Ich Dietmar der Holczschuch von Dietreichstorf vnd ich Alheit sein Hausvrowe vnd ich
Dietmar sein svn der Holczschuch tvn chunt vnd tvn chunt allen den die disen prief sehent oder horent
Lesen Daz wir mit wolbedachten mvte mit gesamt hant vnd mit vns(er) erben gvtlichem willen
Zv den zeiten da wir ez wol getvn mochten haben geben vnse rehten aigen ainen weingarten der da
Leit zv Leve vnd gehaisen ist der Stampeln den hab wir halbe geben dem havs zv Meinsperch vnd dem
erb(er)n wirt her(n) Johans da selbs durch vns(er) sele hail wille vnd durch vns(er) vat(er) sele wille vmb
Zwai vnd Zwainzic phvnt phennig wiener mvntz da wir rehtes vnd reht gew(er) sein Vnd daz den
vorgenant(en) h(er)r(e)n vnd dem havs zv meinsperch die selb gabe stet bleibe vnd vnzebroche(n) dar vber gebe
wir disen prief v(er)sigelt mit meim Insigel vnd mit meins svns Insigel des Dietmars vnd mit mein(er) zwaier
aidem Insigel Thomas des parsenprvnn(er) vnd hertweigs von Zwingendorf Vnd ob die vorgenant(en) h(er)r(e)n
von meinsperch dahain ansprovch v(er)bas hetten vmb den weingarten rehthel schaden sie des nemen den
schul wir in abetragen ich vnd all mein erben Vnd swo wir des niht tvten so schult sie ez haben avf
vns vnd avf allen vns(er) erben vnd avf alle dem waz wir haben in dem lande zv ost(er)reich Der
brief ist geben nach christi gepvrt drevzehenhvndert jar dar nach in dem ain vnd dreizzigist(en) jare
an sand Gregorien tage des hailigen pabstes