Wir Bolke von gotis gnaden Herczoge von Slesien herre von furstinb(er)g und zu der Swidnicz Globen mit guten truwen
on geuerd fur uns und uns(er) zone ab wir di gewinnet(en) und fur alle di uns gehorsam sint adir di durch uns(er)
will(e)n tun adir lasen dem allirdirluchtigstem fursten und unserm genedigem herren hern Karln Romischem kunge
alle zit mer(er) des Richs und kunge zu Behm(en) und sinen Erben kungen zu Behm(en) das wir mit im und mit
allen iren fursten landen herscheften luten und undirtanen wo di gelegen adir gesessen sint einen ganczen
steten frede haben und halden woll(e)n ein ganczis Jar an zuheben an desem hutigem tage Ouch globen wir
mit guten truwen und on geuerd daz wir des erwirdigen fursten h(er)n pr(e)czlaus Bischofs zu Breslaw unde
siner nachkome(n) des Capitels des stiftis und der kirchen do selbest umb uns(er) selbes urfe der igunt
czwischen im und uns ist und umb di sachen di wir besundirn zu im haben sint werden woll(e)n und si an
grifen wenne wir von dem obgenanten uns(er)m herren deme Romischem kunge und sinen erben kungen zu
Behm(en) des irmanet werden innewennik dem vorbenanten iare und globen mit guten truwen on geuerd das
wir und uns(er) zone ab wir di gewinnet(en) uns mit deme selben Bischofe deme Capitel und allen iren nachko
men und mit deme stift und der vorbenanten kirchen zu Bresl(aw) noch der zit und wir von deme vor
benanten unserm herren deme Romischem kunge und sinen Erben kungen zu Behm(en) irmanet werden nymm(er)
gefreden zunen adir brichten woll(e)n on des obgenanten uns(er)s herren und siner erben kunge zu Behm(en) wort
wissen gunst und will(e)n czu urkund diz brifs den wir vorsegelt haben lasen werden mit uns(er)s wissen Geben
zu der Swidnicz an dem nehesten tage noch uns(er) frowen tak als si zu himmel fuer do man zalte noch gotis ge
burt Driczenhundirt Jar nach in deme funfczigstem Jare