Ich Hainr(ich) Grozz Schultheizz. Vnd wir .. die Schepffen der Stat ze Nurnberch. Tůn offenlichn
mit disem brif daz der veste ritt(er) her Hainreich von Wildenstain veriehn vnd bechant hat ze Nurnb(er)g
in offem g(er)iht daz in der erberg(e) vnd weise her Witicho lantschreiber in Beyern beriht vn(d) bezalt
habe funf tawsent schok vnd ahtzig schok Behaimischer grozzen von d(er) allerdurchleuchtigsten
fursten wegn vns(er)s genedigen herren .. h(er)n Karls d(es) Romischen kaysers vnd kunges ze Behaim
dey er in bezalt habe vmb die vesten ze dem Rotenberg Als ain kunig zu Behaim. Vnd d(er)selbe
her Hainr(ich) von Wildenstain sagt auch fur sich vnd alle sein Erbn den vrgenanten vns(er)n genedign
herren .. den Romischn kayser. als ainen kunig von Behaim darzu alle sein Erbn vnd .. Nachkume(n)
darumbe ledig vnd loz also daz derselbe her Hainr(ich) von Wildenstain vnd sein Erbn dehain vordung
noch ansprach darumb nimmer gehabn noch gewinne(n) sulln furbaz ewiglichn genzlich on geuerde
Mit vrkunde diz brifes d(er) mit vrtail gebn ist versigelt mit vnsers gerihtz anhangendem In=
sigel. des sein zeug. die ersame(n) mann Vlrich Stromair h(er)n Conrads sun. Berhtolt Tuch(er) vn(d) Berh=
tolt Pfinzing sein pruder. Hainr(ich) Gewder vnd Seiz holtzschuher. der brif ist gebn an dem
Samztage nach dem heilign ostertage Nach gotes gepurt dreuzehenhund(er)t Iar Vnd in
dem Sehtzigstem Iar