Wir Rudolf der Ander von Gottes genaden Erwelter Römischer Kaiser
zwallen zeitten merer des Reichs in Germanien, zu Hungarn, Behaimb, Dalmatien, Croatien rc. Khünig, Ertzhertzog zu Osterreich, Marggraff zu Mährern, Hertzog zu Lutzem//
burg, unnd in Schlesien, Marggraff in Laußnitz
Entbietten unnd gebietten unsern, rc. Prelaten, Herrn, Ritterschafften, Manschafften, unnd denen von Stetten, unnsers Marggraffthumbs Niderlaußnitz, hiemit
gnediglich zuwissen,
Alß wir auß sonndern bedencklichen ursachen, unnd fürnemblich, wegen verhüttung schedlicher unnd arglistiger
unnd Contrabandisch waaren, derent halben, durch verhellung der waaren, so durch gedacht unnser Marggraffthumb Niderlaußnitz durch Gewerbsleuthe unnd
fürkauffer gefüert, oder getrieben werden, mochte, die verordnung beschehen, das allenthalben an den zollstetten, besichtigt werden soll, Unnd aber seitt//
hero unnser gehorsame Landtstende unnd Stedt, unnsers Marggraffthumbs, zu unnderschidlichen, mahlen, beschwerdt befunden, das solche unnderschleiffung der
Waaren, nit allain den Burgern, unnd handtwerchsleuthen, auch in gemain allen Inwohnern, zum höchsten schedlich, sonndern auch an unnserm zollgefellen nachtail//
lig, Weill dieselben auß anndern straßen suchen, unnd unnser Marggraffthumb gar umbfahren, unnd da von Landtstraßen meiden thuen, Unnd unß
underthenigist anngesucht unnd gebetten, Daß wir solche waaren unnderschleiffung, genediglich einstellen, unnd hinfüro bey dem zoll allenthalben, wegen deß
ein halben Taler nemben lassen wolten
Hab wir demnach in solche underthenigist bitt, genedigist bewilligt, solche unnderschleiffung vom
ersten January negst khünfftig, Ainnundachtzigisten Jare an, zue lassen, unnd auffzuheben, dergestalt einstellen zulassen, Das nemblich, wie obsteet
ein Jeder fuerman, so auß Holtz, Preußen, Reißen, oder Marck Brandenburg, unnd andern orten, nach Leiptzig, Nürmberg, unnd Oberlaußnitz, durch unnser
Marggraffthumb Niderlaußnitz mit sein Gewerbs waaren, das den Namen haben mag, faren wurde, von ain wagen, deßelben ein halben Taler zoll,
alß nemblich ein halben Taler in herein, unnd ein halben Taler in wider zu ruckh raisen, zu raichen, schuldig unnd verpflichtt sein soll.
Und
gebietten darauff unnserm Landtvogt, Verwalter der Landtshaubtmanschafft, Regimentsräthen, zollverwaltern, unnd zoll Einnehmern unnsers Marg//
graffthumbs Niderlaußnitz, mit ernst unnd wollen, Daß sie dieser unnserr genedigisten bewilligung, unnd beschluß nach khommen, unnd die entliche
verordnung thuen, damit hierüber niemandt wider die billigkhait beschwert werde, Daran volbringen sie unnsern genedigisten
endtlichen gefelligen willen unnd mainung
Geben in unnsern Khüniglichen Schloß Prag den fünffundzwaintzigisten tag Decembris A(nn)o
Im Achtundachtzigisten, unnsers Reichs des Römischen im dreyzehenden, des Hungarischen im Sibenzehenden, unnd des Behaimischen auch im dreyzehenden, /