Ich Heinrich von der Waytmüll Burggraue zum karlstein Hungmeister des künigreichs zu Behem
Bekenne Offenlich mit disem meynem offenbrieff Als der Allerdurchleuchtigist furst vnd her Herre fridrich Romischer
Kaiser Zuallenzeitten merer des Reichs (et)c(etera) meynem allergnedigister her Schuldig vnd pflichtig ist Der durchleuchtigen Hochgeborn
furstin vnd frawen frawen Elisabethen künigin Zw polan (et)c(etera) meiner gnedigen frawen Czway vnddreyffig Tausent vngrisch
gulden fur ir küniglichen gnaden Heyratgut Vnd nach dem die genant mein gnedige fraw die künigin von Polan (et)c(etera) Auch
der durchleuchtig Hochgeborn furst vnd herr Herr kasimirus künig Zw polan (et)c(etera) mein gnediger her Solich Czway vnddreyffig
Tausent gulden vngrisch vbergeschaft vnd vbergegeben haben ir küniglichen gnaden Sün Dem durchleuchtigisten Hochgeborn
fursten vnd herren hern Wladislawen künigen zu Behem (et)c(etera) meynem gnedigistem Herrn Habe Ich anstat seiner küniglichen
gnaden auff den gewalt brieff seyner küniglichen gnaden den ich yez seiner kaiserlichen maiestat vbergeantwurt hab von
dem genanten meynem Allergnedigistem herren dem Romischen kais(er) an Solicher schuld empfangen vnd eingenomen drey
Tausent vngrischer gulden Darvmb sage Ich obgenanter Heinrich von der Waytmüll (et)c(etera) anstat meines gnedigisten
Herren des künigs zu Behem (et)c(etera) Den obgenanten meinen allergnedigisten herren den Romischen kais(er) (et)c(etera) der genanten
drey Tausent vngrischer gulden an der obg(enan)ten Süm vnd schuld Czwayvnddreyffig Tausent Vngrischer gulden mit
diesem meinem offenbrieff gancz kwyt ledig vnd laß vnd gelobe mit diesem brief das sein kaiserliche maiestat
von Meinem gnedigisten herren den künig zu Behem (et)c(etera) Seiner gnaden Erben noch nyemands anders vmb solich
drey Tausent gulden vngrisch mer gemont vnd die selb(en) drey Tausent vngrisch gulden an den obbemelten Czway
vnddreyffig Tausent gulden dem benanten meynem gnedigisten Herren dem künig zw Behem (et)c(etera) gelegt vnd abgezogen
werden sullen vngeuerlich Mit vrkund des briefs versigelt mit meinem vntenaufgedrukten Insigel vnd zu
marer gezeugnus hab ich gepeten den Edeln gestrengen Ritter Herren Jorgen furstsen vo(n) fuchsperg des obg(enan)ten
meines allergnedigisten Herren des Romischen kaysers Hoffmarschalken Das er sein Insigel neben mir vnten
an diesen meinen brief gedrukt hat Im vnd seinen erben anschaden Gegeben zu der Newenstat am Montag
noch vnser lieben frawentag Concepcionis Anno (et)c(etera) domi(ni) (et)c(etera) Septuagesimo Sexto