NOS FRANCISCVS JOSEPHVS PRIMVS
DIVINA FAVENTE CLEMENTIA AUSTRIAE IMPERATOR
Apostolicus Rex Hungariae, Rex Bohemiae, Dalmatiae, Croatiae, Slavoniae, Galiciae, Lodomeriae et Illyriae, Archidux Austriae, Magnus Dux Cracoviae, Dux Lotharingiae,
Salisburgi, Styriae, Carinthiae, Carnioliae et Bucovinae, superioris et inferioris Silesiae, Magnus-Princeps Transsilvaniae, Marchio Moraviae, Comes Habsburgi et Tirolis etc: etc:
AUSTRIACI IMPERIALIS ORDINIS CORONAE FERREAE MAGNUS MAGISTER.
Quum recuperatis Divino favente Numine Insubriae olim Austriacae nec non Venetiarum ditionibus Noster Augustissimus amatissimusque Avus gloriosae memoriae Franciscus I. Imperator
equestrem Ordinem de ferrea antiqui Regni Longobardici Corona nuncupatum, in tres classes divisum condere, atque adpositis legibus instruere et firmare decrevisset, haud alius animo Suo
consiliisque Suis scopus fuit, quam ut praeclaris de Caesare ac Patria meritis semet efferentes viri, qui vel in rerum sacrarum, militarium aut politicarum procuratione, vel utilium
scientiarum amplificatione vel rerum ad publicam felicitatem comparandam inventione, vel aliis denique pro communi utilitate dextere egregieque gestis haud vulgarem sibi laudem et apud
concives existimationem pepererunt con-dignum operibus suis proemium reciperent sicque alii ad eos imitandos exstimularentur. Idcirco est, cur et Nos Augustissimi Avi Nostri
intentionibus inhaerentes hujusce Ordinis splendorem non tantum tueri, sed et delectu dignorum, ut illius albo accenseantur virorum magis magisque augere volentes
Te quoque meminimus fidelem et dilectum Nobis
JOANNEM NEP. JESTRŽÁBEK
Generalem ac Magnum Magistrum Ordinis sacri et militaris Crucigerorum cum stella rubea per Imperium austriaco-hungaricum, regni Bohemiae Praelatum infulatum, nec non civem
Franzensbadensem ad honores.
Exploratas et compertas habuimus praecipuas Tuas ingenii animique dotes, Tuam Nobis bene notam probitatem et integritatem, Tuam erga Nos fidem et devotionem, potissimum au-
tem Tuam industriam, solertiam zelumque Tuum, quorum in perficiendis novis reipublicae institutionibus erga patriam atque principem pietate ductus praeclara specimina de-
disti; - proinde Te perdignum existimavimus, ut publico hoc singularis benevolentiae Nostrae pignore ac meritorum Tuorum praemio orneris. Quibus sane perpensis Te fidelem
et dilectum Nobis Joannem Nep. Jestřžábek in Equitum numerum Imperialis ordinis Nostri Coronae ferreae secundae classis Rescripto Nostro die prima mensis Februarii
anni 1872 dato retulimus adeoque Te hujus ordinis Equitem secundae classis fecimus et creavimus, volentes Te omnibus iis honoribus, juribus et praerogativis uti, frui et gaudere,
quae huic gradui dicti ordinis juxta tenorem sanctionum die prima Januarii anni 1816 ab Augustissimo Avo Nostro editarum, competunt. - In quorum fidem ac robur prae-
sentes Tibi literas tradimus, quas propria manu subscripsimus appensoque Imperiali Nostro sigillo communiri jussimus.
Dabamus Viennae die decima quinta mensis Martii anno reparatae salutis millesimo octingentesimo septuagesimo secundo, Regnorum Nostrorum vero vigesimo quarto.
Franciscus Josephus
Carolus L. B. Mecséry
Ordinis Cancellarius
Ad mandatum sacrae Caesareae et Regiae Apostolicae Majestatis
Austriaci Imperialis Ordinis Coronae ferreae Magni Magistri proprium.
Franciscus eques Scharfen ab Hennedorf
c. et r. consiliarius ministerialis
Ordinis Secretarius.