Wir Ludwig genant der Romer von gots gnaden Marggraue zu Brandemburg des heiligen Romischen Ruchs Oberster Camerer vnd Herczog zu Beyren Bekennen vnd tun kunt offenlich mit
disem briefe allen den die in sehen oder horen lesen Wanne fride vnd gemach an der fursten hilffe maist bestan mag vnd offtmal destenmmer frides vnd ouch gnaden ist so die hochge
bornen fursten des heiligen Ruchs vnd bynamen die an den die kur vnd die macht liget ein houpt der Cristenheit zekiesen in iren herscheften eren vnd rechten gehindert vnd ge
sammet werden dauon ist notdurftig zu trost vnd zu gnaden der gemeinen Cristenheit daz man den fursten ire recht an alles immermuze in semer gancze behalte dauon wie wol
daz sey daz vmb die recht des durchleuchtigen fursten vnd h(er)ren des hochgeborn kunges zu Beheim vnsirs aytkurfursten kemerley zweifel nie gewesen sey vnd ouch noch nicht sey
noch gesein muge in dheineweis wann er von seinen vrenen anen vatern vnd vorfarn geleich vns vnd allen andern vns(er)n aytkurfursten Geistlichen vnd Werntlichen in der wale vnd
kure eines Romischen kunges eines kunftigen keisers vollenkumenes recht gehabt hat vnd ouch noch hat als deselben dink wol louterlichen lanchundig vnd offenbar sind von sulchen
alten langen zeiten die by der leute gedechtnuzze ieczunt nicht gesein mugen durch langes alters willen doch seint dem mal daz etliche kinder der vinsternuzze die mit blinden ouge
von der gotlichen warheit also geirret seint daz sie in der clarheit des inniczes tages geleich als in den nechten vnd betrubnuzzen vnd stricke machen vngerechtekait vnd ouch
der sunde von eim teufelisches neydes vnd mugen die binde der warheit nicht getragen durch den list irer lugen vnd domit so vallen sie in die betrubnuzze die sie gemachet hatten
vnd vernewen sich in die stricke irer vngewanten meynunge also daz sie daz liecht ein vinsternuzze vnd die vinsternuzze ein liecht ansehenden So meinen wir durch merer sicherhait vnd
uf die rede daz der egenant durchleuchtig furste vnd h(er)re der kung zu Beheim sein erben vnd Nachkomen kunge zu Beheim ewiclichen mit sicherhait gewaret werden vnd daz
ouch absey alles zweyfels engerunge vnd daz muzzige claffern luge irre bosheit vnd lugen nicht gelauben werden vnd dauon mit wolbedachtem mut nicht von irrsal oder vnb(e)
dechteklichen sunder von rechter vnderweisunge die wir warhafticlichen wol ervinden haben mit sampt allen andern vns(er)n aytkurfursten Geistlichen vnd Werntlichen So erkennen
wir vns vnd sprechn mit rechter wizzen vnd kundigen daz offembar allermenglichen daz die durchleuchtigen fursten die hochgeborn kunge von Beheim von iren vrenen anen
vatern eltern vnd vorfarn von sulcher langer zeit der gedechtnuzze by den leuten ieczunt nicht gesein mag durch langes alters willen allewege gehabt haben vnd noch haben
vnd ouch steticlichen haben sullen vollenkumenliches recht vnd ouch stimme genczlich gelich vns vnd andn vns(er)n aytkurfursten Geistlichen vnd Werntlichen in der wale vnd
kure eines Romischen kunges eines kunftigen keisers also wenn vnd als oft es zu sulchen schulden kumet daz man kiesen sol daz man denne den durchleuchtigen fursten den
den hochgeborn h(er)ren den kung zu Beheim der in zeiten wirdet zu derselben kur erniglichen ruffen sol vnd der sol denne in der kur vnd wal als douor begriffen ist alle seine
recht stat vnd stimme vnd alle andere ding die dorzu gehoren genczlichen haben vnd sich der frowen vnd geniczen der von seinen wegen seine boten die er dorzu sendet
geleich vns vnd allen andern vns(er)n aytkurfursten Geistlichen vnd Werntlichen die nu sind oder in kunftigen zeiten w(er)dent mit allen wirden vnd eren als durch recht
vnd gewonheit des heiligen Ruchs sulche recht stimme vnd kure besezzen haben in vergangen zeiten Ouch sprechn bekennen vnd kundigen wir mit rechte wizzen als
douor begriffen ist daz der egenant durchleuchtige furste der hochgeborn h(er)re der kung von Beheim der nu ist oder in zeiten wirdet des heiligen Romischen Ruchs ob(er)st(er)
schenke ist vnd daz er daz ob(er)ste schenkampt fur einem keiser oder fur einem Romischen kunge in ewigen lofen in kunglich(er) crone nicht schuldig ist ze tun es sey
denne daz er dazselbe tun wolle mit seinem guten willen doch mag derselbe kung zu Beheim in gegenwirtikait der keiser vnd der Romischen kunge in sulchen ewigen
hofen gecronet siczen stan vnd gen nach seiner willekur als dieselben fursten von hochgeborn kungen zu Beheim vnd von iren eltern vnd vorfarn mit loblicher gewon
heit von alter herkomen ist czur vrkunde dicz briefs vsigelt mit vns(er)m Insigel der geben ist zu Nurenberg Nach Christs geburt druzenhund(er)t jar vnd in dem Sechs vnd funfczig
istem Jar an dem nechsten Suntag vor sanct Lucien tag der heiligen Juncfrowen