in ober und nider Slesien
zu Wirtemberg und Teckh Hertzog Fürst zu Schwaben gefürster Graue zu Habspurg zu Tirol zu Phirdt zu Kiburg und zu Görtz (et)c(etera) Landtgraue in Elsaß Marggraue des heiligen Römischen Reichs zu Bur
gau ober und nider Laußnitz Herr auf der Windischen march zu Portenaw und zu Salins (et)c(etera) Bekhennen offentlich mit disem brieff und thuen khundt allermenigclich das
wir guetlich angesehen wargenomen und bedracht haben die Erberkait redlichait guet Siten Tugent und vernunfft damit unnsere getrewen Leo und Wolffgang seines Brüedern Son die Chamrer
vor unnser berüempt sein Auch die getrewen dienste darzue Sy sich gegen uns und unnserm Haus Osterreich underthenigclich und guetwillig erbieten auch wol thüen mögen und sollen Unnd darumben
mit wolbedachtem müet guetem rat und rechter wissen den genanten Camrern allen Jren Eclichen leibs Erben und derselben Erbens Erben dise hernachgeschriben wappen
und Clainat so mit namen sein ain Schilt uberzwerch in zwen gleich tail abtailt das under rot und obertail weiß oder Silberfarb darinn vorn hindern untern gegn dem
vordern obern Ege fürwertz zum khlün geschickt erscheinend ain Leo nach des Schildts farben abgewechslet mit zu rugg aufgeworffnem Schwantz roter außgeslagner
Zungen haldtend in seinen waffen uber sich zum Straich geschickt ain flaschhackhen auf dem Schildt ain Stechhelm geziert mit roter und weisser oder Silberfarber helm
deckhen darauff von yetzgemelten farben ain gewundtner Bausch mit seinen zu rugg fliegenden pinden darauß zwischen zwayen aufgethanen Adlers flügen deren
yedtweders in der mit uberzwerch abtailt Alls nemlich das unter rot und obertail weiß oder Silberfarb Erscheinend ain vordertail aines Leo gestallt mit roter außge
slagner zungen on die hindern füeß nach der flügen farben abgewechslet haldtend in seinen waffen ain flaschhackhen wie im Schildt Alls dann solch wappen und
Clainat in mitte diß unnsers brieffs gemalt und mit farben aigentlicher aufgestrichen sein von newem gnedigclich verlihen und gegeben Verleihen und geben Jnen
die auch hiemit wissentlich in Crafft ditz brieffs und mainen setzen und wellen das nun fürbaßhin die vorgenanten Leo und Wolffgang seines Brüedern Sün die Camrer
all Jr Eclich leibs Erben und derselben Erbens Erben für und für in Ewig zeit die obgeschriben wappen und Clainat haben füern und sich der in allen und yegclichen Ehr
lichen und redlichen sachen und geschefften Es sey in Streiten Kempffen gestechen Gefechten panner Gezelten aufslagn Jnsigln Petschafftn Clainaten Begrebnussen
und sonst an allen andern orten und enden nach Jren nottürfften willen und wolgefallen gebrauchen und geniessen sollen und mögen von allermenigclich unver
hindert Unnd gebieten darauff allen unnd yegclichen Churfürsten Fürsten Gaistlichen und weltlichen Prelaten Grauen freyen Herrn
Ritter(n) Knechten Haubtleuten Landt marschalhen Vitzthumbn vogtn pflegern verweßern Amptleutn wappen Herolden perseuanten Schultthaissen Burger
maistern Richtern Reten Bürgern Gemainden und sonst allen andern unsern und des hailigen Reichs auch ander unnserer Künigreich Erblichen fürstenthumb
und Lannde underthanen und getrewen in was wirden Standts oder wesens die sein Ernstlich und vestigclich mit disem brieff Unnd mainen setzen und wellen
das Sy die offtgenanten Camrer all Jr Eclich leibs Erben und derselben Erbenserben für und für in Ewig zeit an den obgeschriben wappen und Clainaten nicht hindern noch Jrren sonder Sy der wie obsteet
herueclich gebrauchen und geniessen lassen hierwider nicht thüen noch des yemands anderm zuthüen gestaten in kain weys alls lieb ainem yeden sey unser und des Reichs schwere ungnad unnd Straff
Unnd darzue ain Peen benantlichen zwaintzig Marckh löttigs Golds zuuermeiden die ain yeder soofft Er freuentlich hierwider thäte unns halbn in unser und des Reichs Chamer und den andern halbn tail
den obgenanten Leo und Wolffgangen seines Brüedern Sun den Chamrern und Jren Eclichen leibs Erben obgemelt unnachleslich zubezaln verfallen sein soll Doch andern die villeicht den obgeschriben
Wappen und Clainaten gleich füerten an Jren wappen und rechten unuergriffen und unschädlich Mit urkhundt ditz brieffs besigelt mit unserm Künigclichen anhangundem Jnsigl Gebn
in unser Stat wienn den zwaintzigisten tag des Monats Juny Nach Cristi unsers lieben herrn geburt Fünfftzehenhundert und im Neünunddreissigistn Unnsere Reiche des Römischen im Neün
ten und der andern im Dreitzehenden Jarn
Ferdinand