Wir Ferdinand von Gottes genaden Romischer künig zu allen zeitten merer des Reichs in Germanien zu
Hungern Behaim Dalmatien Croatien (etc) künig Infant in Hispanien Ertzherzog zu Osterreich Marggraue zu
Morhern Hertzog zu Lutzenburg vnd in Slesien Marggraue zu Lausitz (etc) Bekennen offentlich mit disem brief vnd
thuen khundt menigclich Das wir aus beweglichen vrsachen den Ersamen vnsern lieben getrewen N. Burger=
maister vnd Ratmannen der Stat Görlitz genedigist vergonnt vnd zugelassen haben Gönnen vnd zulassen
Inen auch sölhs aus Römischer künigclicher macht alls Marggraue in Lausitz hiemit wissentlich in krafft
ditz briefs das sy von Heronimo Lotter Burger zu Leiptzig viertausent gulden Reinisch der Inen sölhe Summa auf
Ir pitlich ansuechen gegen gepürlicher versicherung vnd gewondlichem Interesse doch so wir alls der Lannds=
fürst der von Görlitz darain Consentiern vnd willigen fürgestreckht vnd darzuleihen sich erpoten Entlehnen
aufbringen vnd zu Irer gemainer Statt nottürfften gebrauchen mugen Doch sollen sy dagegen verpflicht
vnd schuldig sein benannte Summa der viertausent gulden Reinisch aufs Eist es Inen Imer muglich wider=
umben zubezalen vnd sich von dem Heronimo Lotter oder seinen Erben zufreyen Des zu vrkhundt
Besiglt mit vnserm künigclichem aufgedruckhtem Insigl Geben in vnser vnd des Reichs Statt Augspurg
den viertzehenden decembris Anno (etc) im Sibenvndviertzigisten Vnserer Reiche des Römischen im Sibentzehendn
des Hungrischen im ainundzwaintzigisten vnnd des Behmischen im zwayundzwaintzigistem
Ferdinand
Ad mandatum domini
regis proprium
J Haller (etc)