Wir Ferdinannd von gots genaden Römischer künig zu allen zeiten merer des Reichs in Germanien zu Hungern Behaim Dalmacien Croacien etc.
Künig Infannt in Hispanien Ertzherzog zu Osterreich Marggrave zu Merheren herzog zu Lucemburg und in Schlesien Marggrave zu Laußitz etc. Bekhennen
und thun khundt allermenigclich das unns der hochgeborn unnser Ohaim Fürst und lieber getrewer Johanns in Schlesien Herzog zu Münsterberg und Oelßn
underthenigclich angebracht das Er sambt den hochgebornnen auch unnserm Ohaimen Fürsten und lieben getrewen Joachim Hainrichen und Jörgen in Slesi=
en Herzogen zu Münsterberg und Oelßn seinen ungesonderten und ungetailten gebrüedern Die hochgeborne unnser Fürstin und liebe andechtige Cristina Herzog=
in zu Münsterberg und Oelßn geborne von Schidlowitz Frawen auf Smilaw und oppotow sein gemahl auf etliche güeter in dem olßnischen Fürstenthumb ge=
legen und auf das ganncze Brensstatisch weichpilde zu Iren lebtagen nach dem Schlesischen Lanndgebrauch verleibgedingt haben Bitende in diemüet das wir
solhes leibgedinge Confirmieren und bestatigen gerüechten Haben wir sein zimlich billichait auch gehorsame getrewe unnd willige diennst die unns gedachter
herzog Johanns offtmalln getan und hinfüro wol thun mag und soll angesehen und als Regierunder künig in Behaim und oberster herzog in Schlesien In
das selb leibgeding genedigclich bewilligt Bestetigen und Confirmieren das selb der obgenannten Cristina Herzogin zu Münsterberg zu Iren lebtagen aus Regie=
runder Behaimischer künigclicher macht volkomenhait und rechten wissen Doch das solhs verwechtniß und gnaden aus unnserm lehen oberighait und potmess=
ighait nit gewenndt genomen oder entzogen werde Seczen Mainen und wellen das sy wo der val zutrüeg Irs schadens khame solhes leibgeding allenthalbn nach
laut der brieff und Sigl so daruber von den Herzogen zu Münsterberg gebrüedern und wir in unnserm hannden gehabt und gesehen aufgerichtet und volzogen
genießn unnd gebrauchen solle Und ungevor unns und menigclich unverhindert und ungetert Zu urkhundt daran fallen und Jeden unnsren undertan=
en Was hohen oder nidern wirden Stannds ambts oder wesens die sein und sunderlich unnserm Jtzigen unnd künfftigen obristen haubtmanen in ober
unnd Nider Schlesien gedachte Cristina Herzogin zu Münsterberg bey solher verleibgedingung und diser unnser bestettigung und Confirmierung Unge=
stert beleiben zulaßn dawider nicht thun noch des Jmands zethun gestaten alls lieb ainem Jeden sey unnser swere straff und ungnad zuvermeiden.
Des zu urkhundt besiglt mit unnserm künigclichen anhanngindn Jnsigl Geben auf unnserm künigclichen Schloß Prag den Sechzehentn tag des
Monats Apprilis Nach Cristi unnsers lieben herrn geburdt Tausent Fünffhundert und im Sibenunddreissigisten Unnserer Reiche des Römisch(en)
im Sibentn unnd der anndern alln im Ainlfftn Jarn
Ferdinandus