Ich hennsel des Jobst Gnarzen etwen zw dreinicz gesessen seligen Sun Bekenn fur mich all mein erben vnd nachkomen
offenlich an diesen brieff gen allermennchlich Das ich mit guten Willen vnd rechter Wissen von den Erwirdigen
vnd gaistlichen Junckfrawen Ebbtissin vnd Conuent Sant Claren Ordens zw Eger meiner gnedigen lieben
frawen vnd Herschafft Hinder den mein genanter vater gesessen gewesen ist gutlich vnd freuntlich abgeschaiden
vnd mich aller sachen dieweil mein genanter vater Hinder In vnd ich sindther gesessen geaint vnd vertragen hab
vnd Sie gutlich von mir auffgenomen haben das ich In vleissig danck Vnd Sie mir nichts schuldig noch
pflichtig sein Darauff Verede vnd glob ich genanter hennsel Gnarz fur mich all mein erben erbnemen
vnd nachkomen Das weder wir noch nymant von vnsern wegen Sie obgenanten Erwirdigen Junckfrawen
Ebbtissin vnd Conuent all Ir nachkomen vnd die Iren nymant aussgeschlossen vmb alle sach die sich zwischen
In mein genanten vater vnd mir dieweil wir Hinder In gesessen gewesen sein begeben mochten habenn
nichts aussgenomen weder vmb clain gros wenig ader vil wegen hinfur zw ewigen zeiten nymmermer
belaidigen anlangen noch ansprechen sollen noch wollen weder mit recht gaistlich weltlich haimlich
noch offenlich noch one recht gancz in kainerweis bey vnsern guten waren trewen on arck vnd ongeuerde
Des zwuarer vrkund han ich genanter hennsel Gnarz fur mich all mein erben erbnemen vnd nachkomen
gebeten Die Erbern vnd weisen hern Thomasen Koczinder vnd Georgen daniel baid des Rats zu Eger
das Sie Ir Ingsigel von meiner bete wegen des guczeignus In an schaden an den brieff gehange haben
Der geben ist am abent Lucie der hailigen Junckfrawen Nach Cristi geburt funffzehenhundert vnnd
im Dritten Jare