Wladislaus von gotes gnaden Kunig zu Behem Marggraue zu Merhern Herczoge zu Lucemburg vnnde Slesy Marggraue zu Lussicz ¦...¦ bekennen
offenlich mit disem briue allermennigclich das fur vnns komen ist der Edle Mathes Slik vonn Laza Herr zu Passawn vnnd Weisskirchen vnser lieber getrewer vnnd hat vnns demutig
clichin gebetten das wir Im seinen Sonen vnnd vetern alle vnnd Igliche ire gnade frahait recht hantfesten briue priuilegia gute gewonhait vnnd altherkomen die dan Inen
als sonder vnnd on vonn kunigenn zu Behmen vnnsenn vorfardern gegeben sind Zuuernewen zu Confirmiren vnnd zu bestatigenn gnedigclichen geruheten Des habenn wir angesehn
Solche seine demutige bethe Darzu bedacht getrewe willige angeneme dinst die der gemelt Mathes vnnsenn vorfardern vnnd vnnser Crone zu Behmen offt vnnd Dick willigclichin
nuczlichin vnnd vnuerdrossennlich gethan hat vnd teglich tut vnnd hinfur in Zukunfftigen zeiten thun sol vnnd mag vnnd habenn Darumb mit wolbedachtem mute gutem
Rate vnnd rechter wissenn dem selbenn Mathesen seinenn Sonen vnnd vetern allenn Irenn ¦...¦ vnnd nachkomenn alle vnnd Igliche ire gnade frahait recht hantfesten
priuilegia hantuesten gute gewonhait vnnd altherkomen die Inen alsfordern vnnd von vnnsern vorfardern kunigenn zu Behmen gegeben sind in allenn Iren stucken
puncten artickeln meynungen vnnd begreiffungn wie dan die von wort zu wort lawtenn vnnd begriffenn sind gnedigclichin vernewet Confirmirt bestettigt vnnd bekrefftiget
vernewen Confirmiren bestettigen vnnd bekrefftigenn ync die vonn kunigclicher macht crafft dicz briefs vnnd meynenn seczenn vnnd wollenn das sie furbasmer alle krefftig
vnnd mechtig sein vnnd das sie auch dabey beleibn vnnd der an allenn endenn gebrauchnn vnnd geniessenn sollenn vnnd mogenn gleicherweyss als ob sie alle von wort
zu wort in disem vnnserm brief begriffen vnnd geschribenn weren vnnd sie darann vngehindert dabey wir sie auch schuczenn schirmen vnnd hanthaben wollenn als
wir dan thun mit crafft dicz briefs dem vnnser vorfarder ein ¦...¦ dem bemelten Mathesen verschribenn ad exempla Sla¦...¦ Laza vnnd
¦...¦ vnnd versigelt mit Irenn Zuegehorungen ynnen habenn sol vnnd ein yeder der genannte Mathes vnnser kunigclichin milt durch seiner dinst willenn empfunden
So habenn wir Im die sunder gnade gethann das seine Sone nemlich Nicklas Ieronim vnnd Caspar solch vnnser Sloss Elbogenn mit aller Zugehorung how zue ¦...¦
noch auf Ire bemelte drey leibe vnabgelost ynnen habenn sollenn vnnd gebrauchnn vnnd vorschreibenn yne das von kunigclicher macht crafft dicz briefs So sie abn
von tods wegenn abgingenn alsdann sol vnns vnd vnnsernn nachkomenn kunigen zu Behem die ablosung von Irenn Erben adir nachkomenn gestatt werden noch lawt
derer verschreibung vnnd wir gebietenn darumb allenn vnnd Iglichin vnnsern vnnd der Crone Behmen vnnderthanen vnnde getrewenn in welchm wirden stantte adir wesenn
die sein ernstlichin vnnd vestigclichin mit disem brief das sie die vorgenantenn Mathesen Nicklasen Ieronim vnnd Casparnn seine Sone vetern vnnd Ire Erben
vnnd nachkomen an solchin egedachtenn Iren gnadenn freyhaiten rechten briuen priuilegien hantfestenn gute gewonhait vnnd altherkomen vnnd dieser vnnser bestatigung
vnnd begnadung furpas nit hindern noch Irren incheinerleyweyss Sunder sie dabey hanthaben schuczenn vnnd schirmen vnnd gerugclichin bleiben lassenn als lieb In
sey vnnser swere vngenade Zuuermeiden Mit vrkunt dicz briefs versigelt mit vnnsern kunigclichn anhangenden Insigel Gebenn zu prage am donerstag nach
dem Sontag Iudica in der heyligenn vastenn Nach cristi geburt Vierzechenhundert darnach in dem Sechsundsibenczigsten vnnserer Reiche Im funfften Iarnn