Ich Stephan hertil vnd lorencz seyn bruder erb czu eynteil yn der nittil peile bekennen offinlich mit desem brife das vor vns komen
ist vnser vndir sesse Close karscher vnd hat vns gebeten das wir ym gunnen uff seyn gut das her vndir vns hat
legen yn der nittil peile vorkowfen eyn margk yerlichs cynses vmb zehen margk das hab wir ym gegund nu bekenet
her vnd hat bekand das her mit rote synes weybis vnde syner kynder hat vorkowft recht vnd redlich eyn margk grosschen
yerlicher gulde yn vnd uff seyn gut vndir vns gelegen dem geystlichen h(er)r(n) dem Compter vnd synen brudern dy czu Reychin
bach seyn adir noch komende werden seyn vmb zehen margk pregischer grosschen polnyscher zal vnd cyns czu gebin
off czwene tage der irste off synte walpurgis tag eyn halbe margk der noch uff mychaelis ouch eyn halbe margk vnde
alzo alle yar noch enander vnd ab d(a)s nicht geschege so glovbe wir obgenanten bruder als dy erb czu vnde vnser noch kome
lynge deme vorgenanten h(er)r(n) dem Compter vnd syne brud(er) pfandis czu helfen an arg vnd mit dem pfandi czu tuen
vnde losen als ap alle recht domete irgangen weren Ouch gan der vorgenante h(er)r(e) der Compter dem vorgena(n)
ten cloze karscher adir syme wybe adir noch komelyngen wen se wellen adir mogen wedir abe czu kowfen
den selben cyns eyn margk wedir vmb zehen margk der vorgenanten grosschen vnde zal vngehyndirt Czu
eyner bekentnysse hab ich Stephan hertil vnde lorencz hertil gebruder desen briff vorsegilt mit vnsirn an
gehangen yngesegil der gegeben ist noch crist geburd tusent virzen hundirt yar dor noch yn deme virzce(n)d(i)n
yar an synte Scolasciam tag