Wir Ferdinandus von gotes gnaden zu Behmen vnd hungern Croacien ec(etera) kunigk Jnfant Jn hispanien Ertzhertzog zu Osterreich Marggraff zu Merhern Hertzog zu Lutzenburg vnnd Jn Slesien vnnd Marggraffe zu Lausitz ec(etera)
Bekennen vnd thun kunt gegen allermenigklich fur vns vnsere erben vnd nachkumende Das wir betracht die trewen willigen dienste so der wolgeborne vnser lieber getrewer Johan von Rosenberg aüff Strakonitz Sancti Joannis
Hierosolimitani Ordinis der Priorate durch Behmen Merhern Slesien Polen ec(etera) Oberster Maister vnsern furfarn herren vnd kunigen ec(etera) vnnd vns gethan kunfftig thun soll vnd magk Darumben wir sunderlich genaigt Jne
vnd den loblichen Orden bey Jren heusern Hospitaln kirchen Pfar vnd kirchlehen Dorffern Leuthen Wiesen Welden teichen Mulen liegenden zinsen vnd genissen an pfennigs oder guets weist vnnd mit alle
Jren rechten gerechtigkaiten vnd zugehorungen Auch alle Jre testament alt herkomen Statuten derselben gebrauch vnnd verfaste besitzunge welchs der orden one rechtliche ansprache oder alle verfaste guet gemainlich besitzsen Vnnd
ob aüch hewte Jn gutem gebrauch gehalten vnnd wie die mit sunderlichen namen mugen erkant vnnd außgedruckt werden also volkumlich als weren dieselben alle Jn dysen vnsern kuniglichen brieff von worte zu worte bestimt
verclert vnd außgeschriben so sy vnder vns Jn vnser kron Behmen Merhern Slesien vnnd Lausitz haben gnediglich zuschutzen vnd zuhandhaben vnnd als wir aüch aüs kuniglicher furtragen angeben oder berichte gemerckt was
ambter hie vorden oder standes der ehr die weren Von obgemelten Maisters vnd seines Ordens guten was vergeben vnd verschriben hetten oder nach aüs vorgeschehen gnaden was vergeben oder verschriben das wellen
Wir Jtzundt als dan vnd dan als Jtzunt alles hiemit aüffgehaben cassirt vnnd fur gantz vnkrefftig vnd vnbundig gehalten haben Sunder setzen maynen vnd wellen hiemit aüs volkumener bestimpten regirenden kuniglichen
gwalt vnd macht als Marggraue Jn Merhern hertzog Jnn Slesien vnnd Marggraue zu Lausitz Jn crafft ditzs brieues das gdachter Maister vnnd der Orden sambt alle Jren nachkumen Jre vnd des Ordens heüser hospi
talien kirchen pfar vnd kirchlehen Dorffer Leuthe wiesen welde teichen guete teiche Mulen liegende zinse vnd genissunge an pfennigs oder guets weise vnnd mit alle Jren rechten gerechtigkaiten vnd zuge
horungen wie fur alters laut Jrer alten Priuilegien stabilimenten vnd freiheiten erblichen vnd ewiglichen geruglich one alle vnd yedes Jrrunges besitzsen geniessen vnd gebrauchen Sollen vnd mugen vnnd damit
gantz mechtigklich wie mit Jren aigen guetern guet thun vnd gelassen fur vns vnsere erben vnnd nachkumende kunige zu Behmen Marggrauen zu merhern hertzogen Jn Slesien vnnd Marggraffen zu Lausitz
vnnd fur allermeniglich vngehindert Mainen vnd wellen aüch das obgemelter Maister vnd orden vnnd alle seine vndertanen aüch Jre vorsteher zinse furstliche rechte Maldraten geniessen an pfenniges oder
guetes weist mit hilffe vnser ambtleute haübtleute Burgermeister vnd rathschepfen pfenden sollen vnd mugen so offt es Jne not thut mit selichen pfanden aüch thun vnd lassen mugen sam sich alle recht
dinglich vnd volkumlich daruber erzaigt Gebieten hieraüff allen vnd Jtlichen vnsern fursten Grauen Prelaten herren Ritterschafft Manschafften haübtleuten ambtleuten vogten steten burgermeistern Rethen Richtern
vnnd gemainden allen vnsern vndertanen Jn vnser kronen Behmen Merhern Slesien vnnd Lausitz wass sy hie vorden oder stands die seyn ernstlich vnd vestiglich etzlichen vnd beuelhen das sy den Orden an seinen
Christlichen stifften heüsern hospitaln kirchen pfar vnd kirchlehen dorffern Leuthen wiesen welden teichen gueten teichen Mulen liegenden zinsen vnd genissen an pfenniges oder guetes weise vnnd mit alle
Jren rechten gerechtigkaiten vnd zugehorungen Auch alle Jre testament alt herkomen Statuten derselben gebrauch vnd verfaste besitzunge Jn kainen Jn Jren oder aüch aley abbruch Jnhalt oder gewalt zuthun Sunder
mehr gdachten Maister vnd den Orden bey solicher vnser confirmation bestetniss vnd begnadunge nach Jrem hochsten vermugen zu handhaben zubeschutzen vnd zubhalten Darwider nicht zuthun noch niemandes
dasselbige enuigerley weise zuthun gestatten vnnd so offt es von mehrgdachtem Maister dem Orden oder seinen vndertanen oder aüch Jre diener an Jrer stadt ersucht werdet gnuglichen pfandes an allen aüßzugk
Jnnerhalben der vermahnunge vner ablessiglichen Denn tausent Marck Ehemischer groschen Jnn vnser kunigliche kammer zuuerfallen oder wem wir aüs sundern gnaden werden seliche geben vnd zuuordern beuelhen
die wir dann aüff ainen yeden er sey gaistlichs oder wertlichs standes so offto diß passirt vnnd freuentlich darwider tethe oder handelte wellen gsetzt haben Ob aüch iemant der andern vnder vndertanen sich
dem Maister von Strakonitz vnd nachkumenden aüs furigem geiste widersezte oder seine gburliche gerechtigkait aigenwilliglich Jnzuhalten vnderstund So beuelhen wir aüch allen sambtlich vnnd sonderlich
das sy den vnd dieselbigen aüff Jhn oder der seinen ansuchen helffen zugehorsam brengen vnnd hiedinnen dem andern thut bey vermeidunge vnser straff quanten pen vnd vngnaden Zu urkunde vnser kuniglich
Jnsigel haben wir an dysen brieff hengen lassen Geben aüff vnserm kuniglichen Schlos zu Pragen Montags nach Jnuocauit Nach christi vnsers lieben herren geburt Jm funfftzehenhundertsten vnnd syben
vndzwaintzigsten Jare vnsers des Behmischen vnnd Hungarischen Jm ersten Jaren
Ferdinandus