Ich Vlreich der Pruzendorffer vnd ich Margret sein hauswrowe vnd ich Hans vnd ich Katrei vnd ich Elzbet vnd ich Agnes der selben voren
Margreten chinde die si hat mit irm Erem wirt Ortolfen von Sibenchirchen dem got genade Wir vergehen vnd tůn chunt allen den die disen brief
lesent oder horent lesen die nu lebent vnd hernach chünftich sint Daz wir mit vnser erben gůten willen vnd gunst mit verdachtem müt vnd mit
gesamter hant vnd nach vnser pesten freunt rät zü der zeit do wir es wol getůn mochten Verchauft haben von rechter chäfter not von des
geltes wegen daz ich Margret vnd meiner chinde gelten solden hintz den Juden daz vns der egenant mein Erer wirt Ortolf von Sibenchirchen
ze gelten lazzen hat Vierthalb phunt wienner phenninge geltes die rechtes aigen sint die da ligent ze Sibenchirchen auf dreu halbem
lehen vnd auf sechs hofsteten vnd auf alle dev vnd dar zü gehorer ze velde vnd ze dorf swie so daz genant ist Die selben Gult
haben wir recht vnd redleich verchauft vnd geben mit alle dem nutz vnd recht als wir si in Aigens gewer her pracht haben vmb Siben
vnd Dreizzich phunt vnd vmb Sibent zich phenninge wienner münze der wir gar vnd gäntzleich gewert sein da mit wir
die selben gult vnd ander güt geledigt haben von den Juden Dem erbern gaistleichen herren Pruder Otten von wienne sam Johans
Orden vnd dem selben seinem Orden vnd dem haus ze Mailanperge furbaz ledichleichen vnd vreileichen ze haben vnd allen irn frumen da mit
ze schaffen verchauffen versetzen vnd geben swem si wellen an allen irrsal Vnd wand die vorgenanten chinde Hans noch zü seinen
iarn nicht chomen ist vnd Katrei vnd Elzbet vnd Agnes noch nicht vogtpaer sint da von so setzen wir vns ich Vlreich der Pruzzen
dorffer vnd ich Margret sein hauswrowe der selben chinde Můter vnd ich Hainreich der Hummel vnd ich Meinhart der Pruzendorffer
vnd ich Hainreich der Chrotenchamer vnd vnser erben vnuer schaidenleich vber die obgenanten Gult dem egenanten Průder Otte
vnd sam Johans Orden vnd dem haus ze Mailanperge für vns vnd für die egenanten chinde ze recht en gewern vnd schirm
für alle ansprach als Aigens recht ist vnd des Landes recht ze Osterreich vnd auch als lange vntz daz dev selben chinde Hans zü
seinen iarn chümt vnd Katrei vnd Elzbet vnd Agnes vogtpaer werdent vnd sich der vorgenanten gult gäntzleich verzeuhent vnd
auf gebent als Aigens recht ist vnd des Landes recht ze Osterreich Wær aber daz si furbaz mit recht an der selben gult
icht chrieges oder ansprach gewunnen swaz si des schaden nement daz suln wir in alles aus richten vnd wider chern an allen irn schaden
vnd suln auch si daz haben auf vns vnuer schaidenleich vnd auf allem vnserm güt daz wir haben in dem Lande ze Osterreich wir
sein lebendich oder tode Vnd daz diser chauf furbaz also stæt vnd vnzer brochen beleibe Dar vber so geben wir in di
sen brief zü einem wærn vrchunde vnd zü einer ewigen vestnunge diser sache versigilt mit vnsern Insigeln Diser
brief ist geben ze wienne nach Christes geburt dreutzehen hundert iar dar nach in dem Zway vnd fümfzigisten iar
an sant Jacobs abent