Wir Ruprecht der elter von gots gnaden Pfalentzgraue bei Rein des heiligen Römischen Riches obrist(er) Trussez vnd hertzog in Beyern Bekennen vnd tun kunt offinlich mit disem briue allen den die jn sehen odir
horen lesen Daz wir wegen des Allerdurchluchtigisten fursten vnd herren h(er)n Karls Romischen keisers zu allen zeiten mer(er) des Riches vnd kuniges zu Beheim vnsirs lieben gnedigen h(er)n vnd des hoch
geborn fursten h(er)n Johans Marggrauen zu Merhern vnsirs liebn Oheim an einem teil vnd von wegen des hochgeborn fursten h(er)n Rudolfs hertzogen zu Osterrich zu Steir vnd zu kernten vnd seins
bruder vnsir lieben Oheim an dem and(er)n teil vns etsliche brieue geantwrt sein vnd sein gebeten von beiden teilen daz wir vns(er)n willen geben zu denselben brieuen vnd waz drinne begriffen ist vnd
daz wir sie auch bestetigen vnd confirmiren solten nach vnsirs Amptes recht vnd wirden vnd dieselben brieue waren begriffen mit solichen worten als hernach geschriben stet Wir Rudolf von gots gnaden
hertzog zu Osterrich zu Steir vnd zu kernten Bekennen vnd tun kunt offenlich mit disem briue allen den die jn sehen odir horen lesen daz wir mit dem Allerdurchluchtigisten fursten vnd h(er)n h(er)n Karln Romischen
keiser ze allen zeiten mer(er) des Riches vnd kunig zu Beheim vns(er)m lieben gnedigen h(er)n vnd Sweher vnd dem hochgeborn fursten h(er)n Johansen Marggrauen zu Merh(er)n vns(er)m lieben Oheim vmb alle missehell
vnd ofleufe die zwisschen vns beiden seiten vntz auff disen hutigen tag gewesen seint von gnaden vnsirs h(er)n des keisers also fruntlich vnd gutlich bericht sein vnd gnediclich versunet daz der egen(ant) vnsir
herre der keiser vnsir gnediger h(er)re sein wil vnd der egen(ant) vnsir Oheim der Marggraue vnsir guter frunt sein sol eweclich dauon mit wolbedachtem mute mit rate vnsir frunt vnd vnsir getrewen bidermen
mit rechter wizzen verzeihen wir vns vor vns vnsir bruder die hochgeborn fridrich Albrechten vnd leupolden vnsir vnd jre Erbn vnd nachkomen eweclich alles rechten forderung anspruche vnd zuuer
sicht die wir zu dem kungreich vnd der Cronen zu Beheim vnd zu der Marggraffschaft zu Merhern den landen vnd den furstentumen die sie zu polan habent vnd den landen zu Sultzbach vnd auch andern
die sie in dutzschen landen haben die zu dem kungreich zu Beheim gehorent vnd doran stozent vnd allen and(er)n jren landen furstentumen vnd herschaften vnd allen jren zugehorungen wo die gelegen seint in d(er)
newen gestalt haben haben odir haben mochten vnd bei namen des rechten daz wir von wegen der hochgebornen furstinne frow katherin des egen(ant) vnsirs h(er)n des keisers tochter vns(er)r eliche(n) wirtinn gehabn
mochten wenn dazselbe recht sal vns vnschedlich sein Es were denn daz die egen(ant) vnsir herre der keiser vnd der Marggraue zu Merhern vnd ir Erben mannes geslechte die sie itzunt haben od(er) noch ge
winnen also verscheiden daz sie eliche leiber erben mannes geslechte hinder jn nicht liezzen vnd globen in guten truwen on geuerde vnd mit geswornem eyde den wir doruber leiphaftig zu den heiligen getan
haben dem egenan(ten) vns(er)m h(er)n dem keiser als eynem kunige zu Beheim vnd h(er)n Johansen Marggrauen zu Merh(er)n vnd jren Erbn vor vns vnsir wegen bruder vnd vnsir alle Erbn daz wir nach dem egen(ant)
kungreich vnd der Cronen zu Beheim der Marggraffschaft zu Merhern vnd allen dem daz dauor geschriben stet vnd jren zugehorungen nimmer gesten wellen mit worten mit werken mit dem rechten forde
rung od(er) sust in dheineweis heimelich odir offenbar sunder wir wellen vnd sullen die egen(ant) vns(er)n h(er)n den keiser als einen kunig zu Beheim vnd h(er)n Johans Marggrauen zu Merhern vnd jre Erbn dobei
mit frid vnd mit gutem gemach eweclichn lazzan Auch globen wir in guten truwen on geuerde vnd bei dem egen(ant) vns(er)m geswornem Eyde daz wir jn alle hantfesten brief vnd vrkund die wir doruber haben
ez sei von erbschaft pfantschaft lehen gabe odir satzung od(er) sust in dheineweis ob sie auch vns od(er) vns(er)n eltern von keisern od(er) Romischen kunigen od(er) sust von ymand anders wurden weren gar vnd gentzlich wi
der geben vnd jn antwrten wellen vnd sullen vnd keine sulche hantfesten odir brief bei vns behalten in dheineweis Wo aber in dheinerlei sulche hantfesten brief odir vrkund hernach in dheinen
zeiten So meinen vnd wellen wir daz die vncresig vnnutze vnd vntugelich sein sullen vnd vns vns(er)n bruder Erbn vnd nachkomen keinen frummen vnd den egen(ant) vns(er)n h(er)n dem keiser als einem kunige
zu Beheim vnd dem Marggrauen zu Merh(er)n jren Erbn vnd nachkomen keinen schaden bringen Auch globen wir in guten truwen on geuerde vnd bei dem egen(ant) vns(er)m gesworn Eyde daz wir alle die obgeschriben
vns(er) globde gantz stete vnd vnuerrucket eweclich haben vnd halten wellen vnd sullen vnd darwider nymer getun in dheineweis vnd verzeihen vns offenberlich vnd mit rechter wizzen vor vns vnsir bruder vnd
vnsir aller Erben vnd nachkomen aller hulfe geistliches vnd werntlichs rechten vnd aller gestze bebstlicher vnd keiserlicher bueche der lande gewonheit vnd aller fvnde vnd behaltnisse domit wir vns be
helfen mochten od(er) domit der egen(ant) vnsir h(er)r der keiser als ein kunig zu Beheim der Marggraue zu Merh(er)n jre Erbn vnd nachkomen kunige zu Beheim vnd Marggrauen zu Merh(er)n in den egen(ant) furstentumen
landen vnd herschaften mochten in dheineweis geschedig od(er) gehindert werden des sint gezeuge der Erwirdige h(er)r Johans Erwelter vnd besteter des Bistums zu Gurk vnsir Cantzler vnd vnsir getriwe Alber von
Buchen obrist(er) drotsseze in Osterrich Pilgreim der Strewn vnsir houemeister Bvrckart jtal von Erlebach Rudolf der hurne von Schonow vnd vnd Cvnrat von Blumenwerg heinrich der prunner vns(er) Schenke
Jans lazperg vns(er) hofmarschalk vnd and(er) erb(er) luten ritter vnd knechte die dobei waren Mit vrkund ditz briefes besigelt mit vns(er)m Jnsigel Der geben ist zu selde bei Ezzlingen nach Cristus geburt dreutzen
hundert Jar dornach in dem Sechtzigistem Jar an dem nechsten Sunabend vor vnsir frowen tag als sie geborn wart Des haben wir angesehen jrtzige begerung beider teil vnd auff die rede daz zwisschen den
egen(ant) fursten jren furstentumen landen vnd herschaften fridde vnd fruntschaft eweclichen bleiben So geben wir vns(er)n willen zu allen den dingen die dauor geschriben seint vnd bestetigen vnd confirmiren dieselben
brieue in allen meinungen puncten vnd artikeln von worte zu worte als sie dauor begriffen sint vnd tun wir daz als ein pfalentzgraue bei Rein des heiligen Riches obrist(er) Trussez vnd ein kurfurst des egen(ant)
Riches mit rechter wizzen vnd nach vnsirs Amptes recht vnd wirden Mit vrkunt ditz brieues versigelt mit vns(er)m anhangendem Jnsigele Der gebn ist zu Nurnberg nach Cristus geburt dreutzenhundert
Jar dornach in dem ein vnd Sechtzigistem Jar an der nechsten mitwoch nach dem Suntage als man singet Misericordia d(omi)ni