Ich Vayt von Tirmanshöuen Richter czu Vrawental bekien offenberlichen mit dysem brif allen dy jn
sehen ader hören lesen daz jch mit wolbedachtem mut redlichen vnd recht vorkauft hab vnd vorkauf
jn craft diz brifes eyn halbes schok gross jerliches czinses auf meim gericht czu Vrawental vnd auf alle
seine czugehörung mit sampt der huben di do mir czinset czu Ocherleyns der Erwirdigen Juncvrawen
Ursula nunen des closters czu Vrawental vmb vünf schok gross di jch von jr gereit hab enphangen czu
geben vnd czu czinsen alle jar jerlichen ein halbes schok gross auf czwen czinstege xv gross auf Sent Gallen
tag der do itzund am allernochsten czukumftig wirt vnd xv gross auf Sent Girgen tag der dornach am aller
nechsten volget vnd alzo fürpas czu thun vnd czu czinsen alle jar ierlichen auf dy selben czinstiege vnvorczogen=
lichen an alles widerveden vnd ab der obgenate Vait seine Erben ader di besiczer des obgenanten gerichtes
den obgenanten czins czu welchem czinstag daz gescheh nicht geben noch beczalten so hat eyn hant di obgenate
Juncvraw Ursula ader wem si daz an irer stat bevilch volle macht vnd gewalt in craft diz brifes daz obge=
nante gericht ader di besiczer des selbengerichtes vnd auch der obgenaten huben czu Ocherleins czu pfenden
vnd di selben phant treiben tragen füren czu vorkaufen ader czu vorsedczen vnder cristen ader juden vmb di
vnsessen czins vnd daz alz oft vnd alzo manichstund czu thun alz oft di obgenaten czins czu iren obgenanten
czinstegen bliben vnvorczolden vnd wen der obgenante Vait seine Erben ader nachkumlingen der obgenaten
Juncvrawen Ursula vünf schok gross haumptgeldes wider geben vnd beczalten mit gereiten geld zo schal
daz obgenate gericht mit sampt der huben czum Ocherleins fürpas von dem selben halben schok gross czinses
vrey vnd ledig sein an alles widerveden vnd wer disen brif hat mit der obgenaten Juncvrawen Ursula gute
willen dem gebüren alle obgeschribne recht diser sachen czu einer grösser sicherheit vnd bestetigung
czu gepete der obgenanten peider teyl di Erwirdig in got vraw Elzbeth Ebtesyn des closters czu Vraw=
ental mit dem willen des Conuentes mit guter gewissen hat jres Conuentes Jnsigel an dysen brif lassen
an hengen der do Gegeben ist noch Criste geburt Vierzchenhundert jar in dem Sibenczehenden jare den
nechsten Sunnabent vür der heiligen driualdikeit tage