Ich Traut von Schombrunne und ich Albreht sein sun Wir tun chunt allen den di disen brif
sehen od(er) horen lesen. Umb di herwerg ze Watezk ein cut. di dem spital zu Egr(e) zinset sehczich
haller und zwainz huner mit dem Waissad daz dar zu gehort. di von uns zu lehen ist gegangen
do wir reht lehenherren waren Daz uns brud(er) Berhtolt spitalmaist(er) des vorgenante(n) spitals
und sein conuentbrud(er) di lehenschaft der selben herwerg reht und redlich abgchauft haben
Und wir in di gebn habn umb sehzich pfunt haller beraits und bezalts geltes dar umb hab wir
in di selbn herwerg mit allem nucz und rehten geaigent und gefreyet daz wir noch
dehain unser nahchumel nimmer dehain lehenschaft nucz noch reht od(er) gewalt an der
herwerg schuln noch mugen gehaben sund(er) si schuln si mit allem nucz und rehte dem spital zu
eim rehte(n) freigen erbaigen furbaz mer ewichlich habn. Und dar umb daz daz also stet be
leib an allez geuerd geb wir in disen offen brif des ze urchunde bestett mit mein des ege
nante(n) Trauten Insigel und ich ebnant(er) sein sun spint mich des und(er) dem selbn Insigel wan
ich niht Insigels han. Des sint gebeten gezeugen. her(r) Albreht von Hertenberch un(d)
di dreij purgr(e) von Egr(e) Albreht Angil. Gotfrit Nuhgengast. und Eberhart von selbn.
Daz geschaeh do man zalt von Christ(es) geburte drewzehenhundert Jar dar nach in dem drei
undvirczigistem Jar an aller heiligen tach :~