Ich bruder Syghart von Pettendorf. Vnd ich Sygwol sein svn. veriehen Vnd tvn chvnt allen den.
die disen gegenwirtigen prief sehen oder horen lesen. die nv lebent vnd her nach chvnftich sint. daz
wir vns mit gvtlichem willen. vnd mit gesamter hant. vnd mit vnser vrivnde rat. bedaht
haben. vnd zv der zeit do wir ez wol getvn mochten dvrch vnser sel vnd aller vnser
vordern sel willen. gegeben haben sant Johans orden den brudern ze Meimberg. den hof
datz Renzleinstorf der vnser rechtes aygen ist. mit allem recht. als ich bruder Syghart
manigen tach han gehabt besvechet. vnd vnbesvchet. ze dorfe vnd ze velde. mit so
getaner beschaidenhait. Daz Sygwol mein svn. vnd seins bruder svn Ott fvriv mit allen
iren Erben den vorgenanten hof von sant Johans brudern ze Meimberg. zv rechtem
pvrchreht schvllen haben vnd gewalt haben ze verchaufen vnd ze versetzen vnd ze
verwehseln. also beschaidenleich. daz die vorgenanten Erben oder swer den vorgenanten hof
inne hat alle Jar schol zway phvnt wienner mvnzz dienen sant Johans ordens
den brudern ze Meimberg. daz ain phvnt phenning schol man dienen an aller
hailigen tag. Daz ander phvnt phenning schol man dienen an vnser frowen
tag zver Liechtmesse. Daz disev rede. vnd daz geschefte stet vnd vnzebrochen
bleibe. dez gib ich bruder Syghart von Pettendorf disen prief gevestent mit meinem
insigel. vnd mit meins svns Sygwols insigel versigelt zv ainer steten vestenvng
diser rede vnd sache. Dez ist gezevch bruder Johans von Rosenstain zv
den zeiten Maister ze Meimberg. vnd bruder Ott prior. brud(er) fridrich von Maid
mvrch. bruder hainrich von schawnwerch. bruder Vlrich hvebmaister. bruder
Niclas chamerer. her Diether von ymmendorf. Lemprecht sein svn. her vlolt
von wvldestorf. fridel chamerer. alber. herman pvomaister. vnd biderber levt
genveh den disev rede. vnd sache chvnt vnd gewizzen ist. Diser prief ist
gegeben do von christes gebvrt warn ergangen tausent Jar. Drew hvndert
Jar. vnd dar nach in dem sibentzehendem Jar an.