Ich R(a)uchiz hern Otten wib von Schonnchirchen tochter h(er)n Vlrichs des Stuchsen von Trauenm(en)storf vergich
an disem brief vnd tůn chvnt allen den die in sehent oder horent lesen die nu lebent vnd hernach chvnftich werdent daz
ich meinem s(un) bruder Vlrichen von Nv(e)nperg sant Johans ordens mit meins s(un)s Otten des Sůzlofer gůtem willen vnd
mit aller der erben willen die recht wellent haben zv dem selben gůt daz an disem brief geschriben stet han gegeben drithalb
phvnt geltz wien(er) phenning datz Toblitsch also daz ich die selben gvlt sol inne haben vnzen an meinen tod vnd ist daz ich mein
s(un) bruder Vlrichen vberleb so sol die vorgenant gvlt die an disem brief geschriben stet nach meinem tod hinvvider erben auf die
nachsten erben die ez zerecht sol angenvallen Geschach aber ein dinch daz mich mein s(un) der vorgenant bruder Vlrich vberlebt so
sol er mit der selben gvlt sein phrvnde pezzern vnzen an seinen tod vnd nach seinem tod sol die vorgenant gvlt die an disem brief
geschriben stet beleiben ewiclichen bi dem Gotshaus ze Nv(e)nperg vnd gib dar vber disen brief mit meinen Insigel mit h(er)n Albrehts
des Stuchsen meins bruder Insigel mit Siffrids von Haslowe meins aidems Insigel vnd mit Otten des Sůzlofer meins svns
Insigel versigelt ze ein steten vnd zv ein ewigen gehvgnisse diser sache wand ich siv des han gebeten daz si irer Insigel habent
gegeben an disen brief vnd mit den gezevgen die hie geschriben stent daz sint die her Otte von Haslowe her Chv(n)rat von
Haslowe Stephan der Stuchs Hadmar der Stuchs Siffrid von Chramchpach Cv(n)rat der Nv(e)nstat(er) mein aidem Otte
von Nv(e)nstat(er) mein stiefsv(n) vnd ander biderb levt genvge den sichtlich diser sache wol chvnt vnd gezevgen ist diser
brief ist gegeben ze Trauenm(en)storf des svntags ze Mitterfasten do man von Christes geburt zalt drevzehen hvndert
Jar vnd ein Jar vnd in dem nachsten Jar darnach