Ich her Vlreich genant von dem Bor vergich offenleich an disem prief vn(d) tvn chvnt alle(n) den di in an
sehent od(er) horent lesen daz ich d(er) erbr(e)n vrowen wendeln etswen dez hainreichs havsfrowe zu Braw
vn(d) iren erben han gelazze(n) vn(d) v(er)chauft fur ein vreiz aygen nach d(er) stat recht vn(d) als chauf recht ist
in sulcher beschaiden alle Iar als dez Czinz recht recht ist meinen halben hof zu Braw alle Iar
vf sand Geory tag x grozz vn(d) iij grossen p(ro) pfennig vn(d) vf sand gallen tag als vil vn(d) fur po
boten vn(d) and(er) chlaine dinst vierdhalbe grossen vn(d) iij haller schol si mir geben vn(d) auch ob chain
losung od(er) vngelt vf d(er) vrowe(n) wendeln halben hof gelait wurd wie d(er) walters halbe hof zunehst
ir trag vn(d) geb als vil schol si vn(d) ir erben von irem halbem hof tragen geben vn(d) gelte(n) mir vn(d)
mein(er) afchumft vn(d) ob di oftgenat(e) vrow wendel ab gie dez got nicht engeb so schol ir hal
ber hof mit allem daz d(ar) zu gehort erben auf irev chint vn(d) vf irn chintchint vn(d) si mag vn(d)
ir erben iren frume(n) geschaffe(n) mit dem selben halftail dez hofz ze haltn ze vsezz(e)n ze v(er)chauf
fen in dem rechten als hie vor geschriben stet Ich wil auch wer disen prief innen hat in
sein(er) gewalt od(er) zaigt der schol haben alle di recht vf dem halben hof eze gleicher weiz als di
vrowe wendel vn(d) ich gelobe ir der vrowe(n) wendel vn(d) auch di disen prief zaige(n) od(er) bewei
sen mugen si ze besirmen vn(d) bestirmen pey meinen rechten trewen mit samt meiner aft
chumft vn(d) allez daz an disem prief stet gancz vn(d) gar volfuren vn(d) vngechrenckt lazzen
wil vn(d) schol Sind pei d(er) handlu(n)g ist gewesen Ernhart d(er) haselpech purgf(raf) zu Schutt(en)hofen vn(d)
Gotfrid d(er) Czein vn(d) zu eine(n) stete(n) ganczen vrchund gib ich disen p(ri)ef d(er) vrowe(n) wendeln vn(d)
iren erben mit meinem Insigel v(er)sigelt vn(d) mit dez vorgenaten Ernhartez Insigel Vnd
daz ist geschehen do man zalt vo(n) christez gepurt Dreivzehen hund(er)t Iar Dar nach in dem ain
vnd dreizzigisten Iar an sande Iacobs tag