Wir Erhardt, Adam, vnd Hannß, die Trappen gebrüdere, Zue Oberkosma, vnd Ich Hannß Hegeimb
daselbsten, Bekennen hiemit für vnß, vnsere Erben, vnd Nachkommen, das wir mit wolbedachtem müthe,
vnd rechten wisßen, Wir die Eltgestmelten Trappen, dann Ich Hegeimb, ein Ieder theil, ein stückhland Eglein
wie selbige lein, auß den drey bogen herauß gesehen, wie selbige allenthalben abgemarckht, vnd dem Zießhauß vmb die
helffte verbleiben, auch Izt Iue Zins gemacht worden, Haben recht vnd redtlichen, der Ehrwürdig, vnd in
Gott andächtigen Jungkfrawen Catharina Andressin Äbtißin, vnd Convent, des Stiffts vnd Jungkfrawen Closter S(anct)
Clara Ordens in Eger, Als an dero Iederzeit guetigen Erbherrschafft, welche stückhlein wüsten, beyden Ieder theil
Erbgründten, vnd an vns Izt besitzenden höffen, gehörig gewesen, vmb eine benambte Summa gelts, deren wir allthal=
ben Contentirt, vnd bezalt worden sein, verkaufft, vnd Zue kauffen geben haben, Dahero wir Iher Ehrwürd(en) oder
verfaßten der helffte Quittirens vns kräftig hiemit quit, frey, vnd ledig gesprochen haben wollen, dergestalt, das
weder wir, oder vnsere Erben, vnd Nachkommen, Ehrwürdig gedachte Jungkfraw Äbtißin, vnd Convent, wegen dies
ser Zwey verkaufften land bezirckhen, stückhlein wüsten, weder vmb vil, oder wenig, vns, oder andern, Nimmermehr
beleydigen, anlangen, noch besprechen, sollen, oder wollen, weder mit, noch ohne Recht, gantz in kainerley weiß, noch
wege, wie Immer Zueerdenckhen sein mag, sondern abtretten, entwehren, frey, vnd ledigen wollen, wie dieses
Egerisches Gewohnheit recht, vnd gewonheit ist. Bey vnsern wahren trewen, vnd glauben, gantz getrewlichen,
ohne arge, vnd geferde. Zue den Zue wahrem vhrkundt, haben wir eingangs gedachte Trappen Gebrüdere,
vnd Hegeimb, für vnß, vnsere Erben, vnd Nachkommen, vnsere vleiß gebetten, die Ehrnvesten, fürsichtig, vnd
wolweisen, Herrn Johann Stampffen Eltisten, vnd Herrn Johann Maxstadt mit Eltisten, eines Ehrliebenden Raths beyde
der Stadt Eger, das die vmb freundtlichen willen, Ihm ohne schaden, Ihre Insigel, vnden anhero wegebend lest haben,
So geschehen den dreyzehenden Monats tag May des Iahrs Im Tausent Sechshundert, vnd Sechs vnd dreyßigsten. x