Wir Bolke von gots gnaden herczog czu Slezien herre von furstinberg czu der Swydnicz vnd czu dem Jawr Bekennen vnd tun kunt offenlich mit disem briue allen den die in sehent oder horen lesen Daz wir
haben angeschen die sunderliche genade vnd fruntliche gunst dez allirdurchluchtigsten fursten vnd herren hern karls Romischen kungs czu allen czeiten merer dez Rychs vnd kung czu Behem vnsirs liebin gene
digin herrn die er vns vnd vnsim geslechte bewyset hat mit der hotschaft die geschehin ist czwischen im an einem teil vnd der durchluchtigsten furstinne vrowen Annan der Romischen kuniginne vnd
kuniginne czu Behem vnsir liben vrowen vnd mumen ettewenne herczogen heynrichs vnsirs brudir tochtir an dem andir teil darumb geben machen vnd vorscribin wir der obgen(anten) vnsir vrowen vnd mu
men der eynin kuniginne czu Behem vnd ires leibis erbin die sie mit dem obgen(anten) herren dem kunge habin wirdet vnsir herczogtum furstintum vnd herschaft czu der Swidnicz vnd czu dem Jawr
mit den steten Swidnicz Stregon hayn landishut Rychinbach Nymycz Jawr lewmberg hirsberg Bunczelaw vnd czoboten mit den vesten vnd merkten Greiffenstein Sraffenberg len Schonow Klic
dorf Hornsberg kinsberg mit allen mannen manscheften lehen lehenscheften verlehnten guten gerichten czollen munczen czinsen gulden silbren steyngruben kirchenlehen pfrunden vnd gotshuse
welden puschen pergen slichten wazzern wazzirleuffen mulen teichen weiden geiegde vogelweide rechten nuczen gewonheiten vnd allen czugehorungin wy ma die benennen mag mit sunderlichen worten
nihtesniht vszgenomen in aller der mazze als wir si nu haben vnd hernach mit rechte czu vns brengen mochten In sulchir bescheidenheit sei daz sache daz wir von gots vorhenknisse also vorscheiden
daz wir eliche leibes erbin mannes geslechte hindir vns nicht lazen daz denne die obgen(ante) vnsir genedige vrowe vnd libe mume vnd ires libes erbin die sie mit vnsim herrn dem kunge habin wirt als dauor
geschribin stet dieselben vnsir herczogtum furstum furstentum herschefte lant lute vnd alle andire czugehorungen als do vor begriffen ist erben vnd besiczen sol genczlich vngehindirt vnd domite tun
vnd lazen nach irem willekur als mit irem rechten erbe vnschedlich doch der hochgeborne furstinne vrowe Agnesen vnsir elichin wirtinne in irem leigedinge wanne sie alle die obgen(anten) fursten
tume lant vnd herschefte mit allen nuczen haben vnd besiczen sol nur czu irem lebetag Wer abir daz wir mit genadin gots eliche leibis erbin mannes geslechte gewunen So sullin die selbin vnsir
erbin der obgen(anten) vnsir vrowen vnd mumen odir ires libes erbin ob sie nicht were Czehentusent schok grozzir pfennige pragschir muncze mit gereitem gelde entrichten vnd beczalen odir die vesten
lemberg vnd Bunczelaw mit vnschedlichin vesten rechten nuczen vnd czu gehorunge czu rechtem pfande seczen Als lange vncz daz sie die obgen(anten) Czehentusent schok genczlich bereiten vnd becza
len vnd domite sullin denne die selbin vnsir erbin bei den obgen(anten) vnsirn herscheften furstetumen vnd landen vngehindirt bleiben Wer auch daz wir eliche leibis erbin mannes geslechte nicht
hetten vnd doch tochtir liezzen so sullen die obgen(anten) vnsir libe genedig vrowe odir ires leibis erbin die sie mit vnsim herren dem kunge gewinnet iglicher vnsir tochtir Czehentusent schog
grozir pfennige geben vnd sie bestaten nach rechter gewonheit als geborn furstin kunden Ouch habin wir gelobt vnd getedingt sei daz sache daz obgen(ante) vnsir eliche wirtinne vnsirn tot gelebit
daz sie denne nach der czeit vnsirs todis keine burggrauen pfleger odir amptman vf vesten husin in steten odir in landin vorsiczen enderen odir wechsiln sol Es sei danne daz sei eynen bidirman der
do gleich gut vnd gewisz sey dem ersten an sein stat seczze an dem der obgen(anten) vnsir vrowen odir iren erbin muge billichin genugen vnd daz der selbe czuuor sich aller gelubde eyde vnd briuen vorbunden habe
der obgen(anten) vnsir vrowen der kuniginne odir iren erbin gleich seinen vornarn an der stat her geseczet wirdit Wer auch daz die obgen(ante) vnsir genedige vrowe vnd liebe mume wartende dez obgen(anten) aneualles ee
wanne sie in gewere keme also sturbe daz sie libes erbin mit dem obgen(anten) vnsirn herren nicht gewunne So sullen alle man Ritt(er) knechte Burggrauen burg(er) vnd alle lantsessen alle der obgen(anten) eide
vnd gelubde ledig sein doch in sulchir bescheidenheit daz dem obgen(anten) vnsirn herren dem kunge vnd seine erbin daz obgen(ante) czgelt vnde heymstewir der obgen(anten) Czehentusent schok geuallen sol odir mit pfan
din gesichert wden in allir der mazze als do vor begriffen ist daz sie domite tun vnd lazzen nach irem willekur vnd daz gebin weme sie wollen Wer ouch daz die obgen(ante) vnsir vrowe vnd mume den obgen(anten)
vnsirn herren den kunig obirlebet vnd eyne andirn man neme an vnsirn rat vnd willin So sullen beide sie der man vnd alle kint die sie mit im gewinnet in dem obgen(anten) vnsirn furstetumen vnd her
scheften nichtes haben Ouch ist geredit vnd geteidinget daz die obg(enante) vnsir vrowe die kuniginne vnd vnsir libe mume noch yemant von iren wegen vns vnd vnsir erbin mannes geslechte vmb ehen
lei erbtel odir vmb kein andir sachen anreden odir ansprechin sullen andirs wenne dauor geschribin ist Ouch meine vnd wellen wir sey daz sache daz vns erhaftige not anroret vnsir vmb genankumze
kriege odir andir geschichte vnsir odir vnsir manne ere vnd libe anlosen daz wir denne derselben vnsir furstentume lant vnd lute gewaltig sein zecun vnd zelazen doch in guten ewen an geuide dor
nach sintemal daz vns der obgen(ante) vnsir genedig herre mit sulichin seinen genaden guntlich vnd fruntlich begriffin hat So gelobin vnd wollen wir im mit gutin ewen an geuide begestendig vnd
geholfen sein wedir allirmenglich nymande vszgenomen vnd in nimmir hindirweggen lazzen mit libe noch mit gute vnd alle seine veinde sullen vnsir veinde sein vnd meine vnd wellin auch keine veinde
wedirsach odir vinde Cristin Juden odir heyden in vnsir landen hausen houen haldin odir vorteidingin sundir wir gunnen im vnd seinen amptluten daz sie dieselbin angreiffen vnd nidirleczen sullin vnd
mugen wo sie der bekomen in allen vnsir herscheften vnd landen czu vrkunde dez briues vorsigilt mit vnsim grozzum Insegil Der gebin ist czu der Swydnicz an der nesten mitwochen nach
sant petirs vnd pauls tage der heiligin czwelfbotin nach Cristus geburte Druczenhundirt Jare vnd in dem dreyvndfunfczigistem Jare