Ich Georg Merchell wannhafft zur Haid bekenn fur mich mein eliche Hausfrawen alle mein erben Erbne(m)er
vnd Nachkomen offenlich an disem brieff vor allenn den die In sechen ader horen lessen das wir
mit rechter wissen vnnd wolbedacht ein par guts tegliche(s) getraid halb kornn vnd halb habernn rechts stet(es)
ewiges zins auff vnserm hoff alda zur Haid gelegen darauff ich seszhaft auff dem grunt podenn Ecker wiesenn
weydnn Einvndzugehorung vnnd aller gerechtigkeyt nichts außgenom(m)en der Erwirdigenn vnd wolgebornen
frawen frawen vrsula Schlikin Ebtissin zu passaw vn(d) Ebtissin des stift zu sant Clarenn In Eger meiner
Genedigenn Erbherrschafft sambt ein ganczen Edlmont vmb ein su(m)ma gelts Nemlichen funffvndzwainczigk
gulden Reinisch egerlandtwerung haben recht vnnd redlich verkaufft vnnd zukauffenn gebenn Neben den vorign
getraid Erbzins so wir Iren genaden zinsenn auch nemlich ein halb par kornn Ein halb par habernn mer darzu
Neunczehenn grossenn zu sant walpurgen tag vnd Neunczehen grossen alles Egerisch werung auff sant michels
tag soliche bemelte su(m)ma sein wir von obgenant vnnserm genedigen herrschafft zu vnsern Nucz vnd fromen
par bezalt worden sagenn Ir Erwird vnd genad mit Crafft dits brieffes gemelter funffvndzwainczigk gulden
quit frey ledig vnnd loß Bereden vnd globen also das wir vnser erbenn erbne(m)er vnd Nachkomen auch alle
besiczer vnd Inhaber des gemelten hoffs In Ewig Nymer Mer abzulossenn der obgenantten vnser genedigenn
herrschafft sambt ein Edlmont wie bemelt alle Iar Ierlich vnd Ides besunder so auff sant Michels tag zway
par getraids mit sambt den alten Erb zins wie bemelt vnuerzugenlich zinsenn sollen vnd wollen gebn
Eger In Iren genadenn gewarsam wie zinsse recht ist ob aber ich mein erbenn vnd Nachkomen bemelt vnser
herrschafft mit zinsenn wie angezaigt es wer In kurcz ader lang wan vnd wie offt das gesche haben Ir Erwird
vnd genad auch Iren genaden nachkomen gut recht In spotten den sie das beuelhenn In aygner Macht onn
alle gerichts gesche vns In benantten hoff heuser Ein vnd zugehorung vnd aller darauß pfanden lassen vnnd
Ires zins dauon genczlich bekomen vnd das thun so offt In des not geschiht wie sie konnen ader mugenn on allen
Iren schadenn als zins recht vnd gebrauch ist onn alle vnser vnd Meniglichs verhindern behelff vnd wider
rede bey vnsern gutten waren trewenn luterlich angenende des zu warer vrkunt hab ich Georg Merchell
fur mich mein Hausfrawen erben erbne(m)er vnd Nachkomen Mit mit vleis Erbetten die Ersamen vnnd
weysenn herrn Georgen winckelman vnd Iobst vnderwreuter bede des gerichts zu Eger das Ir aigen Insigel
von meiner beth wegenn doch In Iren erben vnd Insigell anschadenn an den brieff habenn gehangenn
der gescheen vnd gebenn ist am abent Maria heymsuchung Nach Cristi Geburt tausent funffhundert
vnnd Einvndvierczigistenn Iar