Wir Matthias von Gottes gnaden Erwölter Römischer Kaiser
Zu allen zeitten Mehrer des Reichs, in Germanien, zu Hungarn, Behaimb, Dalmatien, Croatien, vnd Sclauonien, rc. König, Ertzhertzog zu Osterreich, Hertzog zu Burgunndt, zu Brabant, zu Steyr, zu Kärnten, zu Crain, zu Lutzen
burg, zu Württemberg, Ober vnd Nider Schlesien, Fürst zu Schwaben, Marggrafe des Hailigen Römischen Reichs, zu Burgaw, zu Mährern, Ober vnd Nider Laußnitz, Gefürster Grafe zu Habspurg, zu Tyrol, zu Pfierdt, zu Kyburg vnd zu Görtz rc. Landgrafe in El
saß, Herr auff der Windischen Marck, zu Portenaw vnd zu Salins, rc. Bekennen offentlich mit disem Brieff, vnd thuen kundt Allermenniglich. Wiewol Wir auß Kayserlicher Höch vnd Würdigkait, darein Vns der Allmechtige Gott, durch sein Göttliche
Gnad gesetzt hatt, vnd angeborner Tugend vnd Güettigkait, Allen vnd jeglichen Vnsern vnd des Heiligen Reichs Vnderthanen, Gnad vnd Güetthat zuerzaigen willig; So ist doch Vnser Kayserlich Gemüeth pillich mehr genaigt, zu denen, die Vnser vnd deß Hailigen Reichs Vorderisten Glie
der sein, vnd neben Vns die Bürdt vnd Sorgfeltigkait deß Heiligen Reichs helffen mittragen, vnd stätte lieb vnd trew beweisen, dieselben mit Vnsern Kayserlichen Gnaden zubegaben. Wann nun in aigne Person für Vns kommen ist, Der Durchleuchtigist, Großmechtig fürst,
Herr Ferdinand, gecrönter König zu Hungarn vnd Behaimb, Ertzhertzog zu Osterreich, Marggrafe zu Mährern, Hertzog zu Lutzenburg, vnd in Schlesien, Marggrafe zu Laußnitz, Grafe zu Tyrol vnd Görtz, Vnser freundlicher lieber Vetter vnnd Sohn. Vnd
hatt Vns mit fleiß angerueffen vnd gepetten, Daß Wir S. L. das Chur fürstenthumb, mit der Chur, vnd dem Ertzschenck Ampt deß Hailigen Römischen Reichs, zu der Cron zu Behaimb gehörig, sampt seinen Marggraffschafften, vnd allen Fürstenthumben, Landen, Mannschaff
ten, Herrschafften, Lehenschaften, Geistlichen vnd Weltlichen, Ämbtern, Vogteywaiden, Gelaitten, Wildtpännen, Waidwercken, Zöllen, Ehen, Rechten vnd Gerechtigkeiten, zu der gemelten Cron zu Behaimb, zu Lehen zuverleihen gnediglich geruheten. Deß haben Wir angesehen
solchs deß gedachten Vnsers Vettern vnd Sohns, Königs Ferdinanden, zu Hungarn vnd Behaimb, redlich vnd vernünfftig pitte, Auch die mercklichen vnd getrewen Dienst, die S. L. Vorfahren, vnd S. L. selbs, Vnsern Vorfahren vnd dem Heiligen Reich, offt williglich vnd vnuerdroßenlich gethan
hatt, vnd S. L. Vns, vnd dem Heiligen Reiche in künfftig zeitt wol thuen mag vnd soll. Vnd haben darumben mit wolbedachtem Mueth, guettem zeittigen Rath, Vnser vnd deß Reichs Churfürsten, auch Vnsere Fürnemben vnd Getrewen Räth, vnd aus rechter wissen auch
Vnserer Kay: Maytt: vollkommenhait, demselben Vnserm Lieben Vettern vnd Sohn, König Ferdinanden, zu Hungarn vnd Behaimb, S. L. Regalia vnd Lehen deß Chur fürstenthumbs, vnd die Chur: deß Ertzschencken Ampts deß Hailigen Reichs, sampt den Marggraffschafften vnd
allen Fürstenthumben, Landen, Mannschafften, Herrschafften, Geistlichen vnd Weltlichen, Ämbtern, Vogteywercken, Gelaitten, Wildtpännen, Waidwercken, Zöllen, Ehen, Rechten, Würden, Zierden, Gerichten, Gericht zwangen, vnd Allen andern Herrligkaiten, Rechten vnd Gerech
tigkeiten, zu der Cron zu Behaimb gehörig, zu Lehen gnediglich geraicht vnd gelihen, Raichen vnd leihen die auch S. L. von Römischer Kayserlicher Macht vollkommenhait, wissentlich, in crafft diß Brieffs, was Wir S. L. von Recht, pillichait vnd gewonhait wegen daran zuverleihen haben
söllen, Daß S. L. die nun hinfüran von Vns vnd dem Heiligen Reiche, in Lehensweiß innhaben, halten, besitzen, nutzen, nießen, vnd geprauchen soll vnd mag, in allermas vnd Recht, alls S. L. Vorfarn Könige zu Behaimb die inngehabt, besessen, genutzt, genoßen, vnd gepraucht haben,
von Allermenniglich vnuerhindert. Der vorgenant Vnser lieber Vetter vnd Sohn, Ferdinand, König zu Hungarn vnd Behaimb, hatt Vns auch darauff gewönlich Glübd vnd Aydt gethan, Vns vnd dem Heiligen Reiche getrew, gehorsamb vnd gewerttig zusein, Vns für seinen
Rechten, Natürlichen Herrn zuhalten, zu dienen vnd zuehren, alls ainem Ertzschencken vnd Chur fürsten deß Heiligen Reichs zuthuen von Recht gepürt. Vnd gepietten darauff Allen vnd jeglichen Marggraffschafften, Hertzogthumben, vnd Königreichs Behaimb, Bischofe
Hertzogen, Prälaten, Grafen, Freyen, Herrn, Rittern vnd Knechten, Mannen, vnd Lehensmannen, der Cron zu Behaimb, Hertzogen, Marggrafen, Landgrafen, Freyen, Herrn, Rittern, vnd Knechten, Stetten, vnd sonst jedermenniglich, Lehensleuthen von der Cron zu Behaimb, auch Hauptleuthenn,
Amptleuthen, Burgermeistern, Richtern, Räthen, Burgern, Ämbten, Gemainden, Vnderthänen vnd Vnterthanen, die Rechtlich zu der Cron Behaimb gehören, in was Würden, Standt oder wesen die sein, von obbestimpter Römischer Kayserlicher Macht Vollkommenhait, Ernstlich vnd vbehiglich mitt
disem Brieff, Daß Sij den gemelten Vnsern Lieben Vettern vnd Sohn, König Ferdinanden zu Hungarn vnd Behaimb, in allen vnd jeglichen Gepotten, Verpottungen, Aufflatzungen, Biethen vnd Geschefften, S. L. vnd deß Königreichs Behaimb, alls Jrem Rechten, Natürlichen Herrn, ohne alle
Jrrung vnd widerred, getrew, gehorsamb, vnd gewerttig sein, vnd Jme deß alles, wie vorgeschriben stehet, berhueblich vnd ohne Jrrung geprauchen vnd genießenn laßen, Alls lieb Jnen allen vnd Jr jedem seye, Vnser vnd deß Reichs schwere Vngnad zuvermeiden, Daran thuen Sij Vnsere
Ernstliche Mainung. Wer aber diß Vnser Kayserlich Gepott freuentlich vberfuhr vnd nicht hielte, Der oder dieselben sollen allsdann aller Jrer Lehen, Freyhaitten, Priuilegien, Rechten vnd Gerechtigkeiten, von weme Sij die hetten, dem gemelten Vnserm Lieben Vettern vnd Sohn
König Ferdinanden, auch darzue in S. L. Straff vnd pueß verfallen sein. Mitt Vrkundt diß Brieffs, besigelt mit Vnserm Kayserlichen anhangenden Jnsigill, Der geben ist in Vnsere Statt Wienn, den Neundten Tag deß Monats February, Nach Christi Vnsers Lieben Herrn
vnd Seeligmachers Gepürth, im Sechzehenhundert vnd Neuntzehenden, Vnserer Reiche deß Römischen im Sibenden, deß Hungarischen im Eilfften, vnd deß Behaimischen im Achten Jaren.
Matthias
Ad mandatum Sac(rae) Cae(sareae)
Majestatis proprium
R(everendissi)mi D(omi)ni Jo(hannis) Suicardi
Cancellarij & Elect(oris) Mog(untini)
Lehenbrieff, vber das Churfürstenthumb vnd Ertzschencken Ampt in Behaimb, für König Ferdinanden.
J. L. Lucker m(anu) p(ropria)