Wir dieße Zeit allhier anwesende vnd Zue end vnterschriebene Obriste Landt Officier
vnd Landtrechte Beysitzer des Königreichs Behaimb, Vrkunden vnd Bekennen hiermit Offentlich gegen Jedermenniglich, das der Allerdurchleuchtigist Großmechtigist Fürst vnd Herr, Herr Matthias Erwöhlter Römischer Khayser, auch zu Hungern vnd Behaimb Khünig, Ertz=
hertzog zu Osterreich, Hertzog zu Burgundi, Marggraff zu Mährern, in Schlesien, Steyer, Kärndten, Crain vnnd Würtemberg Hertzog, Marggraff zu Laußitz, Vnser Gnedigister Khayser, Khünig vnnd Herr, Dem durchleuchtigen, hochgebornen Fürsten vnnd Herrn, Herrn
Ferdinandum, Ertzhertzogen zu Osterreich, Hertzogen zu Burgundi, Steyer, Kärndten, Crain vnnd Würtemberg, Graffen zu Tyroll vnnd Görtz, Eines theils gnedigister Herr, Von sambtlichen Herrn Ständen des Königreichs Behaimb, bey Jüngst anhero Prager Schloß
gehaltenem Landtag, Zu einem Khünfftigen Böhmischen Khünig, Auff gewisse Condition, gnedigist fürgeschlagen, Die Herrn Ständt auch Ihro Khünig(liche) Würd(en), auß angebogenem trewen Eiffer, Khünig vnnd Herrn, angenomben, vnnd Publicirt,
Deroll (alldieweil solches von brauche noch) solches mit den darauß erfolgten Khüniglichen Crönung Confirmirt vnnd bestettigt haben, Das vor beschehung als solches, Die hochwürdige, durchleuchtige Fürsten vnnd Herrn, Herrn Maximilian, Erwöhlter
Coadjutor in Ertzstifft Cölln, des Hochmeistersambt in Preüssen, Administrator, Meister Teütsch Ordens in Teütschen vnnd Welschen Landen, Vnnd Albrecht Gebrüedere, Ertzhertzogen zu Osterreich, Hertzogen zu Burgundi, Steyer, Kärndten, Crain vnnd Würtemberg, Graffen
Zu Habspurg, Flandern vnnd Tyroll, Vnsere auch gnedigiste Herrn, Als welche die Succession gedachten Königreichs pretendirt, sich Ihrer aneran Khünig vnnd Rechten, so sie etwan haben möchten, daran verziechen, auch mehrmal bey Herrn Ständen
nachfolgende Renunciation deßenwegen vbergeben vnnd eingehändigt, so von wort zu wort also lauttendt, Wir Maximilian vnd Albrecht von Gottes Gnaden, Ertzhertzogen zu Osterreich, Hertzogen zu Burgundi, Steyer, Kärndten, Crain vnnd
Würtemberg, Graffen zu Habspurg vnnd Tyroll, Thuen Khundt vnnd Bekennen hiemit offentlich, Ob wir woll, demnach das Königreich Behaimb, Khünigreich vnnd Erblandt, auch alßo, das vnnd sonder meniglich, Wann es Gott der Allmechtig
nach seinem Göttlichen willen, den Allerdurchleuchtigisten Fürsten vnnd Herrn, Herrn Matthiam, Jetzt regierenden Römischen Khayser, vnnd Khünig zu Hungern vnnd Behaimb, Vnserm gnedigisten auch freündtlichen geliebten Herrn vnnd Bruedern (deme wir sonsten
auß treüwem, brüederlichen gemüeth vnnd Hertzen, guete bestendige gesundtheit, vnnd langwiriges leben wündtschen vnnd begern) ohn erben, das von dieser welt, durch den Zeittlichen todt abfordern solte, das er vnnd nach Ihm an vnnd zue fielen
Zu bemeltem Königreich Behaimb haben würden, Da wir Jedoch ein ansehendts, sowoll vnsers löblichen Haußes, als gedachten Königreichs Behaimb nottürfften, mehr als gemeinen nutz vnnd wollstandt, da die erhaltung desselben
vnd Von augen gestelt, vnnd diß angesehen vnnd betrachtet, das wir nunmehr alt, vnnd an Erben schwerlich ohn erben sein, Vmb dannenhero vnsere zu erwehntem Königreich Behaimb habende Khünfftige billiche Prätensionen,
Wollmündtlich vnnd guetwillig (doch allein in favorem vnnd zu beförderung des durchleuchtigen Fürsten vnnd Herrn, Ferdinanden, Ertzhertzogen zu Osterreich, Hertzogen zu Burgundi, Steyer, Kärndten, Crain vnnd Würtemberg, Graffen zu Tyroll
vnnd Görtz, Vnsers geliebten Herrn Vettern vnnd Bruedern, vnnd derselben Männlichen leibs Erben, das wir thuen) begeben, vnnd gentzlichen Renuncirt, Verzeihen vns auch vber vns auch hiemit vnnd in Crafft diß Brieffs, alßo, das wir
Khünfftig auch begebenden fall, wider eingenanten gnedigisten, so lang hochgedachter vnser Herr Vetter, vnnd Brueder, vnnd derselben Männliche leibs Erben Vorhanden, der obangezogenen Prätension halben, bey innhabenden Königreich Behaimb,
vnnd dessen Ständen, nichtes weiter Zuesuchen befuegt sein sollen noch wöllen, Zu Vrkundt der Warheit, wir diß mit vnser aigner handt vndersetzet, vnnd gewöhnlichen Secret Insigeln bekräfftiget, So beschehen von vns Ertzhertzog Maxi=
milian zu Osterreich, im Khüniglichen Schloß Prag, den Eilfften Junij, Vnnd von vns Ertzhertzogen Albrecht, auß dem hauß, Schloß Linchen, Mariemont, den Achten hernach, des gemelten Monats, Nach Christi vnsers lieben Herrn vnnd seeligmachers
Geburth, im Sechtzehenhundert vnnd Siebenzehenden, Vor welche Renunciation vnnd Verzicht, damit wir an Statt der sambtlichen Herrn Ständt, nit Allein diese Recognition hieffürverwartten beeden Herrn Fürsten Offentlich anttwortten wöllen,
Sondern wir reverßiren vnnd Verobligiren vns auch dahin, das inbesagte Renunciation des Königreichs Behaimb einverleibten Privilegien, Freyheiten vnnd löblichen Statuten, vnnd derowegen, Was auß vermögen Ihrer Fürst(lichen) durch(leuchtigkei)t Ertz=
hertzog Maximilians, hieffür offerirten Renunciation halben, besonders von sich gegebenen Revers, derselben ohnbeschaidt, so valid wie bey Ihro Khay(serlichen) May(estät) vnnd den Herrn Ständen, einer abfertigung an die Czehl, dann (daß solches beschehen)
ichts vnverweißlich ligt, Verheiß, treüwlich leben, vnnd darzu helffen wöllen sollen, Zu Vrkundt haben wir diese Recognition mit vnsern Pitschafften besigelt, vnnd mit aigner handt Vnderschrieben, Geben
vnnd actum In Prag, An der Khünig(lichen) Bürg, den 28. Julij, Anno Sechtzehenhundert vnnd Siebenzehendt.