Jz chympt von der hingender zit. daz maneger sachafter dinge. die die livte mit ein ander zetvn habent
vil ofte gar vergezzen wirt. sie enwerden danne wol bestetet. mit gvter warnvnge d(er) schrift. vnt ouch d(er) livte. Da von
ich Sifride snvse genant von hvnrsaim. chvnde allen den. die nv lebentich sint. vnt her nach chvnftich werdent. die dysiv
wart hozent. daz ich mit gvtem willen miner hovsvrowen. vor hailweigen. allez min gvt. oder min erbe. daz ich daze swarz
bach hete han gegeben. vrilich. vnt ledichlich. in dem Namen gotes. dvrch miner sele. vnt miner vorden sele hail. den
Brvdern des spitales des hailgen hovses von Jervsalem. sant Johannes ordens daze meivperge. die selben Brvder. daz
selbe gvt immer aigenchlichen. vnt ewichlichen zebesitzen. Vnt daz dise vorgenantiv gotes gabe. von deheinem minen
vrivnt. oder mage zedeheiner nachchvnftiger zit. mit deheiner vordervnge mvge zebrochen werden. od(er) in deheinen irre
sal iht chomen mvge so han ich dise hantveste. disen vorgenanten Brvdern daze meivperge gegeben. ze einer zvge
nvsse ganzer steticheit. rehte versigelt mit minem Jnsigel. vnt mit d(er) herren Jnsigel die hie genant werdent
die ouch diser gabe zvge sint. Daz sint die. her. Otte von haselowe zeden ziten Lantrihtare. her Livtolt von
chvntinge. zeden ziten des Landes schenche. her hainrich von velsperch sine brvd(er). her alber von clemens. h(er)
herman von wolkersdorf. h(er) Otte von gotraide. her chvnrat von pilchdorf. vnt ander zvge. Do daz ge
schehen ist. do was nach vnsers herren gebvrt. tovsente iar vnt zwai hvndert iar. vnt in dem zwai vnt
ahtzegistem iar. Jn dem maien. an sant philippes. vnt sant Jacobes tage. .1.-