Wir Przymik von gotes gnaden hertzog zu Teschin vnd zu Buthym Bekennen vnd tun kunt offenlich mit disem briefe alln den die
in sehent oder horen lesen daz wir vor etlichen Jaren in der stat zu Bresla kumen sein fur den alladurchleuchtigisten fursten vnd herren
herrn Karl romischen keiser zu allen czeiten merer des reichs vnd kunig zu Beheim vnsern liebn gnedigen herren vnd haben an ym gemutet
daz er als ein kunig ze Beheim vns alle vnser furstentume lant herscheffte vnd gut die von dem kunigreiche vnd der cronen ze Beheim
lehen sint verleihen geruchte vnd haben ym dieselben furstentume lant vnd herscheffte benennet daz ist daz hertzogtum zu Teschin
mit seinen zugehorungen Buthym halb Tost Bitenkretzem Glibitz Seuer Ocles Swyba vnd waz daczugehoret des hat er angesehn
vnser demutige bete vnd begerung vnd hat vns dieselben hertzogtum vnd furstentum mit allen iren herschefften eren sunden vnd
nuczen nach vnser furgabe als ein kunig zu Beheim recht vnd redlich verlihen des habn wir in den czeiten do wir die lehen von
ym empfingen fur vns vnser erbn vnd nachkomen hertzogen zu Teschin vnd zu Buthym dem egen(anten) vnserm herren dem keiser als ei=
nem kunige zu Beheim seinen erbn vnd nachkomen kunigen vnd der cronen desselben kunigreichs bedechticlich vnd mit rechten fin=
gen gehuldet gelobt vnd gesworn als vnser rechter naturlicher ordenlicher herscheffte vnd lehen herren daz wir yn getrew gehorsam
vnd auch vndertenig sein wellen vnd sullen iren schaden zu wenden vnd iren frumen zu werbn zu alln stunden vnd dauon hat
er als ein kunig ze Beheim vns vnd vnsern erbn vnd nachkomen dieselben lehen bestetiget mit alln iren zugehorungen als dauor
geschribn stet mit vrkund ditz briefs versigelt mit vnserm anhangenden Insigel der geben ist zu Prag nach cristus geburt
dreuczenhundert Jar vnd in dem Sechs vnd Sechczigsten Jar an dem nehsten dinstage vor sainte Georgen tage