Wir Rudolff von gotes gnaden Herczog von Sachssen des heiligen reichs obirster marschalk Bekennen vnd tun kunt offenlich mit disem briefe allen den die yn sehent oder horent lesen Wann der Allerdurchlauchtigste furste vnd herre her Karl romisch(er) keis(er) zu allen
zeiten mer(er) des Reichs vnd kunig zu Beheim vnser lieber genedig(er) herre durch liebe vnd begir die er zu dem heiligen reiche vnd zu dem kunigreiche zu Beheim treit mit stetigem fleyze durch ir beider frumen vnd nucz den wechsil hat getan der arnach geschriben ist vnd hat den
selben gestetigt vnd bestetigt mit sinen keis(er)lichen briefen die von worte zu worte lautent als hernach geschriben stet Wir Karl von gotes gnaden romisch(er) keis(er) zu allen zeiten mer(er) des Reichs vnd kunig zu Beheim Bekenn(en) vnd tun kunt offenlich mit disem briefe allen den die yn sehent oder
horent lesen Wann wir redlich bedacht(en) grosser sachen obirstligkeit die vns von d(er) heiligen romisch(en) reichs wegen anrurent so finden wir vns demselbn reiche manigualdiklich v(er)bunden Wann wir von des reichs wegen keis(er)liche wirdikeit besiczen Auch sein wir pflichtig vns(er) kunigreich zu Beheim
zu furd(er)n vnd zu hohen wann ez ist ein hoch vnd edeler gelid dasselbe reichs also daz sein hoimge dem reiche kumpt sund(er)lich zu krafften vnd zu wirden Des haben wir vnder and(er)n sachen die wir nehst(en) mit den erwirdigen vnd hochgeborn(en) kurfursten besorget vnd betracht(et) hab(e)n
mit namen das sund(er)lich bedacht daz wir mit gotes hilffe nehst(en) durch notdurfft willen mit mechtigem her(e) gen Swaben zogt(en) vnd also die vesten Achalm vnd Hohenstauff die daz reichs eigen sint vnd lange zeit von dann(en) enepfremdet sint gewest in gewald vnd eygenschafft des
heiligen reichs wider gebracht hab(e)n vnd zu d(er)selb(e)n zeit die vesten Luterburg vnd rosenstein vnd die stete Alen vnd heubach von den edlen Ludweign dem elt(er)n vnd Ludweigen dem Jung(er)n grafen von otingen vns(er)n liebn getrew(en) recht vnd redlich von vns(er)s kunigreichs vnd der cro
nen zu Beheim geld vnd gut zu demselbn kunigreiche vnd der cronen zu Beheim gekaufft hab(e)n vnd sie zu demselbn kunigreiche vnd der cronen zuegeleibet geeygent vnd geeyniget furbas bedachten wir mit den vorgen(anten) kurfursten allein dieselbn vesten Achalm vnd hohenstauf
an vnselber dem reich wol nucze sein doch waz notdurfft das sie mit beygeleg(e)n vesten vnd guten gestewret vnd gebrewtet wurden vnd das ein sulch stew(er) vnd merunge d(er)selb(e)n vesten Achalm vnd hohenstauff wol geschehn mocht(en) dem reiche zu nucze vnd frumen mit einem
wechsil vmb die obgen(anten) vesten Luterburg vnd rosenstein vnd den steten Alen vnd heubach vnd iren zugehorungen Wann dieselbn vesten vnd stete den egen(anten) vesten Achalm vnd hohenstauff nahen beygeleg(e)n sint vnd ir gemerke beidenthalb sich an einander rurent Auch
bedachten wir mit den egen(anten) kurfursten in gutem rate daz die vesten parkstein vnd kurlswalde gelegen in dem Egerlande mit hunder lehn lewt(en) die dorzu gehoren vnd weyden die stat mit iren guten dorff(er)n zugehorungen vnd gebieten Alleine sie des reichs sint doch
so sint sie bas gelegen dem kunigreiche zu Beheim vnd den landen die wir zu demselbn kunigreiche zu Beheim ob(er) wald in Beyrn gewonnen hab(e)n wann dem reiche vnd die vesten Luterburg vnd rosenstein dem heiligen reiche vnd die vesten parkstein vnd kurlswald dem kunigreich
vnd der cronen zu Behim nuczlicher vnd beidenthalbn bas geleg(e)n sind vnd frumen tragn mugen als das alles in der worheit funden ist von bescheir(en) die die kurfursten dorzu gesant hab(e)n Dauon nicht durch lieb vns(er)s angebory(n) kunigreichs noch durch lieb vns(er)s erbn vnd nachkomen
sund(er) durch gotlich recht vnd vns(er) gewissen in sulchen sachen die wir merken das sie dem heilign reiche vnd vns(er)m kunigreiche zu Behim desselbn reichs wirdigen gelide vnd furstentum mer nuczes vnd eren bringen mugen hab(e)n wir mit wolbedachtem mute vnd vollem rate der
obgen(anten) kurfursten vnd and(er) fursten vnd edler des heiligen reichs besunnen vnd eynmuticlich betracht(et) die obgen(anten) gut(er) an einander zwischen dem reiche an eim teil vnd dem kunigreich zu Behim an dem and(er)n zu wechsiln des hab(e)n wir als ein romisch(er) keis(er) mit rate vnd willen
derselbn kurfurst(en) in vns(er)n vnd des heilige(n) reichs namen mit dem hochgeborn(en) Johansen marggrafen zu merh(e)n vns(er)m liebn bruder vnd furst(en) als mit vns(er)m vnd des kunigreichs zu Behim verwez(er) vnd pfleg(er) die obgen(anten) vesten Luterburg vnd rosenstein vnd die stete Alen vnd heu
bach mit iren dorff(er)n guten gebiet(en) vnd allen zugehorungen vmb die obgen(anten) vesten parkstein vnd kurlswalde vnd vmb die stat zu der weyden vnd ir aller dorffer gut vnd zugehorungen mit gancz(er) recht(er) grunde eygenschafft vnd bestant beidenthalbn recht vnd redlich(en)
verwechselt vnd verwechseln in dissem briefe mit keis(er)lich(er) macht vnd recht(er) wiczen vnd wir als ein romisch(er) keis(er) mit keis(er)lich(er) macht von wegen vnd in volln sulches wechsils hab(e)n vns vngen(ant) vnd v(er)zeihen auff die obgen(anten) vesten parkstein vnd kurlswalde vnd auff
die stat zu der weyden vnd auff alle ir gut dorffer herschaffte recht vnd zugehorungen vnd einleiben seinen vnd eygen eweclich dieselbn vest(en) stat vnd alle zugehorunge dem kunigreiche zu Beheim vnd sein edel(er) cronen vnd einleib(e)n eygen vnd eynen sie eweclich
in dasselbn kunigreiche zu Beheim vnd sein(er) cronen eygenschafft recht herschafft grunt vnd erbschafft mit rechte anczu zu bleib(e)n eweclich vngescheidenlich mit erblich(e)n recht(en) vnd die obgen(anten) vest(en) Luterburg vnd rosenstein vnd die stete Alen vnd heubach mit all(e)n
iren dorff(er)n guten gebiet(en) vnd zugehorungen hat vns egen(anter) brud(er) der marggraf zu merh(e)n in namen sulch(er) pfleg vnd verwezens als dorob(e)n begriffen ist in sulch(e)n wechsiln fur vns aufgegebn vnd hab(e)n wir die als ein keis(er) aufgenom(en) vnd sie dem heiligen reiche vnd
sein(er) kamer ingeleibt geeygent vnd geeyniget vnd inleiben eynen vnd eygen sie in desselbn reichs gewalt recht herschafft vnd eygenschafft eweclich zu bleib(e)n furbas hab(e)n wir gelobt vnd gelob(e)n mit dissem briefe als eyn romisch(er) keis(er) fur vns vnd vns(er) nachkom(en)
romische kunige vnd keis(er) vnd hat gelobt vns(er) obgen(anter) bruder der hochgeborn(e) Johans marggraffe zu merh(e)n als ein weser vnd pfleg(er) als davor begriffen ist von vns als von einem kunige zu Behim dorzu gesaczt fur vns vns(er) erbn vnd nachkom(en) kunige zu Behim
den obgen(anten) wechsil in allen seinen stucken eweclich stet vnd gancz haltn vnd in dheinen zeit(en) dowider nicht(es) zutun noch zu(er)suchen mit recht(e) oder mit tat mit vns selbs oder and(er) p(er)sonen indheinerweis domite sulcher wechsil gehind(er)t oder abgetan mocht(e) w(er)d(e)n
hab(e)n wir der obgen(anter) keis(er) karl als ein romisch(er) keis(er) fur vns vnd vns(er) romische kunige vnd keis(er) vnd der egen(anter) vns(er) brud(er) marggraff Johans zu merh(e)n von der obgen(anten) pfleg wegn fur vns vns(er) erbn vnd nachkomen kunige zu Beheim mit recht(er) wiczen vns vngen(ant)
vnd v(er)zeihen an allen den obgeschrib(e)n sach(e)n vnd was dar aus entstehn mocht indheinerweis als davor begriffen ist aller anspruche recht(es) vnd vordrung vnd aller hulffe keis(er)liches vnd werltliches recht(es) domite wir beid(e)n teil vns behelff(e)n mocht(e)n so wird
sulch(er) sache vnd wechsil ymer tun mit recht(e) oder mit tat in gerichte od(er) aufwendig gericht(es) od(er) domite sulch(er) sache vnd wechsil abgetan gezwey(er)t mocht(e) od(er) gebroch(e)n w(er)d(e)n indheinerwiz Ab auch von recht(es) wegn notdurfft wer daz sulche recht(e) vns die genant
sint mit namen suld(e)n in dissem briefe werd(e)n gelautert vnd von worte zu worte geschrib(e)n furbas wir karl der obgen(anter) keis(er) tun ab(e) vnd erfullen mit recht(er) wiczen vnd mit keis(er)lich(er) macht(er) volkomenheit allen gebrech(e)n der in den obgeschrib(e)n ding(e)n od(er) etlich(e)n
geschehn wer daz leicht(e) etliche schonheit vnd zirheit gelassen weren vnd sust an worten od(er) an worten od(er) and(er)n dingen dadurch alle die obgen(anten) sach(e)n in kumpftig(e)n zeit(en) vngesproch(e)n gehind(er)t od(er) geswecht(et) werd(e)n mocht(e)n indheinerweis vnd welln mit disem keis(er)
lich(e)n gesecze daz daz all(e)s gancze krafft vnd macht hab vnd ewige bestendikeit an all(e)n seinen stucken artickln vnd puncten also daz in allen diesen sachen alle recht(e) geschrib(e)n od(er) gewonliche od(er) geseczte die dowid(er) lauffen der sulch(e) ding and(er) seczen vnschedlich sy
wann wir alle sulche recht(e) abenemen als uil sie die obgen(anten) sachen krenken mugen Des all(e)s wir allermenniclich nyemand ausgenomen daz nyemand wid(er) diese gegenw(er)tige vns(er) keis(er)liche schrifft ymer turre tun indheinerweis Wer ab(er) dowid(er) tet der secz in vns(er) vnd
des reichs gran vngenade velliclich als offt daz geschech vnd in peen tausent mark lotigs goldes der halbtail in d(er) romisch(e)n reichs cam(er) vnd der and(er) halbetail in eines kuniges von Behim camer der in zeit(en) wirdet vnwendiclich(e)n gut vnd genczlich geuallen an
vrbund dicz briefes v(er)sigelt mit vns(er)m keis(er)lich(e)n maiestat Jnsigel der gebn ist zu Nurenberg Nach cristes geburt dreyczenhundirt Jar dornach in dem sechczigsten Jare an dem nehsten dinstag nach sant Andres tage des heilig(e)n zwelifbot(e)n vns(er)s
reichs in dem funffzehd(e)n vnd des beheimis in dem sechst(e)n Jare Des habn wir der obgen(anter) Rudolff Herczog von Sachssen des heilign reichs obirst(er) marschalk angesehn daz der obgeschrib(e)n wechsil loenlich vnd redlich ergang(e)n ist zu des heilign reichs eren vnd seliger
merunge vnd des kunigreichs zu Beheim gemach furd(er)ung vnd selden als dor das volkomenlich(e)n vnderweiset sein von erwirdigen bischoff(e)n von Eist(et) vnd alle vns(er) mitkurfurst(e)n dorzu gesant hab(e)n das zubesche(e)n vnd vmb das gebn wir vns(er)n gut(e)n
willn vnd gunst zu dem obgeschrib(e)n wechsil vnd zu all(e)n sach(e)n die dobay in geuallen sint vnd dorin gefolget habn indheinerweis als daz alles davor in dises herren des keis(er)s brief der hie inne geschrib(e)n ist volkomenlich(e)n ist begriffen vnd alle dieselbn sach(e)n wechsil
vnd and(er) dinge als sie dor begriffen sind bestetign vnd uestign wir mit wolbedacht(e)m mute vnd gut(e)m rate von vns(er)s amptes wegn als ein obirst(er) marschalk des heilign reichs vnd ein kurfurst(e) in allen iren punct(e)n artikeln vnd stucken von worte zu worte mit gancz(e)m
wiczen so daz ez alles eweclich blib(e)n vnd macht hab(e)n an vrkund dicz briefes v(er)sigelt mit vns(er)m hangend(e)m Jnsigel der gebn ist zu Nurenberg Nach cristus geburte dreyczenhund(er)t Jar vnd in dem sechczigst(e)n Jare an sant Lucien tage der heilig(e)n Juncfrawen