Ich Conrat Harder zu Tasch gesessen bekenn fur mich mein erben vnd nachkommen vnd tun kunt offenlich mit disem brief allen den die in an sehent horent oder lesent daz ich mit
gutem willen vnbezwungenlich mit rat meiner freunt vnd mit wol bedachtem mut reht vnd redlich verkaufft han vnd auch verkauffe mit disem brief dem aller durchleuchtigistem
fursten vnd herren herren Karl Romischem keiser zu allen zeiten merer des Reichs vnd kunig zu Beheim als einem kunig zu Beheim meinem genedigen herren seinen erben vnd nachkommen
kunigen zu Beheim vnd der Cronen des selben kunigreichs mein eygen gut den hof zu der Eykelsspurg genant der ierlichen gultet funf sumer korns funf sum haber Nurenberg(er) mazz drew
pfunt haller vierzig kes der einer sehs haller wert sein sol ein hallbs pfunt eyr aht huner vnd einen weck oder dreizzig haller vnd ein gutlein daz alles do zu den zeiten der braws auf stet daz
gultet ierlich drey schilling haller der longen vierzig kes sol einer sehs haller wert sein sehs schilling eyr sehs huner vnd einen weck oder dreizzig haller Auch han ich verkaufft vier tagwerk
wismat vnder dem selben hof Eikelsspurg gelegen di an ein ander ligent vnd ein hallbs tagwerk wismat daz besund(er) vnder der Eykelsspurg liget vmb zwey hundert pfunt haller der ich
von meinem egenant(en) herren an guter werung gar vnd genzlichen beicht vnd gewert bin an allen gebrechen Nu hat mir mein ezen herre di genad getan vnd hat mir meinen erben
vnd meinen nachkommen di egeschriben gut mit allen iren nuzzen vnd zu gehorung besucht vnd vnbesucht als ich die her braht han vnd als si an mich kumen sein wider gegeben zu eim
Burglehen mit dinst die zu vdinen auf den Rotemberg mit solichen gedingen vnd bescheiden wenn ich mein erben oder mein nachkomme von meinem ezen herren seinen erben vn(d) nach
komme(n) kunigen zu Beheim oder von seinem Burgraui(n) zu dem Rotemberg ermanet w(er)den so sol ich mit zwein pferden vnd mit einem knecht mit einem helm vnd mit dem wappen daz darzu
gehort zu stund nach der manung auf den Rotemberg kumme(n) vnd sol dar auf beleiben vnd an vrlaub von dann niht kumme(n) als lang biz daz man mir vrlaub gibt vnd die weil ich vn(d) mein
knecht auf dem Rotemberg sein so sol man vns koste futer vnd hew geben vnser notdurft wert aber daz man mein mit den pferden niht bedorft so sol ich die pferde wider heim senden
vnd so sol ich vnd mein knecht mit vnsern leiben auf dem Rotemberg sein vnd daselbs beleiben als lang man vns bedarf vnd waz ich vnd mein diner schaden nement an pferden d(er) weil wir vf
dem Rotemberg sein in dinst oder ob wir mit and(er)n burgleuten des Rotembergs aus riten mit ofner p(er)mit vns(er)s ezen herren auf di veinde oder fur in notdurft des hawses vnd ob wir daselbs schaden
neme(n) oder gevange(n) wurden daz got bewar des sullen vns vns(er)s ezen herren ezen er(ben) oder sein nachkom(men) kunig zu Beheim aus ziehen vnd rihtig machen als and(er) burgleut des Rotemberg reht vnd ge
sag sint Geschech auch daz ich mein erben oder mein nachkomme von meim ezen herren von seinen erben oder nachkomme(n) kunigen zu Beheim oder von seinem Burgraui(n) zum Rotemberg gemanet wurden
zu dinen auf den Rotemberg vnd daz ich an geuerlich niht kumme(n) moht so sol ich zu stund nach der manung an geu(er)de einen meiner nehsten freunt der in meiner genozschaft ist vnd der sich wol u(er)
stan dar an mein stat auf den Rotemberg schicken in aller der maz als vor geschriben ist vnd der sol auch vns(er)m ezen herren kunig zu Beheim oder in zeiten ist oder einem Burgraui(n) zum Rotemberg an sein
stat vnd der vesten zum Rotemberg getrew zu sein iren schaden warnen vnd auch iren frum(m) werben an geu(er)de vnd in guten trewen di weil er auf der vesten ist vnd in solichem dinst beleibet Geschech
auch daz ich mein erben oder mein nachkomme als vnschuldig wurden oder daz vns soliche not darzu betwung oder soliche anligende not vnd sache daz wir die vorgeschriben burglehen v(er)kauffen
mu(e)sten vnd wolten so sulln wir die and(er)s niemant v(er)kauffen in deheinen weys dann daz ir vns(er)s ezen herren ezen er(ben) ist an geu(er)de vnd der sol auch daz burglehen enpfahen vnd sulcher dinst gebunde(n)
vnd pflichtig sein zu tun vnd zu leisten als wir vnd als in disem brief begriffen ist Ich vorgen(ant) Conr(at) Harder bekenn fur mich mein erben vnd nachkom(men) daz wir deheinerley gewalt reht
an den vorgeschriben guten des vorgeschriben Burglehens niemant ichtes zu v(er)kauffen zu v(er)seczen zu v(er)kummern ewichlichen oder zeitlich(en) oder wy man daz im(m)er besinden kunte geneme(n)
oder begreiffen mag vnnd dann daz si ein ewigs freyes burglehen ist vnd sein sol des hawses Rotemberg in der maz als vor geschriben ist auch di zu vdinen Auch sulln mein erben vn(d) mein
nachkomme die vorgen(ant) Burglehen von meinem ezen h(er)ren dem keis(er) seinen erben vnd nachkom(men) kunig zu Beheim vnd der cronen des selben kunigreichs zu rehtem Burglehen enpfahen als
oft als von erbe oder sust von kauffes wegen oder von welichen and(er)n sachen daz geschech daz ein solches Burglehen in ein ander hant queme vnd alles daz swern vnd geluben als vor be
griffen ist we auch sache daz ich mein erben oder mein nachkomme in krieg oder in veide begriffen wurden so sulln wir daz Burglehen niht auflazzen vnd sulln aller der vorgeschriben
ding(er) genzlich v(er)bunden sein vn(d) an di zeit daz solches vrleug krieg oder veid v(er)sunet w(er)den wenn aber vns(er) vrleuges krieges oder veiden weren so mugen wir vns(er) Burglehen auflaz(zen)
wenn wir wollen vns(er)m herren einem kunig zu Beheim also daz wir im daz kunden vor ein hallbs iar an geu(er)de vnd di selben Burglehen mag dann vns(er) h(er)r ein kunig zu Beheim leihen wem er
wil wenn daz hallb iar aus get vnd daz hallb iar sullen wir des Burglehens niezzen vnd es vdinen als vor geschriben ist vnd des han ich gebeten di wolgeborn h(er)ren h(er)rn fridrich Burggrafen zu
Nuremberg vnd h(er)r iohansen lantgraui(n) zu dem Leutenberg daz si zu einem ewigen gedechtnuzz vnd gezeugnuzz aller der vorgeschriben sachen iren insigel in dem meinen auch an disen brief ge
ruchen zu hengen vnd wir die ezen fridrich Burgraui(n) zu Nuremberg vnd iohans lantgraf zum Leutenberg haben durch fleizziger bete des vorgen(ant) Conr(at) des Harders zu gezeugnuzz der obgeschriben
sachen vnser insigel an disen brief gehangen der geben ist zum Rotemberg Nach Crists geburt dreuzenhundert iar darnach in dem zwein vnd sehzigistem iar an sant Mathyes abende des heilig(en)
zwelfboten