Wir Wenczlaw von gots gnaden Romischer kunig zu allen czeiten merer des reichs vnd kunig zu Beheim Bekennen vnd tun kunt offenlich in disem brief allen den die yn sehen odir horen lesen Das
fur vns komen sein vnse lieben getrewen die schilter die vf vnsern czinnen in der newen stat gesessen sein vnd baten vns mit fleisse das wir in ir freiheit vnd brieff die yn von seliger
gedechtnisse ettwe(n)n von vns(er)m herren vnd vat(er) keyser karl gegeben sint / als die in dem brief der hernach geschriben stet volbegriffen sein steten beuesten vnd confirmiren gnediglich geruch
ten der von worte zu worte also lautet Wir karl von gots gnaden Romischer keyser zu allen czeiten merer des reichs vnd kunig zu Beheim Bekennen vnd tun kunt offenlich mit disem brief
allen den die yn sehen odir horen lesen Alleine wir von angebormer gute vnd vorsichtikeit besorget sein alle vnser getrewen gnediclichen zubedenken doch meynen wir vff der gemach vnd
wirssar sunderlich zusehen die vns vnser erblicke vnd veterliche gute stete land vnd lewte in steter ganczen trewen vntadlicher bewaren vnd besorgen helffen des haben wir angesehen die steten
getrewen dienst die vns vnser schilter zu prage offt manichualt vnd getrewlichen beweiset haben vnd furbas tun sollen vnd mugen in kunftigen czeiten vnd haben yn dorumb alle die
nachgeschriben gnade getan vnd tun ouch mit disem brief als eyn kunig von Beheim von kuniglicher macht vnd mit rechter wissen das die egen(anten) schilter die vff vnsern czinnen
in der newenstat wonen odir in kunftigen czeiten wonen werden vnd alle ire diener vnd gesinde die teglichen ir brot essen sullen von aller stewer dienst gabe vnd bete furbasmer
czewclichen von vns allen vnsern erben vnd nachkomen kunigen zu Beheim frey ledig vnd los sein ausgenomen alleyne ob wir vnser erben vnd nachkomen kunige zu Beheim sulche haubt
not angen wurde das wir drey derselben schilter vns(er)m ledimsen swerden wenn sie denn von vns oder vns(er)m marschalk d(ar)czu dienst geuordert werden so sullen sie vns mit irem
dienst gewert vnd gehorsam sein nach iren staten vnd vermugen Auch haben wir yn die gnade getan wo sie die vinden die sie hindern odir irren an irer narunge in allen steten zu
prage vnd vorholen arbeyten schiltwerk vnd sich anemen geistlich maler vnd mit yn nicht teylen leyden das sie denn swenn ir vorbieten arbeyt vnd wo sie ouch in welch staden sy den
merkten zu prage das sie das mit hilfe des Richters in der stat wo sie das vinden nemen odir ir knecht vnd diener die das schiltwerk mit yn mit der hant arbeyten Welch schilter
ouch von fremden steten gen prage komet odir geczihet wirt vnd sich vf eynen czinnen in der newenstat seczen wil zu meister der sol an vier wochen mit seim selbes hant machen
eynen ganczen steth gewerge eynen satel eynen topf eyn prustleder vnd eynen schilt das sol er legen fur die meister zubeschaun vnd ist das gut vnd gerecht so sol man ym
den czinnen eyngeben vnd antwurten noch vnsern gnaden Wer ouch das eyn meister der vf eynen czinnen gesessen wer hin weg fur von prage an der ander meister wissen
vnd an not vnd sich seczet andernenden zu arbeyten vnd zu meister vnd dornach widerqwem vnd wolt wider zu prage eyn meister sein als vor der sol die meisterschafft gewin
nen als eyn fremder meister vnd wer der ist der eynen czinnen innhät vnd doruff nicht siczet noch dorunder vnd erbeyt andernenden heymlich wo man sein werk vindet vf dem
markte oder in seyner werkstat anders denn vnder den czinnen es sey newe odir newe gemachet das sol vorloren sein es sey in dem Jarmarkt oder sust ob ouch eyn fremder meister
von fremden steten schiltberg gen prage brenget vnd das vorkauffen wil es sey in dem Jarmarkt oder sust das sol er vorkeufen wo die gesessen schilter von prage ir schiltwerk vor
keuffen vnder den czinnen vnd nyrgent anders Auch gunnen vnd erlawben wir denselben schiltern das sie swert messer vnd harnasch tragen mugen als die vogner darumb
das vnser stat vnd czinne desterbas bewaret werden yderman noch seinen staten vnd mugen Wer ouch schiltwerk arbeyt vnd eynen czinne innhät der sol sein arbeyt nyrgent
anderswo vorkauffen den vnder den czinnen vnd wo es anderswo gefunden wurde das sol vorloren sein vnd sol man ym das nemen als vor geschriben stet vnd sullen sich des die
meister vnderwinden vnd das an iren nucz keren Auch tun wir yn die gnade das eyn iglich schilter anleyten muge was er kan vnd mag dasselbe werk ouch vorkeuffen als schilt
werk in der mass als vorbegriffen ist ouch sol man vns tarcschen vnd stechschilt machen vnd bereyten denn alleine die schilter Dorumb gebietn wir den Richtern den Burg
meistern den schepfen vnd den Raten gemeynlich der stete alten newen vnd kleynen zu prage vnd allen andern vnsern lieben getrewen das sie die egen(anten) schilter an den obgen(anten)
vnsern gnaden nicht hindrn noch vbirfaren sullen in deheyneweis sunder sie dobei von vnsern wegen getrewlichen suczen vnd behalten vnd wer dorwid(er) ichtes freuelichn tete der sol
in vnser vngnade swerlichen vnd funfczig mark lotiges goldes voruallen sein die halbe in vnser kamer vnd das ander halbtel den obgen(anten) schiltern die also vbiruarn wurden
geualln sein vnd an alles hindernisse geuallen sullen gegebin mit disem briefe vorsigelt mit vns(er) keyserlichen maiestat Insigel Der gebn ist zu prage nach crists geburt dreyczen
hundt jar dornach in dem funfundsechczigsten jare an dem nehsten donnerstag vor sand agnethen tag vns(er) reiche in dem newnczehnd vnd keistums in dem czenden Jaren
Des haben wir angesehen ir fleissige vnd redliche bete vnd ouch dienst vnd trewe die sie vns tun sullen vnd mugen in kunftigen vnd haben mit wolbedachtem mute vnd rechter wissen
vnd kuniglicher macht zu Beheim den egen(anten) schiltern vnd iren nachkomen den egen(anten) brief vnd freyheit die dorin begriffen sein als sie douor von worte zu worte geschriben
sten bestetet beuestet vnd confirmiret besteten beuesten vnd confirmirn in craft dicz briefs vnd meynen vnd wellen sie dobei gnediclich bliben lassen vnd gebietn
dorumb den Richtern Burgmeistern Raten schepfen geswornen vnd den Burgn gemeynlich der steten cleynen vnd newen stat zu prage vnsern liebn getrewen das sie die egen(anten)
schilter vnder sulche freyheyt nicht irren noch hindern in deheyneweis als sie vnser vngnad vormeyden wellen mit vrkunt dicz briefs vorsigelt mit vnser kuniglich maiest
tat Insigel Geben zu prage nach crists geburt dreyczenhundt jar dornach in dem achczigsten Jaren an dem obersten tag vns(er) reiche des Behmischen an dem sibenczend
vnd des Romischen in dem vierden Jaren

per d. Andream de duba