Nouerint vniuersi presentes litteras inspecturi, Quod nos Nicolaus kelner magister consulum, necnon Petrus Grotchener, Sydilinus, Thomas, hanko, wilhelmus, Stephanus, vasaldi, Tydilinus, hoppke, Nicolaus winandi et Conradus
barig Consules Ciuitatis Nysensis affectantes ex animo Serenissimi Principis domini karoli Romanorum Regis semper Augusti et Boemie Regis nobis graciam attinhere et fauorem sperantes ex promocione ipsius nobis Ciuitati ac Terre
Nysensi pacis et tranquillitatis commoda multiplicia prouenire Sibi heredibus aut Successoribus suis boemie Regibus pro nobis et Successoribus nostris de speciali et expresso mandato domini nostri domini Preczlai Episcopi wratislauiensis et consensus Capituli
eiusdem Ecclesie bona et sincera nostra fide promittimus in perpetuum et spondemus, Quod nullum penitus Regem Principem vel potentem extraneum de preter gentem wratislauiensem dyocesim constitutam prefato domino karolo seu ipsius heredibus
et Successoribus Boemie Regibus aut eciam suis Principibus in ipsa wratislauiensi dyocesi suos principatus et dominia habentibus qui sui vasalli existunt ac eciam Ciuitati wratislauiensi et eius annexis ad ipsum Regem et Regnum pertinenti
contrariari seu aduersari volentem in Ciuitatem nostram Nysensem perpetuis temporibus debeamus intromittere seu quomodolibet receptare in preiudicium domini karoli heredum et Successorum eius Regum Boemie et domini Principum vasallorum
suorum et ipsius Ciuitatis wratislauiensis dispendium, nec eisdem extraneis Regibus Principibus et potentibus cuiuscumque condicionis seu status existant, aduersus dictum dominum karolum heredes et Successores suos Boemie Reges necnon
Principes vasallos ipsius ac eciam Ciuitatem wratislauiensem prebere Consilium, auxilium vel fauorem, Eo saluo dumtaxat et excepto, si Rex Boemie qui pro tempore fuerit dominos nostros Episcopos qui pro tempore fuerint Capitulum vel Clerum
ipsius et ipsorum bona quod absit forsan publice inpugnaret, tunc nos dictos dominos nostros Episcopos Capitulum ac Clerum ipsius adiuuare tenebimur et eis tamquam dominis nostris hereditariis assistere modis omnibus et pro posse, Et si aliquis seu
aliqui Principum vasallorum in dyocesi wratislauiensi existencium vel ipsa Ciuitas wratislauiensis ipsos dominos nostros Episcopos Capitulum uel clerum ipsius molestare vel ipsis guerram mouere et gerere in negociis et causis propriis conarentur, tunc dominis
nostris predictis toto nostro posse similiter assistemus, Et nichilominus Rex Boemie qui pro tempore fuerit super eo per dictos dominos nostros Episcopos vel Capitulum requisitus mandare tenebitur suis Principibus vasallis ac Ciuitati wratislauiensi
guerram Ecclesie wratislauiensi mouere volentibus seu mouentibus, vt ab inpeticione huiusmodi quiescant omnimode donec inter partes ipsas decernatur iusticia, Et si principes ipsi vel Ciuitas wratislauiensis iusticiam noluerint preter eam
operare ipse Rex Boemie dominos nostros Episcopos Capitulum Ecclesiam wratislauiensem nos Ciuitatem et Terram Nysensem in Iuribus suis tenebitur adiuuare, Sopitis vero et complanatis inpugnacionibus et aduersitatibus huiusmodi inter Regem
Boemie seu Principes vasallos suos ac ipsam wratislauiensem Ciuitatem ex vna et dominos nostros Episcopos qui pro tempore fuerint et Capitulum parte ex altera quociens id acciderit semper supradicto domino karolo necnon heredibus et Successoribus
suis Regibus Boemie ad predictum modum promissionis obseruanciam perpetuo volumus temporibus obligari, In cuius rei testimonium Sigillum Ciuitatis nostre presentibus est appensum, Nos quoque Preczlaus dei gracia wratislauiensis
Ecclesie Episcopus vna cum Capitulo supradicto similiter sperantes et tenentes indubie ex predicti domini karoli et heredum ac Successorum eius Regum Boemie promocione gracia et fauore nos Ecclesiam nostram ac singulares personas
eiusdem ipsamque Terram Nysensem continuis pacis et quietis proficere incrementis presentes litteras per dictos domino nostro karolo heredibus quoque et Successoribus suis boemie Regibus nos mandasse dari recognoscimus et in testimonium
huius Sigillum nostrum et dicti Capituli nostri presentibus apponi iussimus seu appendi, Datum Nysze Anno domini Millesimo Trecentesimo Quinquagesimo Primo In die Omnium Sanctorum