Ich hainrich von pernhartstorf Wgich vnd tuen chunt Allen den di disen brief an sehent oder horent lesen
die halbew mül vnde ein bastube die ze taenzendorf sint gelegen vnd mein pfant sint gewesen von
Nydasen vnd Albern den grazzern vnde Irre Erben vnd daz ir rechtes purchrecht ist gewesen
von den herren vnde von dem hawse ze Mawrperge daz wir die mit gesamter hant vnd mit
guetem willen vnde nach vnser baider vrelvnt gar ledichlichen ver chawft haben demen
Herren vnd dem hawse ze Mawrperge sande Iohannes orden Mit allem dem recht als wir ez
gehabt haben besuecht vns vnbesuecht ze velde vnde ze dorfe vmbe vier vnde zwainzich
pfvnt wienner pfenninge der si vns gar verrichtet vnd gewert habent an allen gebresten
vnde sullen in awch daz selbe guet schermen vnd ver treten fur alle ansprach swo in dez not
geschiecht als in dem lande ze oesterich recht ist taeten wir des nicht swelhen schaden si des
danne nemen mit dem rechten den sullen wir in abe legen an alle wider rede vnd haben
in da fur ze pfante gesazt vnsern hof der awch gelegen ist ze taenezendorf Mit vnserre
Mueter guetem willen wan ir rechten morgen gab ist vnd vnser rechtes purchrecht ist
von den herren vnd von dem hawse ze mawrperg dar vber geb wir in disen brief ver
sigelt vnder meinem Insigel vnd vnder Nydas insigel des grazzer so vpinte Ich mich
Alber vnder meines prueder Nidas insigel wan ich nicht aigen insigel han diser brief
ist gegeben da von christe gepurte waren ergangen drewezehenhundert Iar dar nach
In dem fvmf vnde dreizzigisten Iar an sant gedrawten tage in der vasten