Gnedige lieben Hern thue mit ewer gnaden gunt habe der
papir mythalben das ich meine kaufleute nicht wol mit
guttem papir kan bewaren noch fordern damit das die
papir muhel gar eingeet, Belangett noch ew(er) g(naden) mein
demutich bitt woltt doch solches gebrechen e(wer) g(naden) amtt ange
zeigenn damit eim armer man gebawett, wo mir aber
nicht gebawett wurde, so kende ich ew(er) g(naden) amtt solchs
gewis nicht wol ausrichten, wie den e(wer) g(naden) selben gesehen
haben die eingehung, Vnd wil mich gentzlichen
zu e(wer) g(naden) versehen eim solches zu den sachen zu wen
denn
Jte(m) zum Ersten stelen eichene trege vnd eichene bloch
darzu, vnd der selbige theile mussen gar sein, vnd
hinder theilen viij theile, vnd der forderer theil
sein auch viij theile, vnd der themer xxij
vnd der strenge auch xxij, vnd iiij eck
vnd das eichen das einblecht eicheltz den rest zu
niderigk gesperrett vnd das dach zuflech ist do
mit eim schaden geschitt durch den regen
Vnd ist mein gantz freuntlich bittenn an ew(er) g(naden) amtt
das ew(er) g(naden) amtt wolde lassen gen zehawe(n) heime(n) furen
iiij ehlen hoch, den es freusett mir alle winter
gar das ich nicht erbethen kan, den holtz vnd theil
sein voldertzu zuberaitenn, so das wasser diesen
somer nicht gebawett wurde so mus ich armer dar
von lassen, den ich kan mich nicht also erhalten
Der burgermeister hatt zu mir gesprochen ich solde
mich erhalten wie ich kende, den der poltz wurde
nicht lange herne bleiben, das hab ich auch gethan
bishieher vnd habe grossen schaden darunder ge
num(en)