Wir karl von gots genaden Romischer keyser zu allen zeiten merer des Reichs vnd kung zu Beheim Bekennen vnd tun kunt offenlich mit dysem brief allen den
die in sehent oder horent lesen Das vor vns vnd in vnser gegenwertikeit die hochgeborn Wenczlaw vnd Ludwig herczogen zu Brieg vnd zu Lignicz vnser
lieben oheim vnd fursten vmb alle auflauf zweyunge vnd kriege die czwisschen in beyderseit entstanden warn vnd geweret habn bis vf dysen heutigen tag
gar vnd genczlich liplich vnd freuntlich versunet sein vnd vnderet In der maze als hernach geschriben stet des ersten das sie alle ire briue die sie vnd ire
man vnd ouch ire burger beyderseit gegen einander gebn haben alle ire lebtage gar vnd genczlich vnd an alle widerred vnd ouch an alles geuerde vnd argelist
halden sullen In aller der weise als dieselben briue mit worten sein begriffen vnd geschriben Ouch sol der obgen(ant) herczog Wenczlaw herczogen Ludwig seime bru
der vmb dyese nachgeschribnen dorfer Krycheyn das grozzer vnd das mynner pezendorf vnd Ossel dar vf er kein manschaft hat Vnd ouch vmb Schonburg
Buchwald Benewicz vnd Schildern dar vf er nicht anders wenn nur die manschaft hat nymmer ansprechen noch gemanen in kunftigen zeiten die zu
seiner herschaften ewiclich gehoren sullen Außgenomen allein der manschaft der obgen(ant) vier dorfer Ouch sol herczog Wenczlaw habn sol als vorgeschriben stet So
sol ouch herczog Ludwig der obgen(ant) seime bruder herczogen Wenczlaw nymer me ansprechen vmb die manschaft zu dem Namslaw vnd alles das darczu
gehoret Vnd ouch sunderlich sullen alle ire beyder man vnd diener die von ires krieges wegen in vngnade oder in verdacht sint gewesen oder in ire vnhuld
veruallen vnd komen warn die hulde von in beyden an argelist widerhabn Vnd ab yemand in dysen krieges zeiten seines gutes entweret were dem sol man das alles
vnuerzogenlich widergebn Vnd sunderlichen sol Wylrich von Wangenteyn herczogen Wenczlawes hulde widerhabn Vnd er sol im ouch alle sein gut des er
entweret ist vnuerzogenlich widergebn vnd ouch heizen widergebn Ouch sol dyese obgen(ant) sune vnd vertheidigung dem vorgen(ant) herczoge Wenczlaw vnsched
lich sein an seiner herschaft vnd sol ouch dem egen(ant) herczoge Ludwig vnschedlich sein an seiner herschaft vnd an allen seinen briuen die weil sie beyde lebn
ane argelist vnd geuerde czur vrkund dicz briues versigelt mit vnserm keyserlichen Jnsigel Der gebn ist zu Prage Nach cristus geburt dreiczenhundert Jar
darnach in dem Siben vnd funfczigstem Jar des Nehesten donerstages vor sant Gallen tag vnsers reichs in dem Czwelften Jar vnd des keysertumes in dem
dritten :

p(er) d(omi)n(u)m Imp(er)atorem

Joh(ann)es de s(u)lecz