Ich Gerhart der Eneusse ze Ernstprunne vnd Jch Agnes sein hauswrowe vnd Jch Heinreich sein sun
Jch peter von Greiffenstain vnd Jch Gotfrid von Radebrunne Hern Gerhartz prudem vnd Jch Margret
sein hauswrowe vnd alle vnser erben Wier veriehen vnd tůn chunt allen den die disen prief lesent
oder horent lesen die nv lebent vnd hernach chvnftich werdent Daz wir mit verdachtem mvt vnd
mit zeitigem Rât vnsern mivnt vnd aller vnsern erben gůtem willen vnd gunst ze den zeiten do
wir is wol getůn mochten mit gesampten hant Recht vnd redleich verchauft haben vnsers rechten
aygens gůtes tzway phunt gelts an czehen phenninge wienner Mvnzze Die da ligent ze Haslarn
dreiczehenthalb schillinge auf behawsten holden vnd auf vberlent drei schillinge vnd seche phenning
gestift oder vngestift versůcht oder vnversůcht wie so daz genant sei Daz haben wir alles
ledichleichen vnd freyleichen gegeben ze chouffen den erbern herren ze Altenpurg dem conuent mit alle
dem recht vnd nvtz als wir daz her pracht haben in aygens gewer vmb zwainzik phunt penninge wienner
Mvnzze der wir gar vnd ganczleich gewert sein Jz schullen auch die vorgenanten herren mit dem
vorgenanten gůt allen iern frumen schaffen verchäuffen versetzen vnd geben swem si wellen an allen irrsal
vnd auf seczen vnd ab seczen stiften vnd prowen an alle irrung vnd durch pezzer sicherhait seczen
wir vns die vorgenanten Jch Gerhart der Eneusse vnd Jch Heinreich sein sun Jch peter von Greif=
fenstain vnd Jch Gotfrid von Radebrunne vber daz vorgenant gůt ze rechtem scherm vnd gewer
fůr alle ansproch als aygens recht ist ains landes recht in Osterreich vnd nemen si des chainen schaden
mit nochraisen mit porscheften oder von wem daz gesein mocht mit recht den schullen wir in gar
vnd gancz ab tragen an alle wider rede vnd an allen chrieg vnd schullen siv auch daz haben auf
vnserm triwen vnd auf allem dem gůt daz wir haben in dem lande ze Osterreich Si habent
auch daz vorgenant gůt gechauft zu der pirdnuz vnd zu pezzrung irm orden in selben vnd allen
irn nochchomen zu ainer ewigen stetichhait Vnd daz die red also stet vnd vnczebrochen beleibe
Dar vber so geben wir den vorgenanten herren disen prief zu ainem offenm vrchund vnd zueinem
waren gezeuge diser sache versigelt mit vnsern Jnsigeln Vnd sind auch diser sache gezeuge
die erbern leut her Jans von element her Dietmar von Rvdarnlezz Heinreich der Eneusse
ze Ztampach vnd ander piderb leut genůch den die sach wol chunt ist Der prief ist geben
noch christes gepůrt dreuczehen hundert Jar dar nach in dem Newn vnd dreizzigisten Jar
an sand Jorgen tag