Wir von gotz genaden Apt vlrich von Osek tůn chunt allen den die disen brief lesent oder horent lesen die nv lebent ob her
nach chunftich sint daz brůder Chvnrat von hakenbůch mayst(er) von Meingoz hat gechouffet dem hus ze Meingoz ein hofstat vnsers
gotzhuses aigens dacz Radendorf ze rehtem purhreht also daz man vns von der hofstat sol dienen alle Iar sechzik phenning vnd
swaz ein ander holz dienet oder dienen schol vnd ein smiten vnd zevon reht nevn phenning oder swaz einem andern holden ober
halp oder niderhalp ze tůn geschiht daz tůt ouch er swa man vns dez von der hofstat wis ist da schul wir hincz den hofstat lawten
reht als volchlichen haben als hincz andern vnserm gůt daz als vil dient dacz Radendorf als sitlich vnd gewonlich ist des gebn wir
disen brief versigelt mit vnserm anhangel ze ainem stæten vrchunde der brief ist gegeben do von christes pürte waren tusent
Iar vnd zwai hundert Iar vnd in dem dri vnd nvnczigistem Iar an sant Michels tag