Wir Wenczlaw von gotis gnaden der erste herczoge in Slesien vnd h(er)re zu Lignicz vnd wir Ludwig von der selbe(n) gotis gnaden h(er)czog in Slesien vnd h(er)re zu lignicz zum brige vnd zu lubyn Bekenne(n)
offenlich vnd tun ku(n)t allen den die disen bryff sehen odir horen lesen das wir von geheise vnd Rate des Allerdurchluchtigisten fursten vnd h(er)re(n) h(er)n karlo Romysche(n) keisirs zu allen ziten
merer des Richs vnd ku(n)nges zu beheim vnsis liebn(n) gnedige(n) h(er)ren mit einandir berichtet vnd gesunet sein in aller wise als her nach geschriben stet daz wir alle sache vnd alle kriege vnd
bruche die zwishen vns gewest sint von beginni(n)ge bis an disen hutigen tag nichtis vssgenomen gancz vnd gar haben gesaczt zu den Erwirdigen in got h(er)rn h(er)n preczlaw Bisschoue zu Breczla
vnd zu dem hochgeborn fursten herczog Conrat h(er)ren zu der Oelsn vnseme Vettern also daz sie nach vnß beidir rede bewisunge vnd wissende alle sache die zwishen vns gewest sin
bis her war an die wern odir wie man sie genennen mochte mit sunderliche(n) worten gancze macht vnd gewalt haben sullen vns zu entscheide(n) vnd zu richten nach myne odir nach recht wie sie des
zu rate werde(n) nach yren gewissen Vnd die entscheidung sulle(n) sie tun zwishen hie vnd sente Johans tag des teufers der nehist zuku(n)ftig ist vnd allis des sie vns entscheide(n) heisen vnd spreche(n)
es sei groz odir klein vil odir wenig daz globen wir vor vns vnd vor vnß erben gancz vnd stete bei vnsin furstliche(n) vnd guten truwen vnd an eidis stat zu halden vnd zu tu(n) ane alle arge
list vnd geuerde vnd sullen dar widir nicht reden in dheine weis vnd ob wir nicht hilde(n) wes vns die vorgen(anten) zwene h(er)ren entscheide(n) das got nicht enwolle so globen wir in gute(n) truwen als vor das
wir yn sulle(n) riten in die Stat zu dem Nuwenmarckte vnd do ynne ein rechte(n) inlegir halden als lange bis wir gehalden allis daz des sie vns entscheide(n) vnd geheisen haben vnd dasselbe
inlegir sal vns nichtis tu(n) der mase hilde Ouch vorbinde(n) wir vns vnd verloben vns des welchir vndir vns mase hilde die entscheidung als vor beschriben stet das den der egen(ante) Bisschof von Brez
sla sal vnd mag Bannen vnd mit dem banne dar zu twingen vnd triben ane alle verhechnisse vnd widirrede als lange bis das er geheldet allis das das sie entscheide(n) vnd geheisen haben Ouch
vor wilkore(n) wir vns das vns der egen(ante) vnsir h(er)re der keisir dar zu twingen sal vnd vff vns helfe(n) mit siner keisirlicher gewalt vnd macht ane alle teding daz wir die berichtung vnd entschei
dunge stet vnd gancz halden ane alle argelist vnd ob der egen(ante) Bisschof von Breczla von todis wege(n) abginge bin(nen) der zeit als vor geschriben stet das got nicht enwolle so haben wir gekorn vnsin
vetter herczogen Bolken von der Swidnicz der sal gancze macht haben dise vorgen(ante) berichtung vnd entscheidung zu volfuren vnd zu enden als vor geschriben stet ane alle argelist Vnd wer
daz sache das wir herczog Wenczlaw abgingen binne(n) der vorgen(anten) zeit von todis wegen des got nicht enwolle so kiese(n) wir herczog ludwig vnd haben gekorn vnsin egen(anten) h(er)ren den keisir vnd vnsin
Swager herczog p(re)mken h(er)ren von tesching beide mit gesamptir hant vnsin kindirn vnd vnsin erben zu rechten vormunden dise vorgeschriben rede vnd sache zu volfuren vnd dar vmb
zu manen von vnsir wegen vnd ouch vns(er) erben glicher weis als wir selber vnd die entscheidung sal man glicher weis gegin den kinden vnd gegin den vormunden tu(n) als ob wir lebten vnd
die sullen vnd mogen manen dor vmb glicher weis als ob wir lebten Wer ouch sache das wir herczog ludwig binnen der egen(anten) zeit von todis wegen abe gingen so kisen wir vnd haben gekorn vnsin
kindirn vnd erben zu vormunden vnsin egen(anten) h(er)re(n) den keisir vnd vnsin Swager herczoge heinrich h(er)ren zu Glogaw vnd zu dem Sagan beide mit gesamptir hant zu manen vnd zu tun
vor vnß kindir vnd erben in aller wise als vor begriffen ist von den vormunden die vnß brudir herczog Wenczlaw hat gesaczt Vnd allis das die vorgen(anten) h(er)rn der Bisschoff von Breczla vnd herczog Con
rat entscheide(n) vnd berichte(n) do mogen sie vnd solle(n) ir(e) briue vber geben ob(e) die entscheidung onß einer mehir enhilde das der ander dor vmb gemant mochte(n) mit yre(n) briue(n) Alle dise egen(anten)
sache vnd ir iecliche besundir han wir beide herczog Wenczla(w) vnd herczog ludwig vor vns vnd vor vnß erben bei vnsin furstlichen truwen vnd eren vnd an eidis stat vnsim vorgen(anten) h(er)re(n) dem keisir
vnd ouch den obgen(anten) Bisschof zu Breczla vnd herczog Conrade gelobet stete vnd feste vnuerbrochelich zu halden vnd dor widir nicht zu tu(n) in dheineweis Mit vrku(n)t dicz briues versigelt mit
vnsir beidir Ingesigeln Geben zu prige nach gotis geburte Druczenhundirt Jar vnd dar nach in dem Achte vnd funfczigsten Jare an dem Sontag als man in der heilige(n) kirche(n) singet Vocem Jocu(n)ditatis
p(er) d(omi)n(u)m Canc(ellarium)
Eud(o)