Wir die Rete vnd die Burger gemenlich der stete zu Kunnigesberg a(n) der Neumarke Schowenflies Soldin Lypene Nygen Berlyn Arnswalde Reg(e)nwalde Lanssperg Driesenborg Friedeberg Cussow Callyes
Nurenberg sond zu Calis obir der oder in der mark zu Brandenburg gelegen bekennen uffenlich an dissem briue das wir vmb aller luten die yn sehen oder horen lesen Wann der hochgeborn furste vnd herre her
Otte marggraue zu Brandenburg vnd zu lussitz vnser lieber gnediger herre dem allerdurchluchtigistem fursten vnd herren h(er)n karly Romischem keiser zu allen czeiten merer des Richs vnd kunige zu Beheim
als eyme kunige zu Beheim sinen erbn vnd nochkomen kunigen vnd der cronen des kunigrichs zu Beheim zcwe versigelte briue gebn hat des er is dar in zu schulden queme daz der hochgeborn furste vnd h(er)re
her Wenczesla kunig zu Beheim vnsers egen h(er)ren des keisers irsgeborn son ane leibe sturbe das da die herczogentu(m) das furstentu(m) der lande zu der swidnicz vnd zu dem Jawr als Jaur swidnicz hus
vnd stat Jawr Reichenbach hus vnd stat Nympc hus vnd stat Lobenaw hus vnd stat strogow hus vnd stat Bonalow hus vnd stat lewenb(er)g hus vnd stat Grifenberg die stat G(er)lat hus vnd stat
schonow hus vnd stat hirssperg hus vnd stat Hayn hus vnd stat landeshute die stat chastorff Sinsenstein kynast falkenstein Cmirsswalde Hornsperg waldenburg die vestenen vnd ouch ander
erbliche herschafte die der hochgeborn furste her Bolke herczog zu slesien h(er)re zu der swidnicz vnd zu dem Jawr herre uff die hochgeborn furstynnen frowen Elizabeth vnsers egen h(er)ren margg(ra)ue Otten
eleche wirtin myt worten des keisers tochter als uff yren rechten erbn noch tode des herczogen von der swidnicz vnd siner elechen wirtin venvallen also daz die egen vnser herre vnd frowe margg(ra)ue
Otte vnd frowe Elizabeth die lande des herczogen von der swidnicz yngenomen daz denn wir vnd die vorgen(anten) stete mit dem lande uff dem Barnym dem closter Choryn mit den steten vnd lande
obir der oder gelegen mit namen Vrankenfurte Strozberg Copenicz monchsberg vnd die vogtie zu lubiz mit allen dem daz daczv gehoret vnserm egen herren dem keiser als eyme ku
nige zu Beheim sinen erbn vnd nochkomen kunigen vnd der cronen zu Beheim sulln verbrunden sin zu einer widerstadunge der egen lande des herczogen von der swidnicz in allerweise als her
noch geschribn steet Von isser wulln vnser herre marggraue Otte vnd vnser frowe Elizabeth die lande des herczogen von der swidnicz erblich behalden kvenne sie die getruwelich ynnehaben ane alle
geuerde so sulln den wir vnd die obg(enanten) stete vesten vnd lande vnsers h(er)ren marggraff otten vnd waz zu yn gehoret vnsin vorgen(anten) h(er)ren dem keiser als eyme kunige zu Beheim sinen erbn vnd noch
komen kunigen vnd dem kunigrich zu Beheim als vnsin vnd yren rechten h(er)ren vnd natuirlichen herschaft warten vnd gehorsam sin vnd vns denn an sie halden were is abir daz vns(er) h(er)re marggraff
otte vnd vnser frowe Elizabeth die obgen(anten) lande des herczogen von der swidnicz vnsin egen h(er)ren dem keiser als eyme kunige zu Beheim sinen erbn vnd nochkomen kunigen vnd dem kunigriche
zu Beheim liezen an sie weisen vnd antwirten ane alle geuerde so sulln denn wir vnd die obgen(anten) lande stete vnd vestene vns(er)s herren marggrauen otten vnd waz zu yn gehoret an denselbn
vnserm herren margg(ra)ue otten sine erbn vnd nochkomen alles von sime leibe mannes geslechte vnd obir die nicht werch an den hochgeborn fursten vnd h(er)ren h(er)n ludewig den romer marggrauen
zu Brandenburg vnd zu lussitz vnsin liebn gnedigen herren vnd an sine erbn vnd erbes erbn alles von sime leibe mannes geslechte widerkomen vnd belib(e)n vnd wenne die egen lande stete vnd
vestene des herczogen von der swidnicz vnd yre zugehorunge in vnsers egen herren des keisers als in eines kunigis zu Beheim siner erben vnd nochkomen vnd des kunigrichs zu Beheim hant
vnd macht von den vorgen(anten) vnsin h(er)ren margg(ra)ue otten vnd vns(er) frowen Elizabeth komen so sullen vnd mocht er von die obgen(anten) stete vestene vnd lande vns(er)s h(er)ren margg(ra)uen otten vnser vnd
yrer gelobde eyde vnd briue die wir vnd sie von den obgen(anten) sachen vnsin h(er)ren dem keiser als eyme kunige zu Beheim sinen erbn vnd nochkomen kunigen vnd dem kunigrich zu Beheim gegeben
vnd getan han ledig sin vnd sulln zu der marke zu Brandenburg warten vnd gehoren als von ane alle geuerde were is ouch daz vnser vorgen(anter) herre marggraff ludewig ane erbn von sime leibe ma
nes geslechtes sturbe vnd daz selbe sin teil der lande vnd furstentu(m)me der mark zu Brandenburg an vnsin h(er)ren marggrauen otten vnd an sine erbn von sime leibe manes geslechtes queme vnd geuiele so sal
vnser h(er)re marggraue Otte mit denselbn herschaften landes vnd luten marggraue ludewigis zu der vorgen(anten) widerstadunge der lande zu der swidnicz nicht pflichtig noch verbrunden sin denn die sulln vnsin
herren marggrauen otten vnd sinen erbn von sime leibe manes geslechtes sunderlich blibn vnd zugehoren ane alle irrunge vnd anesprache Alle die egen sache vnd ir iecliche besunder als verre vns
die anruren vnd antreffen mogen in dheinerweis han wir wir vns vnd vnser erbn mit wolbedachtem mute mit rechter wizze mit rate vnser frunde vnd von geheize vnser egen herren marggrauen
ludewigis vnd marggrauen otten unkestlich dem vorgen(anten) vnsin h(er)ren dem keiser als eyme kunige zu Beheim sinen erbn vnd nochkomen kunigen vnd dem kunigriche zu Beheim in guten truwen ge
lobet vnd uffenlich mit ufgeracten henden zuden heiligen gesworen stete vnd veste unvobruchlich zu halden vnd darwider nimmer zu tune in dheinerweis ane alle argelist vnd geuerde vnd sulln
diese gelobde vnd eide vnschedelich sin allen orden gelobden vnd huldungen die wir zu and(er)n czeiten vnsin egen herren dem keiser sinen erbn vnd nochkomen kunigen vnd dem kunigrich zu Beheim getan
habn als er ouch darubir vnser briue hat die in yrer macht alle zcit genzlich blibn sulln Vnd aller dieser egen sache zu urkunde vnd stetiger warheit han wir vnser stete groze Jngesigele
an diesen briff gehangen der gebn ist zu Soldin noch gotes geburte druzenhundert Jar dar noch in dem vier vnd sechtzigistem Jare an dem nehesten dinstage noch sant Johans tag des heiligen toufers