Wir Ruprecht der elter von gotes gnaden pfallenzgraf by Rein des heiligen Römischen Riches oberster Truchsäze und Herzog in Beyrn
Bekennen und tůn kunt offenlich mit disem brief allen den die in sehent oder hörent lesen. Daz der edelman her
Johans Lantgraf zu dem Luchtenberg von seinen und her Ulriche seins bruder wegen chomen ist in unser und
aller ander geistlicher und werntlicher chürfürsten gegenburticheit und hat bekennet mit gutem willen von
sein und her Ulriche seins bruder er und ir beder erben ir slosser plem=
stein und Reichenstein und waz dar zu gehöre dem aller durchleuchtigsten fürsten und herren her Karl Römischem
keyser ze allen zeiten merer des Riches und künig ze Beheim unserm lieben gnedigem herren als einem künig zu Be
heim seinen erben und nachkomen künig zu Beheim und der kron des selben künigrichs zu Beheim recht und re=
dlich ufgelazen haben und die von dem obgenanten unserm herren dem keyser als von einem künig ze Beheim
und der kron des selben künigrichs zu ewigen erblichen lehen empfangen haben. Und dar nach bekennen wir ouch
daz der erwirdig vater in got her Boemunt erzbischof zu Trier des heyligen Riches erzkantzler durch welhschen
lande und des künigrichs ze Arlat in unser und aller ander chürfürsten gegenburticheit als do vor begriffen ist
den egnanten Lantgraven Johans der do ze gegen waz für sich her Ulriche seinen bruder und ir beder erben ledig und los ge
sagt hat aller huldung eide und gelübd der si im und dem stift zu Trier verpunden waren von wegen irs slosses
ze Tärberch daz von dem egnanten stift zu Trier lehen was wann selig gedechtnüzz her Baldewein etwenn erzbisch
of zu Trier sein vorder die selben manschaft her kauffet hat mit dem künigrich von Beheim umb ander lehen
und manschaft der die kirchen zu Trier noch hiut in gewer ist. Dar nach so hat der egnant Lantgraf Johans für sich
her Ulriche seinen bruder und ir beder erben daz egnant haus ze Tärberch mit den nachgeschriben steten und dörffen
Ekkentat. Lezendorf. Pteschendorf. Drosthenreut. Geilsdorf. Päumstutel. Puochlins. und den hof ze Pring. den hof ze Swaig
gäng. die vischerey by stankwätzer. mit wisen welden eckern grän und ungärn und mit allen andern dingen die zu dem
egnanten haus zu Tärberch gehörent dem egnanten unserm herren dem keyser als einem künig ze Beheim seinen erben
und nachkomen künigen ze Beheim und der kronen des selben künigrichs ouch unbetwungen mit gutem willen recht und re=
dlich ufgelazen und die von im zu rechten erblichen lehen empfangen und hat im für sich her Ulriche seinen bruder und ir
beder erben gehuldet gelobt und gesworn daz si im als einem künig von Beheim seinen erben und nachkomen kün=
igen ze Beheim und der kron des selben künigrichs getriwe gehorsam und undertänig sein wellen und sullen und allez
daz tůn in trewen daz man tůn inen rechten lehenherren getriwlich schuldig seint und ouch in aller der weise als si sölche
huldung getän habent in den zeiten do si die obgenanten ir slosser plemstein und Reichenstein von einem künigrich
ze Beheim empfiengen. Und des zu urkund zu ewigem gedechtnüzze sind zu gezeuge geben wir disen brief versigelt
mit unserm Ingesigel. Der gebn ist zu Nürmberg. Nach christi geburt driuzehnhundert jar dar nach in dem sehs
und funfzigstem jar des nächsten tags vor dem heiligen obersten tag.