Wir Rudolf von gotes gnadn Herzog ze Sachſen des heiligen Romiſchen Reichs obriſten Marſchalk vnd Rudolf ſein elter Sun veriehen vnd tun kunt mit diſem gegenwrtigen briue
allen den die in ſehent adr horent leſen das der aller durchlewchtigſte furſte vnd herre her Karl von gotes gnadn Romiſcher keiſer ze alln zeiten merer des Reichs vnd kunig ze Beheim
vnſer lieber gnadiger herre durch ſunderliche gnade liebe vnd fruntſchaft die er von angeborner gute ze vns vnd ze vnſrn erbn gnediglich treit vnd hat vnd auch durch ge
trewe dienſte vnd ſtate hulfe die im vnd dem heiligen Reiche der edle Johans Burggraue von Meidburg vnd Graff ze Retz manigfaldiclich vormaln getan hat vnd noch wol getun
mag vnd ſal in kunftigen zeiten das hat geordent vnd iſt mit ſeim rate vnd durch ſein gebot dar gegangen das wir der obgen(anten) Rudolf herzog ze Sachſen vnſir tochter vnd
wir Rudolf ſein elter Sun vnſir Sweſter Junkfrow lene dem egen(anten) Burggraue Johans von Meidburg vnd Grafen ze Retz ze der ee vnd ze einer elichn wirtinne gebn ſulln vnd wolln
vnd wir ſulln wolln vnd gelobn auch das Burggraueampt ze Meidburg mit alln zugehorungen ausgenomen vnſer gerihte ze halle mit der obgen(anten) Junkfrowen lenen dem egen(anten)
Burggraue Johans gebn vnd wenne ſie zeſampne gelegt werdn darnach in den nehſtn vier wochn dem egen(anten) Burggraue Johans vnd ſeiner wirtinne deſſelbn Burggraueamptes abtretn
vnuerzogenlich vnd noch der zeit ſulln vnd wolln wir vns verzeihn dar vff alles rechten das wir adr vnſir erbn vnd nochkome herzogen ze Sachſen darzu gehabn mochten in dheinen
weis So in gagen gabe der obgen(ante) vnſir herre der keiſer dritauſent ſchock grozzer pfenninge prager munze der vns der obgen(ante) vnſir herre der keiſer zweihundert ſchock geteit gebn hat
vnd achthundert ſchock vff ſant Martins tag der nu ſchireſt kunftig wirt hat gelobt zebegaln vnuerzogenlich vnd zegebn vnd vor die obrigen zweitauſent ſchock hat er vns geſatzt
beweiset vnd beſcheiden zweihundert ſchock Jerger gult ze Budiſſin anderhalbhundert ſchock vnd ze Gorlitz funfzig ſchock die wir ane hindernizze vnd an alles verziehn allerjerli
clich empfahn vnd nemen ſulln von den Burgern der obgen(anten) Stete das halbteil vff ſant Galln tag vnd das ander halbteil vff ſant Walpurg tag alſo lange vnz er die obgen(anten) zwei
tauſent ſchock mit gereiten pfenningen vns begalet adr die Burger der obgen(anten) ſtate mit den egen(anten) zweitauſent ſchockn die obgen(anten) zweihundert ſchock Jerger gulte ſelber abgelozen vnd
wenn der obgen(ante) vnſer herre der keiſer adr ſeine erbn vnd nochkomen kunge ze Beheim die obgen(anten) zweihundert ſchock Jerger gulte mit zweitauſent ſchockn geritſchaft abgelozen
adr ſich die ſtate ſelber abloſen als deuor geſchribn iſt So ſulln wir vnd vnſir erbn dem egen(anten) Burggraue Johans vmb das ſelbe gelt eine veſtn kowfin mit gulte vnd nutzen So das
ſelbe gelt allernutzſt geratn mag vnd das ſal geſchehn mit rate des obgen(anten) vnſirs herrn des keiſirs adr ſeiner erbn vnd nochkomen kunge ze Beheim vnd die ſelbe veſte vnd
gulte vnd was man mit dem obgen(anten) gelte gekowfen mag ſal der obgen(anten) Junkfrowen lenen leipgedinge ſein verſchid abr der obgen(ante) Burggraue Johans alſo das er nicht kinder lieſe
ſo ſal die pfantſchaft vnd das gelt wo es hin gelegt vnd gewendet wirt der Junkfrowen leipgedinge ſein vnd noch irem tode ſal es an den obgen(anten) vnſrn herrn der keiſer ſein erben
vnd nochkomen kunge ze Beheim an alles hindernizze widervalln vnd wir vnd vnſir erbn ſulln auch vmb das Burggraueampt ze Meidburg wider in vnſir rechte trettn geleich als
vor vnd vngehindert Auch ſal der egen(ante) vnſir herre der keiſer ſeine erbn vnd nochkomen kunge ze Beheim vns vnd vnſir erbn bei rechte vnd gnadn lazzen belibn vnd
behalden in den egen(anten) pfantſchaftn als vor geſchribn ſtet Mit vrkund ditz briues verſiglt mit vnſrn Inſigeln Der gebn iſt ze prage noch Criſts geburt dreizehnhundert Jar vnd
darnach in dem funf vnd funfzigſtn Jar an ſant Michahels tag